(יחוח)Yahweh Hu Cov Ixayees Rov Los Cuag Nws 

1 (יחוח)Yahweh hais lus tuaj rau kuv tias, 2 cia li mus tshaj tawm rau hauv Yeluxa-lees lub qhov ntsej tias, (יחוח)Yahweh hais li no tias, kuv nco ntsoov qhov uas thaum koj tseem hluas nkauj koj xib rau kuv, thaum koj ua nkauj nyab koj nyiam kuv, koj raws kuv qab hauv tebchaws moj sab qhua los, yog lub tebchaws uas tsis tau cog ib yam qoob loo kiag li. 3 Ixayees dawb huv rau (יחוח)Yahweh, yog thawj phaum qoob loo uas (יחוח)Yahweh sau los. Txhua tus uas noj tej qoob ntawd kuj txhaum, xwm txheej phem thiaj los raug lawv. (יחוח)Yahweh hais li no ntag. 4 Yakhauj caj ces es, thiab Ixayees caj ces tej cum sawv-daws es, cia li tig ntsej mloog (יחוח)Yahweh tej lus. 5 (יחוח)Yahweh hais li no tias, nej tej poj koob yawm txwv pom kuv ua txhaum qhov twg lawv thiaj khiav deb ntawm kuv, thiab mus raws kua tej uas tsis tsim txiaj lawv thiaj ua tau tibneeg tsis tsim txiaj? 6 Lawv tsis tau hais tias, (יחוח)Yahweh nyob qhovtwg? Nws yog tus uas coj peb tawm hauv Iziv tebchaws los, thiab coj peb los hauv tebchaws moj sab qhua uas yog ntuj nrag teb do thiab muaj qhov taub, yog lub tebchaws tsis muaj dej haus tsuas yog tsaus ntuj nti, yog lub tebchaws uas tsis muaj leejtwg hla mus thiab tsis muaj tibneeg nyob hauv.

7 Kuv coj nej los rau hauv ib lub tebchaws uas zoo qoob xwv thiaj tau noj tej txiv ntoo thiab tej yam zoo zoo. Tiamsis thaum nej los rau hauv lawd nej ua qias puas tsuas kuv lub tebchaws, thiab ua rau kuv tej qub txeeg qub teg qias vuab tsuab. 8 Cov pov thawj tsis tau hais tias, (יחוח)Yahweh nyob qhovtwg? Cov uas qhia kuv tej kevcai twb tsis paub kuv, cov uas ua thawj kuj fav xeeb rau kuv. Cov uas cev kuv lus kuj tuav Npa‑as lub npe cev lus, thiab raws kua tej uas tsis muaj qabhau.

9 (יחוח)Yahweh hais tias, vim li no kuv tseem nrog nej ua plaub, thiab kuv yuav nrog nej tej tub ki ua plaub. 10 Cia li mus kom txog ntug Khithi mus saib, lossis txib tibneeg mus txog tebchaws Khedas ua tib zoo tshuaj saib, saib txeev muaj tej uas zoo li no los tsis muaj. 11 Muaj haiv neeg twg txeev pauv tej dab uas lawv teev, txawm yog tej dab ntawd twb tsis yog timtswv tiag? Tiamsis kuv haiv neeg muab (יחוח)Yahweh uas yog lawv lub koob meej pauv yam uas tsis muaj qabhau kiag li.

12 (יחוח)Yahweh hais tias, lub ntuj es, cia li poob siab nthav rau tej no, cia li ceeb nkaus, thiab cia li ua siab puas tag, 13 rau qhov kuv haiv neeg ua ob yam phem, lawv tso kuv uas yog lub qhov dej txhawv pub txojsia tseg, lawv khawb qhov zeb cug dej rau lawv, yog tej qhov dej tawg uas cug tsis tau dej. 14 Ixayees yog ib tug qhev lov? Nws yog ib tug qhev uas yug los hauv tsev lov? Ua cas nws yuav ua qauv rau luag noj? 15 Tej tsov ntxhuav nyooj laws rau nws, nyooj ua suab nrov heev. Lawv tau ua rau nws lub tebchaws raug muab tso tseg piam tag, nws tej moos pob tag tsis muaj tibneeg nyob hauv. 16 Dua li ntawd cov tibneeg hauv lub moos Meefis thiab cov hauv lub moos Thapahes, tsoo koj tiaj taubhau lawm. 17 Koj coj tej xwm txheej no los raug koj xwb los sav, vim koj tso (יחוח)Yahweh uas yog koj Tus Tswv tseg, rau thaum nws coj koj taug kev. 18 Nimno qhov uas koj mus rau nram Iziv tebchaws mus haus tus dej Nais koj yuav tau abtsi? Lossis qhov uas koj mus rau Axlias tebchaws mus haus tus dej Yufetis koj yuav tau abtsi? 19 Tej uas koj ua limhiam yuav txiav txim rau koj, qhov uas koj tso kuv tseg yuav cem koj. Koj cia li paub thiab pom tias qhov uas koj tso (יחוח)Yahweh uas yog koj Tus Tswv tseg yog ib qho kev phem thiab kev lwj siab. Tsis muaj qhov uas hwm thiab paub ntshai kuv nyob hauv koj kiag li. (יחוח)Yahweh uas muaj hwjchim loj kawg nkaus hais li no ntag. 20 Ntev los lawm koj muab koj tus quab lov thiab muab tej saw hlau uas khi koj tu nrho, thiab koj hais tias, kuv yuav tsis ua num rau koj lawm. Koj tau qhau cev hlo yam li tus poj muag cev rau saum txhua lub ncov roob siab thiab hauv txhua tsob qab ntoo ntsuab.

