1 Yog tus txivneej twg nrauj nws tus pojniam lawm es tus pojniam twb khiav lawm thiab mus yuav dua ib tug txiv lawm, tus txiv qub tseem rov mus yuav nws thiab lov? Lub tebchaws yuav tsis qias puas tsuas thiab lov? Koj twb ua poj muag cev deev coob kawg li lawm, mas koj tseem yuav rov los cuag kuv thiab lov? (יחוח)Yahweh hais li no ntag. 2 Cia li tsa muag saib saum tej roob do hau thiab sim saib maj. Tshuav qhov chaw twg uas koj tsis tau nrog luag sib deev? Koj zaum ntawm tej ntug kev tos tej uas koj deev, zoo yam nkaus li cov tibneeg Alam hauv tebchaws moj sab qhua. Koj ua rau lub tebchaws qias puas tsuas rau qhov uas koj muag cev phem kawg li. 3 Vim li ntawd thiaj tsis tso nag los thiab cov nag hauv xyoo tu nrho tsis los, los koj tseem muaj plhus ntxiag zoo li tus poj muag cev plhu tuab, tsis paub txaj muag li. 4 Puam tab koj hu kuv hais tias, kuv txiv, koj yog kuv tus phoojywg ib txwm thaum hluas nkauj los. 5 Koj yuav chim mus ib txhis lov? Koj yuav npau taws mus txog thaum kawg li lov? Saib maj, koj twb hais li ntawd lawm, tiamsis koj tseem ua txhua yam kev phem npaum li uas koj ua tau.

