1 (יחוח)Yahweh hais li no tias, cia li nqes mus rau hauv Yahdah tus vaj-ntxwv lub tsev thiab hais tej lus no rau qhov ntawd tias, 2 Yudas tus vajntxwv uas nyob saum Daviv lub zwm txwv es, koj thiab koj cov tub teg tub taws thiab koj cov pejxeem uas mus los ntawm lub rooj loog no, cia li mloog (יחוח)Yahweh tej lus.

3 (יחוח)Yahweh hais li no tias, cia li txiav txim ncaj thiab ua ncaj ncees, thiab pab tus uas raug tub sab lws kom dim hauv tus uas quab yuam nws txhais tes. Thiab tsis txhob ua txhaum ua limhiam ntais ntuj rau lwm haiv neeg thiab tej menyuam ntsuag tsis muaj txiv thiab cov poj ntsuam, thiab tsis txhob tua tus uas tsis txhaum tuag rau hauv lub chaw no. 4 Yog nej mloog tej lus no tiag tiag mas yuav muaj vajntxwv nyob saum Daviv lub zwm txwv nkag tej rooj loog hauv lub tsev no, yuav caij tsheb ua rog thiab caij nees los, yog tej vajntxwv thiab lawv cov tub teg tub taws thiab lawv tej pejxeem. 5 Tiamsis yog nej tsis mloog tej lus no, (יחוח)Yahweh hais tias, kuv tuav kuv lub npe cog lus khov kho tias lub tsev no yuav nyob do cuas cia.

6 (יחוח)Yahweh hais li no txog Yahdah tus vajntxwv lub tsev tias, koj zoo yam nkaus li Kile‑a rau kuv, zoo yam nkaus li lub hau roob Lenpanoos. Txawm li ntawd los kuv yuav muab koj ua ciaj ntuj nrag teb do, ua lub nroog uas tsis muaj tibneeg nyob. 7 Kuv yuav npaj cov uas ua kom puam tsuaj tuaj tawm tsam koj, lawv txhua tus muaj cuab yeej ua rog. Lawv yuav ntov koj tej ntoo ciab uas zoo nkauj vau tag, thiab muab hlawv pov tseg. 8 Thiab tej tebchaws coob yuav hla lub nroog no mus, thiab nyias yuav hais rau nyias phoojywg hais tias, Ua cas (יחוח)Yahweh ua li no rau lub nroog loj no?

 9 Mas lawv yuav teb tias, vim yog cov tibneeg no muab (יחוח)Yahweh uas yog lawv Tus Tswv tej lus cog tseg tso tseg lawm, lawv mus pe hawm thiab ua koom tu luag tej dab.

10 Tsis txhob quaj tus vajntxwv uas tuag lawd, thiab tsis txhob mob siab nws, tiamsis quaj heev rau nws tus tub uas raug ntes coj mus lawm, rau qhov nws yuav tsis tau rov los pom lub tebchaws uas yug nws li lawm.

