Yeluxalees Yuav Puam Tsuaj

1 No yog tej lus uas (יחוח)Yahweh hais tuaj rau Yeremyah‎, yog thaum vajntxwv Xedekhiya‎s txib Makhias tus tub Pasaws thiab Ma‑axeyas tus tub Xefaniyas uas ua pov thawj mus cuag Yeremyah‎, hais tias, 2 cia li thov nug (יחוח)Yahweh rau peb, vim Nenpukhanexas uas ua vajntxwv hauv Npanpiloos tabtom ua rog rau peb. Tej zaum (יחוח)Yahweh yuav ua nws tej haujlwm phimhwj huvsi pab peb raws li yav thaum ub thiab yuav ua rau Nenpukhanexas thim tub rog ntawm peb rov qab. 3 Mas Yeremyah‎ hais rau ob tug tias, 4 Neb cia li hais li no rau Xedekhiya‎s tias, (יחוח)Yahweh, uas yog Ixayees Tus Tswv, hais li no tias, saib maj, kuv yuav ua rau tej cuab yeej ua rog hauv nej txhais tes tig rov los raug nej, yog tej uas nej siv tawm tsam Npanpiloos tus vajntxwv thiab cov Kheedias uas vij nkaus nej lub ntsa loog. Thiab kuv yuav sau zog lawv tuaj rau hauv nruab nrab lub nroog no. 5 Yog kuv ua rog rau nej ntag. Kuv yuav tsa hlo kuv txhais tes thiab siv kuv txhais npab uas muaj zog ntaus nej npau taws vog thiab chim heev thiab npau taws ceev. 6 Thiab kuv yuav ntaus cov uas nyob hauv lub nroog no, tsis hais tibneeg thiab tsiaj txhu huvsi, mas yuav muaj mob kis loj tuag tag.

7 (יחוח)Yahweh hais tias, tom qab ntawd kuv yuav muab Yahdah tus vajntxwv Xedekhiya‎s thiab nws cov tub teg tub taws thiab cov tibneeg hauv lub nroog no uas tsis tuag mob kis thiab hniav ntaj thiab kev tshaib nqhis, cob rau hauv vajntxwv Nenpukhanexas hauv Npanpiloos txhais tes thiab rau hauv lawv cov yeeb ncuab txhais tes, yog muab rau hauv cov uas txov lawv txojsia txhais tes. Mas Nenpukhanexas yuav xuas ntaj tua lawv, nws yuav tsis khuvleej lawv, tsis tseg ib tug siav li, tsis tab ncuab lawv kiag li. 8 Thiab koj yuav hais rau cov pejxeem tias, (יחוח)Yahweh hais li no tias, saib maj, kuv muab txojkev ciaj thiab txojkev tuag txawb rau ntawm nej xubntiag. 9 Tus uas nyob hauv lub nroog no yuav tuag hniav ntaj hniav riam thiab tuag tshaib tuag nqhis thiab tuag mob kis, tiamsis tus uas tawm mus zwm rau cov Kheedias uas vij lub nroog no lawm yuav dim txojsia, nws yuav tau txojsia ua nqe zog hauv tshav rog los. 10 Kuv tsom ntsoov ua xwm txheej phem rau lub nroog no tsis yog ua zoo. Lub nroog no yuav raug muab cob rau tus vajntxwv hauv Npanpiloos txhais tes mas nws yuav muab hlawv pov tseg.  (יחוח)Yahweh hais li no ntag.

​

Tej Lus Hais Txog Yahdah Tej Vajntxwv

11 Cia li hais rau Yahdah tus vajntxwv caj ces tias, cia li mloog (יחוח)Yahweh tej lus, 12 Daviv caj ces es, (יחוח)Yahweh hais li no tias, cia li txiav txim ncaj txhua tagkis thiab pab tus uas raug tub sab lws kom dim hauv tus uas quab yuam nws txhais tes, tsam ces kuv txojkev npau taws yuav tawm plaws yam li hluavtaws kub tsis muaj leejtwg tua tau, yog tim tej kev phem uas nej ua. 13 (יחוח)Yahweh hais tias, Yeluxalees es, uas nyob saum tej hauv hav, thiab yog lub pob zeb uas nyob nram tiaj, saib maj, kuv tawm tsam koj. Nej hais tias, leejtwg yuav los tawm tsam peb thiab leejtwg yuav nkag rau hauv peb tej chaw nyob? 14 Kuv yuav rau txim rau nej raws li uas nej tau ua lawm. Kuv yuav zes taws rau nej lub hav zoov mas hluavtaws yuav kub txhua yam ib ncig ntawd huvsi. (יחוח)Yahweh hais li no ntag.