1 (יחוח)Yahweh hais tias, Ixayees es, yog koj yuav rov los kuj tsim nyog koj rov los cuag kuv lawm. Yog koj muab tej dab mlom qias vuab tsuab pov tseg kom dhau kuv lub xubntiag, thiab tsis txhob ua ywj fab ywj fwj, 2 thiab yog tuav (יחוח)Yahweh uas muaj txojsia nyob lub npe cog lus twv tseeb thiab ncaj tiag tiag li, mas ib tsoom tebchaws yuav tau koob hmoov hauv (יחוח)Yahweh thiab lawv yuav qhuas ntxhias nws.

3 Rau qhov (יחוח)Yahweh hais li no rau cov tibneeg Yahdah thiab cov uas nyob hauv Yeluxalees hais tias, cia li laij daim teb uas twb tso tseg ntev los lawm, tsis txhob tseb noob rau hauv nruab nrab tej hav pos. 4 Cov tibneeg Yahdah thiab cov uas nyob hauv Yeluxalees es, cia li muab nej ua kevcai txiav xyeem rau (יחוח)Yahweh, cia li txiav nej lub siab tawv tseg, ntshai tsam kuv txojkev npau taws yuav tawm hlawv nej yam li hluavtaws hlawv, thiab yuav kub tsis muaj leejtwg tua tau, vim yog tim nej tej kev phem uas nej ua.

​

Yuav Ua Rog Rau Yahdah

5 Cia li tshaj tawm rau hauv Yahdah thiab qhia rau hauv Yeluxalees hais tias, cia li tshuab raj kub yaj mus thoob lub tebchaws, qw piav nrov nrov hais tias, cia li tuaj txoos ua ke, cia peb nkag mus rau hauv tej moos uas muaj ntsa loog ruaj khov. 6 Cia li tsa chij mus rau hauv Xi‑oo, cia li khiav kom dim, tsis txhob tos, rau qhov kuv coj tej xwm txheej phem sab ped tuaj thiab coj kev puam tsuaj loj kawg tuaj. 7 Tus tsov ntxhuav twb tawm hauv nws lub chaw nkaum mus lawm, tus uas ua rau tej tebchaws puam tsuaj twb sawv kev tuaj lawm. Nws tau tawm hauv nws lub chaw mus lawm, yuav ua rau nej lub tebchaws piam tag. Nej tej moos yuav pob tag tsis muaj leejtwg nyob. 8 Vim li no nej cia li muab khaub seev tsaj los hnav, cia li quaj ntsuag thiab quaj nyiav, rau qhov (יחוח)Yahweh txojkev chim kub heev tsis thim rov qab ntawm peb li.

9 (יחוח)Yahweh hais tias, Hnub ntawd tej vajntxwv thiab cov thawj yuav qaug zog poob siab tag, cov pov thawj los yuav ceeb nkaus thiab cov xibhwb cev (יחוח)Yahweh lus los yuav xav tsis thoob. 10 Mas kuv thiaj hais tias, Au (יחוח)Yahweh, yeej yog koj dag haiv neeg no thiab lub nroog Yeluxalees xwb tiag, koj hais tias, nej yuav tau noj qab nyob zoo, tiamsis qhov tseeb hniav ntaj twb los txog peb txojsia lawm. 11 Thaum ntawd yuav muaj lus hais rau haiv neeg no thiab Yeluxalees tias, muaj cua kub ntsawj saum tej roob do hau hauv ntuj nrag teb do tuaj raug kuv haiv neeg, tsis yog tuaj ntxuaj tej npluag lossis tuaj cheb.

12 Nthwv cua uas kuv tso tuaj hlob dhau tej ntawd. Tus uas hais tej lus txiav txim rau lawv no yog kuv ntag. 13 Saib maj, yeeb ncuab sawv tuaj yam nkaus li huab sawv, lawv tej tsheb ua rog zoo yam li khaub zeeg cua, lawv tej nees nrawm dhau li dav ya. Peb raug txom nyem lauj, rau qhov peb puam tsuaj lawm.

14 Yelu-xalees es, cia li muab tej kev limhiam hauv koj lub siab ntxuav pov tseg kom koj thiaj li dim. Yuav cia tej kev phem uas koj xav nyob hauv koj lub siab mus ntev li cas?

