Yeremyah‎ Yuav Daim Teb Ntawm Anathau‎s

1 No yog tej lus uas (יחוח)Yahweh hais tuaj rau Yeremyah‎ rau xyoo kaum uas Xedekhiya‎s ua vajntxwv kav Yahdah, thiab yog xyoo kaum yim uas Nenpukhanexa‎s ua vajntxwv. 2 Thaum ntawd vajntxwv Npanpiloos cov tub rog tabtom vij lub nroog Yeluxalees thiab Yeremyah‎ uas ua xibhwb cev (יחוח)Yahweh lus kuj raug muab kaw rau hauv cov tub rog uas zov vajntxwv lub loog uas nyob hauv Yahdah tus vajntxwv lub vaj.

 3 Yahdah tus vajntxwv Xedekhiya‎s tau muab Yeremyah‎ kaw thiab hais tias, ua cas koj cev (יחוח)Yahweh lus hais tias, (יחוח)Yahweh hais li no tias, saib maj, kuv yuav muab lub nroog no rau hauv vajntxwv Npanpiloos txhais tes, thiab nws yuav txeeb tau lub nroog no. 4 Yahdah tus vajntxwv Xedekhiya‎s yuav khiav tsis dim cov Kheedias txhais tes, ces nws yuav raug muab cob rau hauv vajntxwv Npanpiloos txhais tes tiag tiag li, thiab yuav tau nrog vajntxwv Npanpiloos sib txuas lus ntawm ncauj thiab pom nws tim ntsej tim muag.

5 Vajntxwv Npanpiloos yuav coj Xedekhiya‎s mus rau Npanpiloos, mas Xedekhiya‎s yuav nyob qhov ntawd mus txog thaum kuv rau txim rau nws. Txawm yog koj ua rog rau cov Kheedias los koj yuav kov tsis yeej. (יחוח)Yahweh hais li no ntag.

6 Yeremyah‎ hais tias, (יחוח)Yahweh hais tej lus tuaj rau kuv tias, 7 Saib maj, koj txiv ntxawm Salus tus tub Hanamees yuav tuaj cuag koj thiab hais tias, cia li yuav kuv daim teb ntawm Anathau‎s, rau qhov koj muaj feem txhiv yuav ua koj tug. 8 Mas kuv tus kwvtij Hanamees tuaj cuag kuv ntawm cov tub rog uas zov vajntxwv lub loog raws li tej lus uas (יחוח)Yahweh tau hais rau kuv lawm, mas Hanamees hais tias, cia li yuav kuv daim teb ntawm Anathau‎s uas nyob hauv Npeeyamee‎s tebchaws, rau qhov koj muaj feem tuav ua koj tug thiab txhiv rau koj. Cia li yuav maj. Mas kuv thiaj paub tias no yog (יחוח)Yahweh li lus tiag.

