Tus Pov Thawj Pasaws Raug Foom Tsis Zoo 

1 Thaum tus pov thawj Pasaws uas yog Imaws uas ua thawj saib xyuas haujlwm hauv (יחוח)Yahweh lub tuam tsev tus tub hnov Yeremyah‎ cev (יחוח)Yahweh tej lus no, 2 Pasaws cia li ntaus Yeremyah‎ uas yog xibhwb cev (יחוח)Yahweh lus thiab muab nws kotaw cuab rau hauv rab cuab ntawm lub rooj loog Npeeyamee‎s uas yog lub sab ped uas mus rau hauv (יחוח)Yahweh lub tuam tsev. 3 Tagkis tom qab thaum Pasaws muab Yeremyah‎ tso dim hauv rab cuab, Yeremyah‎ hais rau nws tias, (יחוח)Yahweh tsis hu koj lub npe ua Pasaws, tiamsis hu tias ntshai kawg rau txha fab. 4 Rau qhov (יחוח)Yahweh hais li no tias, saib maj, kuv yuav ua rau koj rov ua kev ntshai kawg rau koj thiab koj tej phoojywg sawvdaws. Lawv yuav raug lawv tej yeeb ncuab hniav ntaj hniav riam tuag tag rau koj saib ntsoov. Thiab kuv yuav muab Yahdah huvsi rau hauv Npanpiloos tus vajntxwv txhais tes, nws yuav muab lawv ntes coj mus rau Npanpiloos thiab xuas ntaj tua lawv pov tseg. 5 Tsis tag li ntawd xwb, kuv yuav muab lub nroog no tej nyiaj txiag qhov txhia chaw huvsi, thiab tej cuab txhiaj cuab tam uas muaj nqes huvsi thiab muab Yahdah tej vajntxwv tej nyiaj txiag cuab txhiaj cuab tam rau hauv lawv cov yeeb ncuab txhais tes mas lawv yuav lws thiab txeeb kiag coj mus rau Npanpiloos.

6 Pasaws, koj tus kheej thiab txhua tus uas nrog koj nyob ua ib tse yuav raug ntes coj mus. Koj yuav tau mus txog Npanpiloos thiab koj yuav tuag thiab muab faus rau qhov ntawd, koj thiab koj tej phoojywg sawvdaws uas koj pheej ua cuav cev (יחוח)Yahweh tej lus ib yam nkaus.

​

Yeremyah‎ Tej Lus Yws

7 Au (יחוח)Yahweh, koj tau dag kuv, thiab kuv raug kev dag ntxias. Koj muaj zog heev dhau kuv thiab koj kov yeej. Kuv ua lub chaw uas lawv luag ib hnub tsaus ntuj. Sawvdaws thuam luag kuv.

8 Kuv hais lus thaum twg, kuv yuav quaj qw, kuv qw nrov nrov hais tias, kev ua nruj ua tsiv thiab kev puam tsuaj. (יחוח)Yahweh tej lus ua rau kuv raug thuam raug saib tsis taus tas hnub tas hmo. 9 Yog kuv hais tias, kuv yuav tsis hais txog (יחוח)Yahweh thiab tsis hais nws lub npe dua li lawm, txawm muaj ib yam hauv kuv lub siab zoo yam nkaus li hluavtaws hlawv kub lug rau hauv kuv tej pob txha, kuv thiaj tsaug leeg rau qhov uas yuav tswj cia, thiab kuv tswj cia tsis taus lawm. 10 Kuv hnov tibneeg coob kawg sib ntxhi tias, Muaj kev ntshai kawg rau txhua fab. Cia li iab hiam nws, cia peb iab hiam nws. Kuv cov phoojywg sawvdaws tseem tos nrhw saib kuv ntog thiab hais tias, tej zaum nws yuav raug luag dag tau, ces peb yuav kov yeej nws thiab ua pauj rau nws. 11 Tiamsis (יחוח)Yahweh nrog nraim kuv yam li tus tub rog uas txaus ntshai kawg, vim li no cov uas tsim txom kuv yuav dawm, lawv yuav kov tsis yeej kuv. Lawv yuav raug txaj muag heev, vim yog lawv ua tsis tiav. Qhov uas lawv poob ntsej muag mus ib txhis ntawd, yuav tsis muaj hnub uas tsis nco qab li. 12 Au (יחוח)Yahweh uas muaj hwj-chim loj kawg nkaus, koj yog tus uas sim tus tibneeg ncaj ncees, yog tus uas pom ntsoov tibneeg lub siab thiab tej uas lawv xav. Thov cia kuv pom tej uas koj ua pauj rau lawv, rau qhov kuv twb muab kuv tshaj plaub cob rau koj lawm. 13 Cia li hu nkauj rau (יחוח)Yahweh. Cia li qhuas (יחוח)Yahweh, rau qhov nws cawm tus uas txom nyem txojsia kom dim hauv cov uas ua phem txhais tes. 14 Cia hnub uas yug kuv raug foom tsis zoo. Cia hnub uas kuv niam yug kuv tsis txhob tau hmoov zoo. 15 Cia li foom tsis zoo rau tus uas xa xov rau kuv txiv hais tias, koj tau ib tug tub lawm, ua rau kuv txiv zoo siab heev.

16 Thov cia tus ntawd zoo yam nkaus li tej moos uas (יחוח)Yahweh muab rhuav puam tsuaj tag tsis khuvleej li. Thov cia nws hnov lub suab quaj thaum tagkis thiab hnov lub suab txhib tub rog thaum tav su, 17 rau qhov nws tsis muab kuv tua thaum nruab thiab, kuv niam thiaj ua kuv lub qhov ntxa thiab nws lub plab menyuam thiaj li loj ib txhis. 18 Ua cas kuv tawm hauv plab los, los pom kev txom nyem kev nyuaj siab thiab kuv lub caij nyoog nkim tag rau txojkev txaj muag xwb?