15 Rau qhov muaj suab tshaj tawm tuaj pem lub moos Daj thiab saum lub roob Efa‑is hais txog tej xwm txheej phem uas tuaj. 16 Cia li ntuas ib tsoom tebchaws tias lawv tabtom tuaj lawm, cia li hais rau Yeluxalees tias, cov uas vij lub nroog tabtom tuaj deb deb tuaj, lawv qw nrov nrov tawm tsam Yahdah tej moos.

17 Lawv vij nkaus Yeluxalees ib yam nkaus li cov uas zov daim teb, vim nws tau fav xeeb rau kuv. (יחוח)Yahweh hais li no ntag. 18 Koj txojkev thiab tej uas koj ua los lawm coj tej no los raug koj. Tej no yog koj lub khuab thiab tej no iab kawg li thoob plaws rau hauv koj nruab siab. 19 Kuv lwj siab, kuv lwj siab kawg li. Kuv ntswj ib ce vim mob heev. Kuv lub siab, kuv lub siab ntshai nrov pig poog. Kuv nyob tsis tau twjywm, vim kuv hnov suab raj kub yaj thiab hnov lub suab txhib rog. 20 Kev puam tsuaj ib yam tag ib yam tuaj, lub tebchaws huvsi kuj raug muab tso tseg piam tag. Tib ntsais muag xwb kuv tej tsev ntaub puam tsuaj tag, tib pliag ntshis xwb tej ntaub vov tsev tsis muaj tag. 21 Kuv yuav tsa muag saib tus chij ua rog thiab mloog lub suab raj kub yaj ntev li cas? 22 Kuv haiv neeg ruam, lawv tsis paub kuv, lawv yog tej menyuam uas ruam kawg, lawv tsis to taub abtsi. Lawv txawj ua phem xwb, lawv tsis paub ua qhov zoo. 23 Kuv tsa muag saib rau lub ntiajteb, ua ciav raug muab tso tseg piam tag tsis muaj ib yam abtsi li, thiab saib rau lub ntuj kuj tsis muaj ib qho kaj li. 24 Kuv tsa muag saib rau tej roob, ua ciav tabtom ntseeg ua zog kais, thiab tej pov roob txhua lub kuj yoj mus yoj los. 25 Kuv tsa muag saib, ua ciav tsis muaj ib tug tibneeg li, thiab tej noog saum nruab ntug huvsi kuj ya khiav tag lawm. 26 Kuv tsa muag saib, ua ciav lub tebchaws uas zoo ua qoob loo twb ua ntuj nrag teb do lawm thiab txhua lub moos kuj pob ntsoog tag rau ntawm (יחוח)Yahweh lub xubntiag uas nws chim heev kawg. 27 (יחוח)Yahweh hais li no tias, lub tebchaws huvsi yuav raug nyob do cuas cia, tiamsis kuv yuav tsis muab ua puam tsuaj tag nrho. 28 Vim tej no lub ntiajteb yuav quaj ntsuag, thiab lub ntuj saud yuav tsaus nti, rau qhov kuv twb hais cia lawm, kuv twb hom cia lawm, kuv yuav tsis hloov dua siab thiab tsis thim rov qab. 29 Thaum hnov cov tub rog caij nees thiab cov uas txawj tua hneev lub suab, txhua lub moos kuj khiav tag, lawv khiav nkaum hauv tej hav zoov uas fab fab thiab nce tsiv nraim saum tej kem tsua. Txhua lub moos kuj raug muab tso tseg, tsis muaj ib tug tibneeg nyob hauv tej moos ntawd kiag li. 30 Tus uas nyob do cuas es, ua li cas koj hnav tej tsoos uas liab ploog thiab koj muab tej hlaws tej saw kub los coj thiab koj muab qhov muag khij ua txaij zees? Koj tseev zam ntxiag zoo nkauj do. Tej uas koj nyiam saib tsis taus koj, lawv xav txov koj txojsia. 31 Kuv hnov ib lub suab zoo yam li tus pojniam mob plab qw, yog ntsaj cuag nkaus li uas yug thawj tug menyuam, yog Xi‑oo tus ntxhais lub suab quaj uas yuav tu siav, tsa kiag nws txhais tes quaj hu hais tias, kuv raug txom nyem lauj! Kuv qaug zog ntshaus ntsho rau ntawm tus uas tua tibneeg lub xubntiag.