11 (יחוח)Yahweh hais li no txog Yauxiyas tus tub uas ua vajntxwv kav Yahdah sawv nyob nws txiv Yauxiyas chaw, yog tus uas tawm hauv lub chaw no mus, hais tias, nws yuav tsis tau rov los rau ntawm no li lawm. 12 Nws yuav tuag rau hauv lub chaw uas luag ntes nws coj mus nyob thiab nws yuav tsis pom lub tebchaws no dua li lawm. 13 Tus uas ua nws lub tsev los ntawm txojkev tsis ncaj ncees yuav raug txom nyem lauj! Nws ua txheej saud kuj tsis ua ncaj ua ncees thiab nws quab yuam kwvtij zej zog ua haujlwm dawb rau nws xwb tsis them nqe zog rau lawv li. 14 Nws hais tias, kuv yuav ua lub tsev loj loj rau kuv nyob ua tej chav dav dav rau txheej saud. Nws tho qhov rais rau lub tsev thiab muab tej txiag ntoo ciab los teem lo tej phab ntsa nruab nrog thiab muab pleev liab ploog. 15 Koj xav tias qhov uas koj muab ntoo ciab ntau dua lwm tus li ua tsev yuav ua rau koj tau ua vajntxwv lov? Koj txiv kuj tau noj tau haus thiab txiav txim ncaj thiab ua ncaj ncees, mas nws thiaj tau zoo thiab vam meej. 16 Nws tu plaub rau tej pluag thiab tej txom nyem, nws thiaj tau zoo. Qhov uas ua tej no yog qhov uas paub kuv los tsis yog? (יחוח)Yahweh hais li no ntag. 17 Tiamsis koj lub qhov muag lub siab lub ntsws tsuas yog xam pom qhov uas ua tsis ncaj es tau ntau xwb, yog qhov uas tua tej tibneeg tsis txhaum pov tseg, thiab qhov uas quab yuam ua limhiam ntais ntuj rau luag. 18 Vim lawv yuav tsis quaj ntsuag nws hais tias, kuv tus tijlaug, lossis kuv tus muam. Lawv yuav tsis quaj ntsuag nws hais tias kuv Tus Tswv, lossis Kuv tus vajntxwv. 19 Yuav muab nws faus ib yam li faus nees luav, nws yuav raug muab hai mus laim rau nraum Yeluxalees tej rooj loog.

20 Yeluxalees, koj cia li nce mus pem Lenpanoos thiab qw nrov nrov, thiab tsa koj lub suab hauv Npasas tebchaws, cia li qw hauv Anpalis, rau qhov cov uas koj hlub sawvdaws raug puam tsuaj tag lawm.

21 Thaum koj tseem vam meej kuv twb hais rau koj tiamsis koj hais tias, kuv tsis mloog. Tej no yog koj lub siab uas koj coj ib txwm thaum yau los, yog qhov uas koj tsis mloog kuv lub suab. 22 Cua yuav qhwv nkaus koj cov tibneeg yug yaj huvsi, mas cov uas koj hlub kuj yuav raug muab ntes coj mus. Mas koj yuav txaj muag poob ntsej muag vim yog tim txhua yam kev phem uas koj ua. 23 Tus uas nyob hauv Lenpanoos es, uas ua zes nyob hauv nruab nrab tej ntoo ciab, koj yuav quaj ntsaj heev rau thaum kev mob nkeeg los raug koj yam nkaus li tus pojniam mob plab yuav yug menyuam.

24 (יחוח)Yahweh hais tias, kuv yeej muaj txojsia nyob mas txawm yog Yahdah tus vajntxwv Yehauyakhees tus tub Khauniyas yog lub nplhaib ntawm kuv txhais tes xis los kuv yuav muab hle pov tseg, 25 thiab muab koj cob rau hauv cov uas txov koj txojsia txhais tes, yog cov tibneeg uas koj ntshai txhais tes, yog vajntxwv Nenpu-khanexas hauv Npanpiloos txhais tes thiab cov Kheedias txhais tes. 26 Kuv yuav muab koj thiab koj niam uas yug koj laim mus rau lwm lub tebchaws uas tsis yog yug neb, mas neb yuav tuag rau qhov ntawd. 27 Tiamsis lub tebchaws uas lawv xav xav rov qab los nyob ntawd, lawv yuav tsis tau rov los nyob li lawm. 28 Tus txivneej Khauniyas no yog lub laujkaub uas luag saib tsis taus thiab tawg lawm, yog laujkaub uas tsis muaj leejtwg nyiam li lov? Ua cas nws thiab nws tej menyuam raug muab laim pov tseg rau lub tebchaws uas lawv tsis paub li?

29 Tebchaws es, tebchaws, tebchaws, cia li mloog (יחוח)Yahweh tej lus.

30 (יחוח)Yahweh hais li no tias, cia li sau cia tias tus txiv no tsis muaj menyuam, nws yuav ua tsis tau ib yam abtsi tiav rau nws sim neej, rau qhov tsis muaj ib tug tub uas yuav vam meej thiab nyob tau saum Daviv lub zwm txwv thiab kav Yahdah dua li lawm.