Yahdah Kev Txhaum Txim

1 Yahdah lub txim yog muab tus cwjmem hlau sau cia, yog muab cwjmem uas lub hauv yog qe zeb hlaws iav txaug cia rau hauv lawv lub siab thiab sau rau tej kub ntawm lawv lub thaj xyeem. 2 Lawv tej tub ki kuj nco txog lawv tej thaj teev dab thiab lawv tej ncej dab Aselas uas nyob ntawm txhua tsob ntoo ntsuab thiab saum tej pov roob siab, 3 thiab saum tej roob tom tej plawv tiaj. Kuv yuav muab koj tej nyiaj txiag cuab txhiaj cuab tam rau luag txeeb mus, ua nqe pauj tej kev txhaum uas koj ua thoob koj lub tebchaws. 4 Koj yuav tsum tso koj txhais tes uas tuav tej qub txeeg qub teg uas kuv muab rau koj, thiab kuv yuav ua kom koj ua koj tej yeeb ncuab qhev rau hauv lub tebchaws uas koj tsis tau paub dua, vim yog kuv chim kuv thiaj zes taws kom kub mus ib txhis li.

5 (יחוח)Yahweh hais li no tias, tus uas tso siab rau tibneeg thiab cia nqaij tawv ua nws lub zog, thiab nws lub siab tig ntawm (יחוח)Yahweh lawm, nws yog tus uas raug tsawm foom. 6 Nws zoo li tsob nyuag ntoo uas nyob hauv ntuj nrag teb do, tsis pom ib qho zoo los txog nws li. Nws yuav nyob tej chaw qhuav nkig nkuav hauv tebchaws moj sab qhua, yog tebchaws daw ntsev uas tsis muaj tibneeg nyob. 7 Tus uas tso siab rau (יחוח)Yahweh yeej tau nyob kaj siab lug, yog tus uas nws txojkev tso siab nyob rawv hauv (יחוח)Yahweh. 8 Nws zoo ib yam li tsob ntoo uas cog ntawm ntug dej, nws tej cag saib taug ntug dej, thaum tshav ntuj kub tuaj nws kuj tsis ntshai, vim tej nplooj ntsuab tsaus nti mus li, thiab nws tsis txhawj txog tej xyoo uas ntuj qhuav, thiab txi txiv tsis tu ncua li. 9 Lub siab yog tus uas dag ntxias heev dua lwm yam huvsi, thiab phem kawg li. Leejtwg yuav paub tau tibneeg lub siab? 10 Kuv yog (יחוח)Yahweh uas tshuaj saib tej uas tibneeg xav thiab sim lub siab, kom thiaj pub rau txhua tus raws li uas lawv xyaum ua lawv lub neej thiab pub raws li tej uas lawv ua. 11 Yam nkaus li tus ws uas sau tej menyuam uas tsis yog nws puag qe daug, tus tibneeg nplua nuj uas tau los ntawm tej kev ua tsis ncaj kuj zoo ib yam li ntawd. Thaum nws txog ib nrab neej tej nyiaj txiag yuav tso nws tseg mas thaum kawg nws yog ib tug ruam xwb. 12 Peb lub chaw pe hawm (יחוח)Yahweh yog lub zwm txwv ci ntsa iab uas tsim rau saum lub chaw siab thaum chiv keeb los lawm. 13 Au (יחוח)Yahweh, tus uas yog cov Ixayees lub chaw vam, txhua tus uas tso koj tseg yuav raug txaj muag, cov uas tig ntawm koj mus lawm lawv lub npe yuav raug muab sau rau hauv av, rau qhov lawv tau muab (יחוח)Yahweh uas yog lub qhov dej txhawv pub txojsia tso tseg. 14 Au (יחוח)Yahweh, thov kho kuv, kuv tej mob thiaj li zoo, thov cawm kuv, kuv thiaj li dim, vim koj yog tus uas kuv qhuas. 15 Saib maj, lawv hais rau kuv tias, (יחוח)Yahweh tej lus nyob qhovtwg? Cia muaj raws li nws hais los maj. 16 Kuv tsis tau txhib kom koj tso xwm txheej phem los, thiab kuv tsis xav tau hnub uas raug kev puam tsuaj, koj yeej paub lawm. Tej uas tawm hauv kuv lub qhov ncauj los kuj nyob tab meeg ntawm koj lub xubntiag. 17 Thov tsis txhob ua rau kuv ntshai ceeb nkaus, koj yog kuv lub chaw cawm siav rau hnub uas tej xwm txheej phem los. 18 Cov uas tsim txom kuv cia lawv raug kev txaj muag, tiamsis thov tsis txhob cia kuv raug kev txaj muag. Thov cia lawv poob siab nthav, tiamsis tsis txhob cia kuv poob siab nthav. Thov tso hnub uas muaj xwm txheej phem los raug lawv, thov muab kev puam tsuaj tsav kev puam tsuaj los rau lawv.

