Tus Kws Puab Laujkaub Av

1 (יחוח)Yahweh hais lus tuaj rau Yere-myah‎ tias, 2 Cia li sawv tsees mus rau ntawm tus Kws puab laujkaub av lub tsev, kuv yuav hais lus rau koj mloog qhov ntawd. 3 Kuv txawm nqes mus rau ntawm tus Kws puab laujkaub av lub tsev, nws tabtom ua haujlwm ntawm lub tshuab puab laujkaub. 4 Mas lub laujkaub av uas nws tabtom puab ntawd txawm piam rau hauv tus Kws puab laujkaub txhais tes, nws txawm muab puab dua ib lub raws li nws pom zoo ua.

 5 Ces (יחוח)Yahweh hais lus tuaj rau kuv tias, 6 Cov Ixayees es, kuv yuav ua rau nej ib yam li tus Kws laujkaub no ua tsis tau lov? (יחוח)Yahweh hais li no ntag. Cov Ixayees es, saib maj, nej nyob hauv kuv txhais tes yam nkaus li cov av nplaum nyob hauv tus Kws puab laujkaub txhais tes. 7 Thaum twg kuj xij kuv tshaj tawm txog haiv neeg twg lossis lub tebchaws twg hais tias kuv yuav muab dob thiab muab rhuav tshem thiab ua kom puam tsuaj, 8 yog tias haiv neeg uas kuv tau hais txog ntawd tig ntawm lawv txojkev phem, kuv kuj yuav hloov siab tsis ua tej xwm txheej phem uas kuv twb txiav txim siab yuav ua rau lawv.

9 Thiab thaum twg kuj xij kuv tshaj tawm txog haiv neeg twg lossis lub tebchaws twg hais tias kuv yuav tsim tsa thiab muab cog cia, 10 yog tias haiv neeg ntawd ua tej uas kuv pom tias phem kawg tsis mloog kuv tej lus, kuv kuj yuav hloov siab tsis ua qhov zoo uas kuv txiav txim siab yuav ua rau lawv. 11 Vim li no, koj cia li hais rau cov Yahdah thiab cov uas nyob hauv Yeluxalees tias,(יחוח)Yahweh hais li no tias, saib maj, kuv tabtom npaj xwm txheej phem rau nej thiab ntaus ib txoj tswvyim tawm tsam nej. Nej txhua tus cia li tig ntawm nej txojkev phem rov los, cia li kho dua nej lub neej thiab tej uas nej ua huvsi. 12 Tiamsis lawv hais tias, tsis muaj qabhau. Peb yuav ua raws li uas npaj tseg thiab peb txhua tus nyias taus nyias yuav tawv ncauj ua raws li nws lub siab phem.

13 Vim li ntawd (יחוח)Yahweh hais li no tias, cia li mus nug thoob plaws ib tsoom tebchaws saib leejtwg txeev tau hnov tej yam li no. Ixayees uas yog tus nkauj dawb huv tau ua yam uas txaus ntxub kawg. 14 Tej daus xib daus npu saum lub roob Lenpanoos yuav ploj ntawm tej pob tsuas Xili‑oo lov? Tej dej saum roob yuav qhuav lov yog tej hav dej txiag uas ntws los? 15 Tiamsis kuv haiv neeg tsis nco qab kuv lawm, lawv hlawv hmoov xyab xyeem rau tej dab. Lawv dawm txojkev uas lawv taug, yog txoj qub kev thaum ub, lawv taug tej kev me, tsis taug txoj niag kev loj, 16 ua rau lawv lub tebchaws ua chaw ceeb thiab ntshai, ua lub chaw rau luag thuam mus ib txhis. Txhua tus uas hla mus yuav ceeb thiab ntshai thiab co hau nto. 17 Kuv yuav ua kom lawv tawg ri sua mus ntawm lawv cov yeeb ncuab hauv ntej yam li raug cua ntsawj sab hnub tuaj. Hnub uas lawv raug xwm txheej phem ntawd kuv yuav tig nrob qaum rau lawv tsis tig xubntiag.

​

Cov Pejxeem Ntaus Tswvyim Ua Phem Rau Yeremyah‎

18 Lawv txawm hais tias, peb cia li ntaus tswvyim txov Yeremyah‎, rau qhov txoj kevcai yuav tsis ploj ntawm cov pov thawj, thiab tej lus sablaj yuav tsis ploj ntawm cov tibneeg txawj ntse, thiab (יחוח)Yahweh tej lus yuav tsis tu ntawm cov xibhwb cev lus. Peb cia li xuas nplaig tawm tsam nws, tsis txhob quav ntsej mloog nws tej lus ib los li.

19 Au (יחוח)Yahweh, thov mloog kuv thiab tig ntsej mloog kuv cov yeeb ncuab tej lus. 20 Tsim nyog ua kev phem pauj kev zoo lov? Lawv kuj tseem khawb qhov taub txov kuv txojsia. Thov nco txog tias kuv sawv ntsug rau ntawm koj xubntiag pab lawv thov thiab thov koj thim koj txojkev npau taws ntawm lawv. 21 Vim li no thov koj muab lawv tej menyuam cob rau kev tshaib nqhis, thiab muab lawv cob rau hniav ntaj hniav riam lub hwjchim. Thov cia lawv tej pojniam tsis muaj menyuam thiab ua poj ntsuam. Thov cia cov txivneej raug mob kis tuag tag, cia cov tub hluas raug hniav ntaj tuag tag rau hauv tshav rog.

22 Thov cia hnov lub suab quaj qw hauv lawv tej tsev rau thaum koj coj tub rog tuaj lws lawv tamsid, rau qhov lawv tau khawb qhov taub cuab kuv, thiab ua rooj hlua cuab kuv kotaw.

23 Au (יחוח)Yahweh, koj yeej paub txhua yam uas lawv ntaus tswvyim yuav tua kuv pov tseg. Thov tsis txhob zam lawv tej kev txhaum lossis ntxuav lawv lub txim ntawm koj lub qhov muag mus. Thov muab lawv laim tseg rau ntawm koj xubntiag, cia li rhuav tshem lawv rau thaum koj tseem chim.