Hais Kom Ixayees Thiab Yahdah Ntxeev Dua Siab

6 Thaum Yauxiyas ua vajntxwv (יחוח)Yahweh hais rau kuv tias, koj puas pom tej uas Ixayees tau ua, yog tus uas tso kuv tseg? Nws nce mus muag cev rau saum txhua lub roob siab thiab hauv txhua tsob qab ntoo ntsuab. 7 Kuv xav tias thaum nws mus ua tej ntawd huvsi tag lawm nws yuav tig rov los cuag kuv. Tiamsis nws kuj tsis tig rov los, mas tus niam hluas Yahdah uas fav xeeb kuj pom. 8 Nws pom tias twb yog vim Ixayees tso kuv tseg mus ua poj muag cev kuv thiaj ua ntawv muab nws nrauj thiab muab ntiab khiav mus, los nws tus niam hluas Yahdah uas fav xeeb tsis ntshai, nws tseem mus ua poj muag cev thiab. 9 Vim nws pom tias qhov uas muag cev yog ib qho me me xwb, nws thiaj ua qias puas tsuas lub tebchaws, es mus deev tej pob zeb thiab tej ntoo. 10 Txawm yog muaj li no los nws tus niam hluas Yahdah uas fav xeeb tseem tsis tig rov los cuag kuv kawg siab kawg ntsws, nws ua txuj tig rov los xwb. (יחוח)Yahweh hais li no ntag. 11 Mas (יחוח)Yahweh hais rau kuv tias, Ixayees uas tso kuv tseg tseem txhaum me dua li Yahdah uas fav xeeb. 12 Cia li mus tshaj tawm cov lus no rau yav tebchaws ped hais tias, (יחוח)Yahweh hais tias, Ixayees uas tso kuv tseg lawm es, koj cia li rov qab los. Kuv yuav tsis saib koj ua chim tsawv, rau qhov kuv yog tus uas khuvleej. (יחוח)Yahweh hais li no ntag. Kuv yuav tsis chim mus ib txhis. 13 Tsuav yog koj lees koj tej kev txhaum tias koj tau fav xeeb rau (יחוח)Yahweh uas yog koj Tus Tswv thiab tau mus nrog lwm haiv neeg tej dab ua plees ua yig rau hauv txhua tsob qab ntoo ntsuab, (יחוח)Yahweh hais li no ntag. 14 (יחוח)Yahweh hais tias, cov menyuam uas tso kuv tseg es, cia li rov qab los, rau qhov kuv yog nej Tus Tswv, kuv yuav txais nej ib lub moos ib leeg, ib lub xeem ob leeg, thiab kuv yuav coj nej mus txog Xi‑oo. 15 Thiab kuv yuav pub cov yug yaj uas haum kuv lub siab rau nej, lawv yuav muaj tswvyim muaj kev paub txawj yug nej. 16(יחוח)Yahweh hais tias, thaum nej huaj vam coob coob rau hauv lub tebchaws, lub sijhawm ntawd lawv yuav tsis hais dua tias, (יחוח)Yahweh lub phij xab sib cog lus. Lawv lub siab yuav tsis xav txog thiab lawv yuav tsis hais txog thiab yuav tsis nco txog, thiab lawv yuav tsis ua dua ib lub tshiab lawm. 17 Thaum ntawd yuav hu lub nroog Yeluxalees tias yog (יחוח)Yahweh lub zwm txwv, thiab ib tsoom tebchaws sawv-daws yuav sau tuaj cuag (יחוח)Yahweh lub xubntiag rau hauv Yeluxalees, thiab lawv yuav tsis tawv ncauj ua raws li lawv lub siab phem dua li lawm. 18 Lub sijhawm ntawd Yahdah caj ces yuav los koom nrog Ixayees caj ces, thiab lawv yuav ua ke tawm lub tebchaws sab ped los rau lub tebchaws uas kuv muab pub ua qub txeeg qub teg rau nej tej poj koob yawm txwv lawm. 19 Kuv xav txog qhov uas kuv yuav ua li cas tsa tau nej rau hauv kuv cov tub thiab muab lub tebchaws uas zoo rau nej, yog lub tebchaws uas zoo nkauj tshaj lwm lub tebchaws huvsi, ua qub txeeg qub teg rau nej. Thiab kuv xav tias nej yuav hu kuv tias, kuv leej txiv, thiab nej yuav tsis tig hlo tso kuv tseg. 20 Ixayees caj ces es, kuv hais tseeb, tus pojniam ua nkauj fa tso nws tus txiv tseg li cas, nej tau fav xeeb rau kuv ib yam li ntawd. (יחוח)Yahweh hais li no ntag. 21 Muaj suab nrov saum tej roob do hau, twb yog Ixayees tej tub lub suab quaj qw thov, vim yog lawv tau muab lawv txoj kevcai ntxeev lawm, lawv tsis nco qab (יחוח)Yahweh uas yog lawv Tus Tswv.

22 Kuv cov tub uas tso kuv tseg es, cia li rov qab los lauj. Kuv yuav kho qhov uas nej tso kuv tseg kom zoo. Saib maj, peb tabtom los cuag koj, vim koj yog (יחוח)Yahweh uas yog peb Tus Tswv. 23 Muaj tseeb tiag tej pov roob yeej yog kev dag ntxias thiab qhov uas muaj kev qaug dej qaug cawv ua nqaj ua nqug saum tej roob kuj yog dag ntxias xwb. Qhov tseeb Ixayees txojkev cawm dim yeej yog nyob hauv (יחוח)Yahweh uas yog peb Tus Tswv.

24 Txij thaum peb tseem yau los, tej uas rhuav ntsej muag ntawd tau noj nqos txhua yam uas peb tej poj koob yawm txwv tau nqes dag nqes zog ua cia lawm, yog lawv tej pab yaj tej pab nyuj, lawv tej tub tej ntxhais huvsi. 25 Cia peb pw tsau tsawv hauv peb tej kev txaj muag thiab cia txojkev poob ntsej muag npog kiag peb, vim peb tau ua txhaum muaj txim rau (יחוח)Yahweh uas yog peb Tus Tswv, tsis hais peb thiab peb tej poj koob yawm txwv, txij thaum peb yau los txog hnub no, thiab peb tsis mloog (יחוח)Yahweh uas yog peb Tus Tswv lub suab.