(יחוח)Yahweh Rau Txim Rau Npanpiloos

1 (יחוח)Yahweh hais li no tias, kuv yuav tshoov ib tug uas ua kev puam tsuaj lub siab kuas tawm tsam Npanpiloos, thiab tawm tsam cov tibneeg Kheedias.

2 Thiab yuav xa cov uas txawj ntxuaj mus rau Npanpiloos, mas lawv yuav ntxuaj nws. Lawv yuav tsis tseg ib yam abtsi nyob hauv lub tebchaws rau thaum uas lawv vij txhua fab tuaj, yog hnub uas raug txom nyem ceeblaj. 3 Tsis txhob tseev cov uas txawj tua hneev nta tau hneev, tsis txhob tseev lawv hnav tau lub tsho hlau sawv li. Tsis txhob tseg nws tej tub hluas siav li, cia li muab nws tej tub rog coob coob ua puam tsuaj huvsi.

4 Lawv yuav raug muab tua tuag tag rau hauv Kheedias tebchaws, thiab raug mob hauv nws tej kev. 5 Rau qhov Ixayees thiab Yahdah Tus Tswv uas yog (יחוח)Yahweh uas muaj hwj chim loj kawg nkaus tsis tau tso lawv tseg, txawm yog lawv lub tebchaws muaj kev txhaum txim puv nkaus rau Ixayees Tus Tswv uas dawb huv kuj xij. 6 Cia li khiav tawm hauv nruab nrab Npanpiloos, cia txhua tus huas siav dim. Tsis txhob raug tua rau thaum rau txim rau nws, rau qhov no yog lub sijhawm uas (יחוח)Yahweh ua pauj, yog (יחוח)Yahweh ua pauj rau nws raws li tsim nyog pauj. 7 Npanpiloos twb txeev ua lub khob kub uas nyob hauv (יחוח)Yahweh txhais tes, ua rau lub ntiajteb huvsi qaug cawv, thiab tej tebchaws tau haus nws tej cawv txiv hmab, mas tej tebchaws thiaj qaug cawv tag tsis meej pem. 8 Ib pliag ntshis xwb Npanpiloos twb vau pes hlo tawg tag. Cia li quaj nyiav nws. Cia li muab tshuaj kho nws tej mob, tej zaum yuav kho tau nws zoo kaj. 9 Peb xav kho kom Npanpiloos zoo, tiamsis nws tsis zoo. Cia li muab nws tso tseg, peb cia li mus, nyias mus rau nyias lub tebchaws, vim qhov uas txiav txim rau nws loj nce mus nto ntuj, thiab raug muab tsa mus txog ntua qab ntuj.

10 (יחוח)Yahweh tsa peb txojcai lawm. Cia li los, cia peb piav (יחוח)Yahweh uas yog peb Tus Tswv tej haujlwm rau hauv Xi‑oo. 11 Cia li hov rab xub vos thiab tuav rawv daim hlau tiv thaiv. (יחוח)Yahweh tshoov Midias tej vajntxwv lub siab, vim nws twb npaj siab yuav ua rau Npanpiloos puam tsuaj. No yog qhov uas (יחוח)Yahweh ua pauj, yog ua pauj nws lub tuam tsev. 12 Cia li tsa chij ua rog rau lub loog Npanpiloos. Cia li tso tibneeg zov zoo zoo, thiab tsa cov uas faj xwm, thiab npaj cov uas mus zov kev tos, rau qhov (יחוח)Yahweh twb npaj tseg thiab ua kom tiav raws li nws tau hais tseg txog cov tibneeg hauv Npanpiloos. 13 Koj tus uas nyob ntawm ntau tus dej thiab muaj nyiaj txiag cuab txhiaj cuab tam ntau kawg es, koj lub caij kawg los txog lawm, txoj hlua uas ntsuas koj txojsia twb muab txiav tu nrho lawm. 14 (יחוח)Yahweh uas muaj hwjchim loj kawg nkaus tau tuav nws lub npe cog lus khov kho. Kuv yeej yuav coj tibneeg tuaj puv nkaus lub tebchaws, coob yam nkaus li tej kooj txig, mas lawv yuav tsa lub suab qw uas kov yeej koj. 15 Nws yog tus uas siv nws lub hwjchim tsim lub ntiajteb, thiab siv nws lub tswvyim tsim tsa lub qab ntuj, thiab siv nws txojkev txawj ntse nthuav lub ntuj. 16 Thaum nws tsa nws lub suab hu, tej dej saum nruab ntug nrov vig voog, thiab nws ua huab sawv tim qab ntuj kawg tuaj. Nws ua xob laim rau thaum nag los, thiab coj cua tawm hauv nws tej txhab cua los. 17 Txhua tus tibneeg tsis thoob tsib thiab tsis paub qabhau. Txhua tus Kws ntaus kub yuav txaj muag vim tej dab mlom uas nws ua, rau qhov nws tej dab mlom yog cuav thiab tsis txawj ua pa kiag li. 18 Tej dab mlom ntawd tsis muaj qabhau kiag li, yog tej uas ntxim thuam luag. Thaum txog sijhawm teem txim, tej ntawd yuav puam tsuaj tag. 19 Tus uas yog Yakhauj Tus Tswv tsis thooj li tej dab mlom ntawd, rau qhov nws yog tus uas tsim txhua yam, thiab haiv neeg Ixayees yog nws qub txeeg qub teg, nws lub npe hu ua (יחוח)Yahweh uas muaj hwjchim loj kawg nkaus. 20 Npanpiloos, koj yog kuv rab qws thiab yog kuv tej cuab yeej ua rog, kuv siv koj tsoo tej tebchaws tawg ua tej dwb daim, kuv siv koj ua rau tej tebchaws puam tsuaj tag.

