Yeluxalees Puam Tsuaj

1 Thaum Xedekhiya‎s sawv ua vajntxwv nws hnub nyoog muaj nees nkaum ib xyoos. Nws nyob hauv Yeluxalees kav tau kaum ib xyoos. Nws niam npe hu ua Hamuthas uas yog Yeremyah‎ uas nyob hauv lub moos Linas tus ntxhais. 2 Nws ua tej uas (יחוח)Yahweh pom tias phem kawg, ib yam li txhua yam uas Yehauyakhi‎s tau ua lawd. 3 Twb yog vim (יחוח)Yahweh chim heev thiaj muaj tej xwm txheej no huvsi tshwm rau hauv Yeluxalees thiab Yahdah, mas (יחוח)Yahweh thiaj muab lawv laim ploj ntawm nws lub xubntiag mus. Xedekhiya‎s fav xeeb rau Npanpiloos tus vajntxwv. 4 Xyoo cuaj uas vajntxwv Nenpukhanexa‎s kav hauv Npanpil-oos, hnub xiab kaum lub kaum hli nws coj nws cov tub rog huvsi tuaj ua rog rau Yeluxalees thiab vij lub nroog cia. Lawv tsub av vij puag ncig lub nroog. 5 Lub nroog thiaj raug vij mus txog xyoo kaum ib uas Xedekhiya‎s ua vajntxwv. 6 Hnub xiab cuaj lub plaub hlis muaj kev tshaib nqhis loj heev hauv lub nroog, tsis muaj zaub mov abtsi li rau cov pejxeem noj.

7 Lub ntsa loog thiaj raug tsoo pob ib qho. Txawm yog cov Kheedias nyob vij lub nroog los vajntxwv thiab cov tub rog sawvdaws khiav tawm hmo ntuj hla vajntxwv lub vaj tawm lub rooj loog taug txojkev uas muaj ob sab ntsa loog mus. Lawv txawm khiav yuav mus rau Alanpas. 8 Tiamsis Kheedias cov tub rog caum vajntxwv Xedekhiya‎s qab thiab caum cuag nws rau ntawm lub tiaj Yelikhaus, mas vajntxwv cov tub rog txawm khiav ua sab ua sua tag lawm. 9 Lawv thiaj ntes tau vajntxwv thiab coj nws mus cuag Npanpiloos tus vajntxwv ntawm lub moos Linplas hauv Hamas tebchaws, mas vajntxwv Npanpiloos txiav txim rau nws. 10 Npanpiloos tus vajntxwv tua Xedekhiya‎s cov tub tab meeg nws, thiab tua Yahdah cov thawj huvsi pov tseg rau ntawm lub moos Linplas. 11 Nws muab Xedekhiya‎s ob lub qhov muag kaus pov tseg thiab muab saw hlau khi nws mas vajntxwv Npanpiloos coj nws mus rau Npanpiloos thiab muab nws kaw hauv tsev lojfaj txog hnub uas nws tuag. 12 Hnub xiab kaum lub tsib hlis, yog xyoo kaum cuaj uas Nenpukhanexa‎s ua vajntxwv kav hauv Npanpiloos, mas Nenpuxaladas uas yog tus thawj rog zov vajntxwv thiab tu vajntxwv Npanpiloos txawm txeem mus rau hauv Yeluxalees. 13 Nws muab (יחוח)Yahweh lub tuam tsev thiab vajntxwv lub tsev thiab tej tsev hauv Yeluxalees huvsi hlawv pov tseg. Nws hlawv tej tsev loj txhua lub kub hnyiab tag huvsi. 14 Thiab cov tub rog Kheedias sawvdaws uas nrog tus thawj rog zov vajntxwv ua ke kuj tsoo tej ntsa loog Yeluxalees pob tag huvsi. 15 Nenpuxaladas uas yog tus thawj rog zov vajntxwv kuav kiag cov pejxeem uas pluag kawg ib txhia thiab cov uas tseem tshuav nyob hauv lub nroog thiab cov uas khiav mus zwm rau Npanpiloos tus vajntxwv, thiab cov Kws txawj ua txhua yam uas tseem tshuav nyob tawm tebchaws mus. 16 Tiamsis tus thawj rog uas zov vajntxwv tseg cov tibneeg uas pluag kawg hauv lub tebchaws ib txhia nyob tu vaj txiv hmab thiab laij teb.