9 Mas kuv thiaj yuav daim teb hauv Anathau‎s ntawm kuv tus kwvtij Hanamees, thiab kuv luj kaum xya sekees nyiaj rau nws. 10 Kuv thiaj sau npe rau hauv daim ntawv teb thiab ntaus cim nias rau, muaj timkhawv thiab muab teev luj nyiaj rau. 11 Kuv thiaj txais daim ntawv yuav teb uas ntaus cim rau lawm uas muaj ntsiab los muag thiab yuav, thiab daim ntawv uas tsis tau ntaus cim. 12 Mas kuv muab daim ntawv yuav teb rau Npalus uas yog Neliyas tus tub, tab meeg kuv tus kwvtij Hanamees thiab cov tim-khawv uas teev npe rau daim ntawv yuav teb thiab tab meeg cov Yudais sawvdaws uas zaum hauv cov tub rog uas zov vajntxwv lub loog. Npalus yawg yog Maxeyas. 13 Kuv thiaj hais rau Npalus tab meeg lawv tias, 14 (יחוח)Yahweh tus muaj hwjchim loj kawg nkaus uas yog Ixayees Tus Tswv hais li no tias, cia li coj daim ntawv teb no mus, yog daim uas ntaus cim rau thiab daim uas tsis ntaus, mas muab ntim rau hauv ib lub hub av thiaj nyob tau ntev, 15 rau qhov (יחוח)Yahweh tus muaj hwjchim loj kawg nkaus uas yog Ixayees Tus Tswv hais li no tias, tej vaj tse tej teb thiab tej vaj txiv hmab hauv lub tebchaws no yuav raug muab muag thiab yuav dua ib zaug thiab. 16 Thaum kuv muab daim ntawv yuav teb rau Neliyas tus tub Npalus lawm, kuv thov (יחוח)Yahweh hais tias, 17 Au (יחוח)Yahweh, koj yog tus uas siv koj lub hwjchim loj kawg thiab koj tsa hlo koj txhais npab tsim ntuj tsim ntiajteb. Tsis muaj ib yam abtsi uas koj ua tsis tau. 18 Koj yog tus uas ua txojkev hlub ruaj khov tshwm rau ntau txhiab leej, thiab rau txim rau tus tibneeg uas ua txhaum tej menyuam uas tshwm los tom qab. Au (יחוח)Yahweh uas loj kawg thiab muaj hwjchim loj, koj lub npe yog (יחוח)Yahweh uas muaj hwjchim loj kawg nkaus. 19 Koj yog lub chaw sablaj ntxig nug zoo heev thiab koj tej haujlwm muaj hwjchim loj kawg. Koj lub qhov muag pom ntsoov txhua yam uas tibneeg ua, thiab pub nqe zog rau txhua tus raws li uas lawv xyaum ua lawv lub neej thiab pub raws li tej uas lawv ua. 20 Koj yog tus uas ua txujci tseem ceeb thiab txujci phimhwj tshwm rau hauv Iziv tebchaws, thiab los txog niaj hnub nimno kuj ua tshwm rau hauv Ixayees tebchaws thiab hauv nruab nrab ib tsoom tibneeg, thiab ua koj lub npe nto moo lug yam li niaj hnub nimno. 21 Koj ua txujci tseem ceeb thiab txujci phimhwj coj koj haiv neeg Ixayees tawm hauv Iziv tebchaws los, koj siv koj txhais tes uas muaj hwjchim thiab tsa hlo koj txhais npab thiab ua kom muaj kev txhawj kev ntshai kawg li. 22 Koj muab lub tebchaws no rau lawv, yog lub tebchaws uas koj tau cog lus tseg rau lawv tej poj koob yawm txwv tias yuav pub rau lawv, yog lub tebchaws uas muaj kua mis thiab zib ntab ntws nto. 23 Lawv tau txeem los thiab tuav tau lub tebchaws no ua lawv tug. Tiamsis lawv tsis mloog koj lus thiab tsis ua raws li koj txoj kevcai thiab tsis ua ib yam abtsi raws li koj hais kom lawv ua kiag li. Vim li no koj thiaj tso tej xwm txheej phem no huvsi los raug lawv.

24 Saib maj, twb tib tej chaw siab vij yuav txeeb lub nroog lawm. Vim tej hniav ntaj thiab kev tshaib nqhis thiab mob kis lub nroog twb raug muab rau hauv cov Kheedias uas tabtom ua rog ntawd txhais tes lawm. Tej lus uas koj hais twb muaj raws li ntawd lawm, koj yeej pom ntsoov.

25 Au (יחוח)Yahweh, txawm yog lub nroog no raug muab rau hauv cov Kheedias txhais tes lawm, los koj tseem hais rau kuv tias, rho nyiaj yuav daim teb thiab nrhiav timkhawv.

26(יחוח)Yahweh hais lus tuaj rau Yeremyah‎ tias, 27 Saib maj, kuv yog (יחוח)Yahweh, yog ib tsoom tibneeg Tus Tswv, muaj ib yam abtsi twg uas kuv ua tsis tau lov?