21 Kuv siv koj tsoo tej nees thiab cov uas caij nees tawg ua tej dwb daim, kuv siv koj tsoo tej tsheb ua rog thiab cov uas tsav tsheb tawg ua tej dwb daim. 22 Kuv siv koj tsoo tej pojniam txivneej tawg ua tej dwb daim, kuv siv koj tsoo tej poj koob yawm txwv thiab tej hluas tawg ua tej dwb daim, kuv siv koj tsoo tej tub hluas ntxhais hluas tawg ua tej dwb daim. 23 Kuv siv koj tsoo cov uas yug yaj thiab lawv pab yaj tawg ua tej dwb daim, kuv siv koj tsoo cov uas ua teb thiab lawv tej nkawm nyuj tawg ua tej dwb daim, kuv siv koj tsoo cov thawj hauv tej moos thiab cov tim xyoob tawg ua tej dwb daim. 24 Kuv yuav ua pauj rau Npanpiloos thiab cov tib neeg hauv Kheedias sawvdaws tab meeg koj pom ntsoov, ua pauj rau tej kev phem huvsi uas lawv ua hauv Xi‑oo. (יחוח)Yahweh hais li no ntag. 25 (יחוח)Yahweh hais tias, lub roob uas ua kom puam tsuaj es, koj yog lub roob uas ua kom thoob ntiajteb puam tsuaj, kuv tawm tsam koj. Kuv yuav tsa kuv txhais tes tawm tsam koj, thiab muab koj dov saum tsua los, thiab muab koj ua lub roob uas kub hnyiab tag. 26 Luag yuav tsis muab koj tej pob zeb ib lub twg coj mus ua lub thawj ntawm kaum tsev, thiab tsis coj mus tiag taw ua tsev tiamsis koj yuav ua lub chaw uas muab tso tseg nyob do cuas mus ib txhis. (יחוח)Yahweh hais li no ntag. 27 Cia li tsa chij ua rog rau hauv ntiajteb, cia li tshuab raj kub yaj rau hauv tej tebchaws, cia li npaj tej tebchaws tuaj ua rog rau nws, cia li hu tebchaws Alalab thiab tebchaws Minis thiab tebchaws Akhenas tuaj ua rog rau nws. Cia li tsa ib tug thawj rog mus tawm tsam nws, cia li coj tej nees tuaj coob yam nkaus li kooj txig ua npoj ntws. 28 Cia li npaj tej tebchaws tuaj ua rog rau nws, yog npaj cov Midias tej vajntxwv thiab cov thawj thiab tej tim xyoob, thiab txhua lub tebchaws uas zwm rau Midias.

