Yeluxalees Rov Zoo Li Qub

1 (יחוח)Yahweh hais lus zaum ob tuaj rau Yeremyah‎ yog thaum uas Yeremyah‎ tseem raug kaw rau hauv cov tub rog uas zov vajntxwv lub loog, hais tias.

2 (יחוח)Yahweh uas tsim ntiajteb, (יחוח)Yahweh uas rhawv lub ntiajteb kom nyob ruaj, nws npe yog (יחוח)Yahweh ntag, nws hais li no tias, 3 cia li thov kuv, mas kuv yuav teb koj thiab yuav qhia tej yam loj uas zais cia lawm rau koj, yog tej uas koj tsis tau paub dua li.

4 Rau qhov (יחוח)Yahweh uas yog Ixayees Tus Tswv tau hais li no txog tej tsev hauv lub nroog no thiab Yahdah tej vajntxwv tej tsev uas nej muab rhuav tag thiaj ua tau lub chaw tiv thaiv tej chaw siab uas tib vij lub nroog thiab tiv thaiv hniav ntaj. 5 Cov Kheedias yuav tuaj ua rog thiab ua rau tej vaj tse ntawd puv nkaus tibneeg tuag, yog cov uas kuv chim thiab npau taws es muab tua, rau qhov kuv twb fee plhu ntawm lub nroog no vim yog txhua yam limhiam uas lawv ua.

6 Saib maj, kuv yuav ua rau lub nroog no noj qab nyob zoo thiab kho kom zoo, thiab kuv yuav kho kom lawv zoo thiab kuv yuav ua kev vam meej nplua mias thiab kev nyob tso siab plhuav tshwm los rau lawv. 7 Kuv yuav pub kom Yahdah thiab Ixayees rov vam meej li qub, thiab muab lawv tsim dua tshiab yam nkaus li yav thaum ub. 8 Kuv yuav muab lawv lub txim uas ua txhaum rau kuv ntxuav huvsi mus, thiab kuv yuav zam lawv lub txim uas lawv ua txhaum thiab fav xeeb rau kuv. 9 Thiab lub nroog no lub koob meej yuav ua rau kuv zoo siab xyiv fab thiab ua rau luag qhuas kuv thiab tau ntsej muag tab meeg ib tsoom tebchaws sawvdaws hauv ntiajteb uas tau hnov txog tej kev zoo huvsi uas kuv tau ua rau lawv lawm. Lawv yuav ntshai tshee hnyo vim yog tej kev zoo thiab tej kev vam meej huvsi uas kuv pub rau lub nroog no.

10 (יחוח)Yahweh hais li no tias, Hauv lub chaw uas nej hais tias Liamsim tag tsis muaj tibneeg thiab tsiaj txhu nyob li, thiab hauv Yahdah tej moos thiab hauv Yeluxalees tej kev uas nyob do cuas tsis muaj tibneeg lossis tsiaj txhu lawm, qhov chaw ntawd yuav rov hnov 11 lub suab luag thiab lub suab zoo siab, thiab hnov nraug vauv nkauj nyab lub suab, thiab hnov tej suab nkauj uas thaum lawv coj qhov txhia chaw tuaj xyeem ua tsaug rau hauv (יחוח)Yahweh lub tuam tsev lawv hu hais tias, cia li ua (יחוח)Yahweh uas muaj hwjchim loj kawg nkaus tsaug, rau qhov (יחוח)Yahweh zoo kawg nkaus, nws txojkev hlub ruaj khov nyob mus ib txhis. Kuv yuav pub kom lub tebchaws rov vam meej li qub. (יחוח)Yahweh hais li no ntag. 12 (יחוח)Yahweh uas muaj hwjchim loj kawg nkaus hais li no tias, hauv lub chaw no uas liamsim tag tsis muaj tibneeg lossis tsiaj txhu nyob thiab hauv txhua lub moos yuav rov qab muaj lub chaw rau cov yug yaj coj lawv pab yaj mus so. 13 Hauv tej moos pem toj siab thiab hauv tej moos ntawm tej pov roob Sefela‎s, thiab tej moos hauv Neke‎s, thiab hauv Npeeyamee‎s tebchaws thiab ib ncig Yeluxalees thiab hauv Yahdah tej moos yuav rov muaj tej pab yaj rau cov yug yaj suav. (יחוח)Yahweh hais li no ntag. 14 (יחוח)Yahweh hais tias, saib maj, lub caij lub nyoog tabtom los yuav txog mas kuv yuav ua kom tiav raws li kuv tej lus cog tseg rau Ixayees caj ces thiab Yahdah caj ces. 15 Hnub ntawd thiab lub sijhawm ntawd kuv yuav ua kom ib tug ceg uas ncaj ncees yug tshwm hauv Daviv los. Nws yuav txiav txim ncaj thiab ua ncaj ncees rau hauv lub tebchaws. 16 Lub sijhawm ntawd Yahdah yuav tau kev dim thiab Yeluxalees yuav nyob tso siab plhuav. Yuav hu lub nroog ntawd npe hais tias (יחוח)Yahweh yog peb txojkev ncaj ncees. 17 Rau qhov (יחוח)Yahweh hais li no tias, Daviv yuav tsis tu ncua tus uas nyob saum cov Ixayees lub zwm txwv, 18 thiab xeem Levis yuav tsis tu ncua tus pov thawj uas sawv ntawm kuv xubntiag ua kevcai hlawv xyeem thiab ua kevcai xyeem qoob loo thiab ua kevcai tua tsiaj xyeem mus ib txhis.

19 (יחוח)Yahweh hais lus tuaj rau Yeremyah‎ tias, 20 (יחוח)Yahweh hais li no tias, yog nej muab kuv tej lus cog tseg uas hais kom muaj nruab hnub thiab muaj hmo ntuj rhuav tau, ua tau rau nruab hnub thiab hmo ntuj tsis muaj raws li lub caij lub nyoog, 21 ces nej li rhuav tau tej lus uas kuv cog tseg rau kuv tus qhev Daviv, thiab ua tau rau nws tsis muaj tub sawv kav saum nws lub zwm txwv, thiab rhuav tau tej lus uas kuv cog tseg rau cov pov thawj hauv xeem Levis uas ua koom tu kuv. 22 Tej hnub qub saum ntuj suav tsis txheeb thiab tej xuab zeb ntawm hiavtxwv suav tsis tag li cas, ces kuv yuav pub rau kuv tus qhev Daviv caj ces thiab cov pov thawj hauv xeem Levis uas ua koom tu kuv huaj vam coob ib yam li ntawd. 23 (יחוח)Yahweh hais lus tuaj rau Yeremyah‎ tias, 24 Koj tsis tau tshuaj pom tias cov tibneeg no hais li cas lov? Lawv hais tias, (יחוח)Yahweh muab ob xeem uas nws xaiv los tso tseg lawm. Vim li no lawv saib tsis taus kuv haiv neeg, mas lawv thiaj tsis suav hais tias kuv haiv neeg yog ib lub tebchaws lawm.

25 (יחוח)Yahweh hais li no tias, yog kuv tsis tau cog lus ruaj rau nruab hnub thiab hmo ntuj thiab tsis tau rhawv kevcai ruaj rau lub ntuj thiab lub ntiajteb, 26 ces kuv yuav tso Yakhauj thiab kuv tus qhev Daviv caj ces pov tseg thiab tsis xaiv ib tug hauv nws caj ces los kav Aplahas, Yiha thiab Yakhauj caj ces li. Kuv yeej yuav pub lawv rov vam meej li qub, thiab kuv yuav khuvleej lawv.