17 Tej ncej tooj liab uas nyob hauv (יחוח)Yahweh lub tuam tsev thiab tej tsheb thawb dej thiab lub rhawv dej tooj liab uas nyob hauv (יחוח)Yahweh lub tuam tsev, mas cov Kheedias muab tsoo ua tej dwb daim thiab coj kiag tej tooj liab huvsi mus rau Npanpiloos. 18 Lawv kuj coj tej laujkaub, tej duav phuaj, tej tais khwb teeb xeeb, tej phaj loj thiab tej tais rau hmoov tshuaj tsw qab thiab tej twj taig tooj liab txhua yam uas siv hauv lub tuam tsev mus. 19 Tus thawj rog uas zov vajntxwv coj tej phaj me, tej duav hlau yawm ncaig taws, tej phaj loj, tej laujkaub thiab tej ncej txawb teeb, thiab tej tais rau hmoov tshuaj tsw qab, thiab tej tais hliv cawv txiv hmab xyeem mus, yog txhua yam uas xuas tseem kub thiab xuas nyiaj ua.

20 Tej tooj liab uas ua ob tug ncej thiab lub rhawv dej thiab kaum ob tug nyuj tooj liab uas tiag lub rhawv dej, thiab tej tsheb thawb dej uas Xalaumoos ua cia rau hauv (יחוח)Yahweh lub tuam tsev, hnyav dhau luj tsis tag. 21 Ib tug ncej siab kaum yim tshim, ntsuas puag ncig muaj kaum ob tshim, khoob qhov tuab plaub ntiv. 22 Muaj lub hau ncej tooj liab txawb rau saum lub hau ncej siab tsib tshim. Thiab muaj ib daim ntxais qhov muag tooj liab thiab tej lub txiv ntsiav kws tooj liab, nyob puag ncig lub hau ncej. Tus ncej uas ob kuj zoo ib yam nkaus thiab muaj tej lub txiv ntsiav kws. 23 Ib ncig tus ncej muaj cuaj caum rau lub txiv ntsiav kws, huvsi muaj ib puas lub txiv ntsiav kws dai ib ncig saum daim ntxais qhov muag ntawd. 24 Tus thawj rog uas zov vajntxwv kuj ntes Xelayas uas yog tus tuam pov thawj hlob thiab Xefaniyas uas yog pov thawj yau thiab peb tug uas zov qhov rooj tuam tsev. 25 Ntawm lub nroog nws kuj ntes ib tug thawj rog uas saib xyuas cov tub rog thiab xya tus uas ua vajntxwv lub chaw sablaj uas tseem nyob hauv lub nroog, thiab ntes tus tub sau ntawv ntawm tus thawj rog uas txhij tub rog thoob tebchaws, thiab ntes cov pejxeem rau caum leej uas tseem nyob hauv lub nroog. 26 Nenpuxaladas uas ua tus thawj rog zov vajntxwv ntes cov tibneeg no coj los txog ntawm vajntxwv Npanpiloos hauv lub moos Linplas.

27 Mas Npanpiloos tus vajntxwv muab lawv nplawm thiab muab lawv tua pov tseg rau ntawm lub moos Linplas hauv Hamas tebchaws. Yahdah thiaj raug muab ntes kuav tawm hauv nws lub tebchaws mus lawm. 28 Ntawm no mus yog cov tibneeg uas Nenpukhanexa‎s ntes coj mus, mas xyoo xya uas Nenpukhanexa‎s ua vajntxwv kav nws coj cov Yudais peb txhiab nees nkaum peb leeg mus. 29 Xyoo kaum yim uas nws kav, nws ntes cov hauv Yeluxalees yim pua peb caug ob leeg kuav mus. 30 Xyoo nees nkaum peb uas Nenpukhanexa‎s kav, Nenpuxaladas uas yog tus thawj rog zov vajntxwv ntes cov Yudais xya pua plaub caug tsib leeg kuav mus. Xam huvsi yog plaub txhiab rau pua leej.

​

Tso Yehauyakhees Dim Hauv Tsev Lojfaj

31 Thaum Yahdah tus vajntxwv Yehauyakhees raug ntes tau peb caug xya xyoo mas hnub tim nees nkaum tsib lub kaum ob hlis rau xyoo uas Evimelaudas sawv ua vajntxwv kav hauv Npanpiloos, Evimelaudas ua zoo rau Yahdah tus vajntxwv Yehauyakhees thiab muab nws tso tawm hauv tsev lojfaj los. 32 Nws hais zoo rau Yehauyakhees thiab pub nws nyob lub rooj siab dua tej vajntxwv uas nrog nws nyob hauv Npanpiloos txhua tus. 33 Yehauyakhees txawm hle cev tsoos tsho raug txim, thiab nws niaj hnub tau nrog vajntxwv koom rooj noj mov mus tag sim neej. 34 Vajntxwv pheej pub qhov txhia chaw tsis tu ncua rau Yehauyakhees raws li uas niaj hnub cheem tsum mus tag nws sim neej.