29 Lub tebchaws ntseeg nkaws mob ntswj ib ce pes yos, rau qhov (יחוח)Yahweh yeej yuav ua raws li nws npaj tseg rau Npanpiloos, yuav ua rau Npanpiloos nyob do cuas tsis muaj tibneeg nyob hauv kiag li. 30 Npanpiloos tej tub rog twb tso tes tag lawm, lawv lam nyob hauv lawv tej chaw ruaj khov xwb. Lawv twb qaug zog tag lawm, lawv zoo li pojniam xwb. Tej vaj tse hauv Npanpiloos tabtom kub hnyiab, tej las rooj kuj lov tag. 31 Ib tug khiav tuaj tag los ib tug khiav tuaj thiab, ib tug tshaj xo tuaj tag los ib tug tuaj thiab, yog tuaj hais rau vajntxwv Npanpiloos tias nws lub nroog twb raug luag txeeb tag nrho lawm. 32 Lub chaw hla dej luag twb txeeb tau lawm, lub chaw faj xwm kub hnyiab tag, thiab tej tub rog kuj ntshai ras zom zaws. 33 (יחוח)Yahweh tus muaj wjchim loj kawg nkaus uas yog Ixayees Tus Tswv hais li no tias, Npanpiloos tus ntxhais zoo yam nkaus li lub tshav ntaus qoob rau thaum luag tuaj tsuj. Ib pliag xwb twb yuav txog lub sijhawm hlais. 34 Vajntxwv Nenpukhanexa‎s hauv Npanpiloos twb noj kuv lawm, nws muab kuv tsuam lawm, nws ua rau kuv zoo li lub tais uas nyob khoom xwb, nws muab kuv nqos kiag zoo li zaj nqos lawm, nws muab kuv tej qhov txhia chaw uas qab noj puv nkaus nws lub plab, thiab nws muab kuv ntuav tawm mus. 35 Cia tus uas nyob hauv Xi‑oo hais tias, cia txojkev ua limhiam ntais ntuj uas ua rau kuv thiab kuv tej kwvtij rov poob rau saum Npanpiloos. Cia Yeluxalees hais tias, kuv cov ntshav cia cov Kheedias ris. 36 Vim li no (יחוח)Yahweh hais li no tias, kuv yuav hais koj tshaj plaub thiab sawv koj chaw ua pauj. Kuv yuav ua rau nws lub hiavtxwv qhuav thiab ua rau nws tej hauv dej saus. 37 Mas Npanpiloos yuav pob ua tej niag pawg cia, ua chaw rau hma nkaum, ua lub chaw uas luag ceeb thiab ntshai, thiab ua rau luag thuam, tsis muaj tibneeg nyob hauv li.

38 Lawv yuav ua ke nyooj laws li tsov ntxhuav, lawv yuav quaj mluj mlom li tej menyuam tsov ntxhuav. 39 Thaum uas lawv ua nyaum heev kuv yuav npaj ib pluag noj haus rau lawv ua kom lawv qaug cawv ua lom vab vab, mus txog thaum lawv tsis meej pem thiab pw tsaug zog mus ib txhis tsis xeev li. (יחוח)Yahweh hais li no ntag. 40 Kuv yuav coj lawv los tua yam li tua menyuam yaj thiab tua tej txiv yaj txiv tshis. 41 Npanpiloos raug txeeb lawm lauj, lub nroog uas thoob ntiajteb qhuas raug ntes lawm lauj! Npanpiloos tau ua lub chaw uas ib tsoom tebchaws ceeb thiab ntshai lawm lauj! 42 Dej hiavtxwv nphau tuaj nyab Npanpiloos, tej niag nthwv dej nrov voog tuaj npog nkaus nws. 43 Nws tej moos ua chaw rau luag ceeb thiab ntshai, thiab ua lub tebchaws qhuav nkig nkuav thiab ua ntuj nrag teb do, ua lub tebchaws uas tsis muaj tibneeg nyob li, thiab tsis muaj leejtwg hla hauv mus li. 44 Kuv yuav rau txim rau tus dab Npees hauv Npanpiloos, thiab ua rau nws ntuav tej uas nws nqos lawm tawm hauv lub ncauj los. Tej tebchaws yuav tsis mus nrhiav nws nchuav nthwv lawm. Npanpiloos tej ntsa loog pob tag lawm lauj! 45 Kuv cov tibneeg, cia li tawm hauv nws mus. Cia txhua tus huas kom dim txojsia ntawm qhov uas (יחוח)Yahweh npau taws heev. 46 Nej tsis txhob poob siab thiab tsis txhob ntshai tej xov uas hnov hauv lub tebchaws ntawd. Muaj xov tuaj xyoo tag los tseem tuaj xyoo thiab, yog xov hais txog kev ua limhiam ntais ntuj hauv lub tebchaws, thiab ib tug thawj kuj tawm tsam rau ib tug thawj. 47 Vim li no, saib maj, lub caij lub nyoog tabtom los yuav txog mas kuv yuav rau txim rau Npanpiloos tej dab mlom. Nws lub tebchaws huvsi yuav raug txaj muag, thiab nws cov tibneeg uas raug tua yuav ntog tag rau hauv nruab nrab nws lub tebchaws.