21 Thaum kuv cog koj, koj yog tsob tseem txiv hmab zoo. Mas ua cas koj yuav phem txia ua tsob txiv hmab qus? 22 Txawm yog koj muab kua tshuaj ntau ntau los ntxuav koj lub cev los kuv tseem pom qhov uas lub txim tsuas koj lub cev. (יחוח)Yahweh hais li no ntag. 23 Koj yuav hais tau li cas tias, kuv tsis qias puas tsuas, kuv tsis raws kua tej dab Npa‑as? Cia li saib tej uas koj ua hauv lub hav maj, cia li xav saib koj ua abtsi lawm. Koj ua ib tug xyuas ntxhuav uas khiav mus khiav los nyob tsis tus li. 24 Koj ua tus maum nees luav qus uas txeev nyob hauv tebchaws moj sab qhua, nws hnia ntxhiab rau thaum nws xav tshov heev. Leejtwg yuav tswj tau qhov uas nws xav ntawd? Cov uas tuaj nrhiav nws yuav tsis khwv li, txog lub caij tshov yeej yuav ntsib nws. 25 Nej ceev faj tsis txhob khiav mus txog thaum nej khau ntuag tag, thiab ceev faj nej lub caj pas tsis txhob cia qhuav. Tiamsis nej hais tias, tag kev vam lawm, rau qhov kuv nyiam luag tej dab, thiab kuv yeej yuav raws kua mus. 26 Thaum tub sab raug ntes nws txaj muag li cas, Ixayees caj ces yuav txaj muag ib yam li ntawd, tsis hais lawv thiab lawv tej vajntxwv, thiab lawv cov thawj, thiab lawv cov pov thawj thiab lawv cov xibhwb cev kuv lus. 27 Lawv hais rau ib tsob ntoo tias, koj yog kuv txiv, thiab hais rau ib lub pob zeb tias, koj yug kuv los. Lawv tig nrob qaum rau kuv tsis tig xubntiag los, los thaum raug kev txom nyem ceeblaj lawv hais tias, thov cia li sawv tsees thiab cawm peb dim.

28 Tej dab mlom uas nej txua rau nej dua twg lawm? Yog tej dab mlom ntawd pab tau nej dim, kuj cia lawv sawv tsees rau thaum nej raug kev txom nyem ceeblaj. Yahdah es, koj tej dab mlom muaj ntau npaum nkaus li koj tej moos. 29 (יחוח)Yahweh hais tias, Ua cas nej yuav yws yws kuv? Nej txhua tus twb fav xeeb rau kuv tag huvsi lawm. 30 Kuv twb nplawm nej tej menyuam do do xwb, nplawm tag los lawv tsis ua zoo tuaj. Nej muab hniav ntaj tua nej cov xibhwb uas cev kuv lus ntag, zoo yam nkaus li tus tsov ntxhuav uas nyaum kawg. 31 Nej tiam no es, nej cia li mloog (יחוח)Yahweh tej lus. Kuv yog tebchaws moj sab qhua rau cov Ixayees lov, lossis yog lub tebchaws uas tsaus ntuj nti lov? Ua cas kuv haiv neeg yuav hais tias, peb nyob ywj pheej, peb yuav tsis tuaj cuag koj dua li lawm? nws tej npauj tej saw tau lov, lossis tus nkauj nyab tsis nco qab cev tsoos ua tshoob tau thiab lov? Tiamsis kuv haiv neeg tsis nco qab kuv ntev los suav tsis tag lawm. 33 Nej txawj txawj nrhiav tej uas nej nyiam heev kawg li! Nej tseem qhia nej tej kev rau cov pojniam phem.

34 Twb pom tej tibneeg pluag uas tsis txhaum tej ntshav lo nej lub tw tsho, txawm yog nej tsis pom lawv tho qhov tsev los kuj xij. Txawm yog muaj tej ntawd 35 los nej tseem hais tias, kuv tsis tau ua txhaum kiag li, nyaj (יחוח)Yahweh tsis chim rau kuv lawm. Saib maj, kuv yuav coj nej mus txiav txim vim yog nej hais tias, kuv tsis tau ua txhaum. 36 Nej lam mus mus los los xwb, pheej ntxeev siab rau yam ub yam no. Iziv yuav ua rau nej raug txaj muag ib yam li Axlias ua rau nej raug txaj muag lawd. 37 Nej yuav muab tes npuab rau saum taubhau tawm qhov ntawd los. Vim (יחוח)Yahweh twb muab tej tibneeg uas nej tso siab ntawd tso tseg lawm, nej yuav tsis tau kev pab ntawm lawv kiag li.