Yuav Hwm Hnub Sabbath

19 (יחוח)Yahweh hais li no rau kuv tias, cia li mus sawv ntawm lub Rooj Loog Pejxeem uas Yahdah cov vajntxwv nkag los thiab tawm mus, thiab sawv ntawm txhua lub rooj loog hauv Yeluxalees, 20 mas hais tias, Yahdah cov vajntxwv thiab cov tibneeg Yahdah sawvdaws thiab cov tibneeg hauv Yeluxalees sawvdaws uas nkag tej rooj loog no, nej cia li mloog (יחוח)Yahweh tej lus.

21 (יחוח)Yahweh hais li no tias, yog nej xam pom nej txojsia, tsis txhob ris lub nra abtsi rau hnub Sabbath lossis coj nkag Yeluxalees tej rooj loog rau hauv.

22 Tsis txhob ris lub nra abtsi tawm hauv nej lub tsev lossis ua ib yam haujlwm abtsi rau hnub Sabbath, tiamsis nej yuav tsum hwm hnub Sabbath ua hnub uas dawb huv raws li kuv tau hais rau nej tej poj koob yawm txwv lawm. 23 Txawm li ntawd los lawv tsis mloog thiab tsis tig ntsej mloog, lawv tawv ncauj thiaj tsis hnov lus thiab tsis yuav tej lus qhuab qhia. 24 (יחוח)Yahweh hais tias, yog nej mloog kuv lus thiab tsis txhob coj ib yam abtsi nkag tej rooj loog no los rau hnub Sabbath, thiab hwm hnub Sabbath ua hnub uas dawb huv, thiab tsis txhob ua ib yam haujlwm abtsi li rau hnub ntawd, 25 mas yuav muaj vajntxwv uas nyob saum Daviv lub zwm txwv thiab lawv cov thawj caij tsheb ua rog thiab caij nees nkag tej rooj loog nkag rau hauv lub nroog no, yog tej vajntxwv thiab lawv cov thawj thiab cov Yahdah thiab cov uas nyob hauv Yeluxalees yuav nkag rau hauv. Mas yuav muaj tibneeg nyob rau hauv lub nroog no ib txhis tsis kawg.

26 Mas tej pejxeem yuav tuaj hauv Yahdah tej moos thiab hauv tej chaw uas nyob ib ncig Yeluxalees, thiab hauv Npeeyamee‎s tebchaws, thiab hauv tej pov roob Sefela‎s thiab tuaj pem tej roob siab thiab nram Neke‎s tuaj. Lawv yuav coj qhov txhia chaw uas hlawv xyeem thiab tej uas muab tua xyeem, thiab tej qoob loo uas xyeem, thiab tej roj ntoos tsw qab tuaj rau ntawm (יחוח)Yahweh lub tuam tsev. 27 Tiamsis yog nej tsis mloog kuv lus es hwm hnub Sabbath ua hnub uas dawb huv thiab tseg qhov uas ris nra nkag tej rooj loog los rau hauv Yeluxalees rau hnub Sabbath, ces kuv yuav zes taws rau ntawm tej rooj loog mas hluavtaws yuav kub tej vajntxwv tej vaj tse hauv Yeluxalees tag, tua tsis tau li.