28 Vim li no (יחוח)Yahweh hais li no tias, saib maj, kuv tabtom muab lub nroog no cob rau hauv cov Kheedias txhais tes thiab muab cob rau vajntxwv Nenpukhanexa‎s hauv Npanpiloos txhais tes mas nws yuav txeeb tau. 29 Cov Kheedias uas ua rog ntaus lub nroog no yuav tuaj muab lub nroog no hlawv kub hnyiab tag, thiab yuav kub tej tsev uas lawv hlawv xyab xyeem rau dab Npa‑as thiab hliv cawv txiv hmab xyeem rau luag tej dab saum lawv txheej tsev las tshav, zes kom kuv chim. 30 Ixayees caj ces thiab Yahdah caj ces tsis tau ua ib yam abtsi zoo tsuas yog ua kev phem rau kuv pom txij thaum yau los li xwb. Ixayees caj ces tsis tau ib yam abtsi li, lawv txhais tes tsuas yog ua tej haujlwm uas zes kom kuv chim. (יחוח)Yahweh hais li no ntag. 31 Lub nroog no tau zes kom kuv chim thiab npau taws txij hnub uas rhawv los txog niaj hnub nimno. Vim li no kuv yuav muab rhuav tshem ntawm kuv lub qhov muag mus, 32 vim yog Ixayees caj ces thiab Yahdah caj ces tej kev phem txhua yam uas zes ua rau kuv chim, twb yog lawv tej vajntxwv thiab lawv cov thawj coj thiab lawv cov pov thawj thiab lawv cov xibhwb cev lus thiab cov Yahdah thiab cov uas nyob hauv Yeluxalees sawvdaws ua ntag. 33 Lawv tau tig nrob qaum rau kuv, tsis yog tig ntsej muag rau kuv. Txawm yog kuv twb qhia lawv tsis tu ncua, los lawv tsis mloog tsis txais yuav tej lus qhuab qhia. 34 Lawv muab tej uas qias vuab tsuab txawb rau hauv lub tuam tsev uas hu raws li kuv lub npe thiaj puas tsuas lub tuam tsev. 35 Lawv ua lub chaw siab teev dab Npa‑as rau hauv lub hav Npeehinoos lawv thiaj muab lawv tej tub tej ntxhais txi rau dab Maulej, yog yam uas kuv tsis tau kom lawv ua, thiab kuv tsis tau xav rau hauv kuv lub siab tias lawv yuav ua tej uas qias vuab tsuab li no ua rau Yahdah txhaum muaj txim.

36 Vim li no (יחוח)Yahweh uas yog Ixayees Tus Tswv thiaj hais txog lub nroog no uas nej hais tias, lub nroog no twb raug muab cob rau hauv vajntxwv Npanpiloos txhais tes lawm, yog raug hniav ntaj hniav riam thiab kev tshaib nqhis thiab mob kis. 37 Saib maj, kuv yuav sau lawv hauv txhua lub tebchaws uas kuv npau taws vog thiab chim heev es muab lawv ntiab mus nyob lawm rov los. Kuv yuav coj lawv rov los rau lub chaw no, thiab kuv yuav pub lawv nyob tso siab plhuav. 38 Lawv yuav ua kuv haiv neeg, thiab kuv yuav ua lawv Tus Tswv. 39 Kuv yuav ua kom lawv ua ib lub siab thiab taug ib txojkev, kom lawv thiaj li hwm thiab paub ntshai kuv mus ib txhis, thiaj li zoo rau lawv thiab zoo rau lawv tej tub ki tom qab. 40 Kuv yuav cog lus tseg rau lawv mus ib txhis tias kuv yuav tsis tseg qhov uas ua zoo rau lawv, kuv yuav muab lub siab uas hwm thiab paub ntshai kuv rau hauv lawv kom lawv thiaj tsis tso kuv tseg. 41 Kuv yuav zoo siab qhov uas ua zoo rau lawv, thiab kuv ruaj siab yuav muab lawv cog cia rau hauv lub tebchaws no kawg kuv lub siab lub ntsws.

42 (יחוח)Yahweh hais li no tias, kuv twb tso xwm txheej phem loj los raug cov tibneeg no li cas lawm, kuv yuav coj tej kev zoo raws li kuv cog lus tseg lawm huvsi los rau lawv thiab. 43 Lawv yuav muag thiab yuav tej teb hauv lub tebchaws no uas nej hais tias, nyob do cuas tsis muaj tibneeg thiab tsiaj txhu nyob li, lub tebchaws raug muab rau hauv cov Kheedias txhais tes lawm.

44 Yuav rho nyiaj yuav tej teb, thiab tej ntawv teb yuav sau npe thiab ntaus cim thiab muaj timkhawv, tsis hais hauv Npeeyamee‎s tebchaws thiab ib ncig Yeluxalees thiab hauv Yahdah tej moos thiab tej moos pem toj siab thiab tej moos ntawm tej pov roob Sefela‎s, thiab tej moos hauv Neke‎s, rau qhov kuv yuav pub lawv rov qab vam meej li qub. (יחוח)Yahweh hais li no ntag.