48 Mas lub ntuj thiab lub ntiajteb thiab txhua yam uas nyob hauv yuav qw zoo siab xyiv fab txog Npanpiloos, vim tus uas ua kom puam tsuaj yuav tuaj sab qaum teb ped tuaj tawm tsam nws. (יחוח)Yahweh hais li no ntag. 49 Npanpiloos yuav tsum ntog tuag tag vim yog nws tua cov Ixayees, ib yam li Npanploos ua rau ib tsoom tibneeg thoob ntiajteb ntog tuag tag.

50 Nej cov uas dim hniav ntaj, cia li mus tsis txhob nyob twjywm tos. Txawm yog nej nyob deb los cia li nco txog (יחוח)Yahweh, thiab cia Yeluxalees los nyob hauv nej lub siab. 51 Peb tau txaj muag, vim yog peb hnov tej lus uas thuam peb. Kev poob koob npog nkaus peb lub ntsej muag tag, vim lwm haiv neeg tau nkag rau hauv (יחוח)Yahweh lub tuam tsev tej chav uas dawb huv. 52 (יחוח)Yahweh hais tias, vim li no, saib maj, lub caij lub nyoog tabtom los yuav txog mas kuv yuav rau txim rau nws tej dab mlom, thiab cov uas raug mob raug to yuav quaj ntsaj thoob nws lub tebchaws.

53 Txawm yog Npanpiloos nce mus txog saum ntuj, thiab ua tau nws lub chaw tiv thaiv siab siab uas ruaj khov, los cov uas ua kom puam tsuaj yuav tuaj ntawm kuv mus tawm tsam nws. (יחוח)Yahweh hais li no ntag.

54 Mloog saib, muaj suab quaj qw hauv Npanpiloos tuaj, muaj suab puam tsuaj loj nrov hauv cov Kheedias lub tebchaws tuaj.

55 (יחוח)Yahweh tabtom ua rau Npanpiloos piam tag, thiab ua rau nws lub suab uas nrov heev ntsiag to mus. Tej tub rog tuaj nrov vig voog yam li tej niag nthwv dej uas loj heev, lawv tsa suab qw nrov heev, 56 rau qhov tus uas ua kom puam tsuaj twb tuaj tawm tsam Npanpiloos. Nws tej tub rog luag twb ntes tau tag lawm, nws tej hneev kuj raug muab lov ua tej ywb yav tag lawm, vim (יחוח)Yahweh yog Tus Tswv uas ua pauj, nws yeej ua pauj tiag tiag li. 57 Kuv yuav ua rau nws cov thawj thiab nws cov tibneeg txawj ntse, thiab cov thawj hauv tej moos thiab nws cov thawj rog thiab nws tej tub rog qaug cawv tag. Lawv yuav pw tsaug zog mus ib txhis tsis xeev li. Tus vajntxwv uas npe hu ua (יחוח)Yahweh uas muaj hwjchim loj kawg nkaus hais li no ntag.

58  (יחוח)Yahweh uas muaj hwjchim loj kawg nkaus hais li no tias, Npanpiloos tej ntsa loog uas tuab heev yuav raug muab rhuav pob tag ti nkaus npoo av, thiab nws tej rooj loog uas siab siab yuav raug muab hlawv kub hnyiab tag. Tej pejxeem ua tej haujlwm hnyav do tsis muaj qabhau, thiab tej tebchaws ua haujlwm khwv txog siav kom raug muab hlawv pov tseg xwb. 59 Tej lus no yog tej uas Yeremyah‎ uas ua xibhwb cev (יחוח)Yahweh lus muab rau Xelayas rau thaum Xelayas nrog Yahdah tus vajntxwv Xedekhiya‎s mus rau Npanpiloos, yog xyoo plaub uas Xedekhiya‎s ua vajntxwv kav. Xelayas yog Neliya‎s tus tub, yog Maxeyas tus xeeb ntxwv, nws yog tus thawj tub rog uas npaj chaw rau lawv so taug kev. 60 Yeremyah‎ sau tej kev xwm txheej phem huvsi uas yuav raug Npanpiloos rau hauv ntawv, yog tej lus sau cia uas hais txog Npanpiloos no huvsi.

61 Mas Yeremyah‎ hais rau Xelayas tias, thaum koj mus txog Npanpiloos lawm, koj yuav tsum nyeem tej lus no huvsi nav, 62 thiab hais tias, Au (יחוח)Yahweh, koj tau hais txog lub chaw no tias koj yuav muab rhuav pov tseg, kom thiaj tsis muaj ib yam abtsi nyob hauv li, tsis hais tibneeg thiab tsiaj txhu, mas yuav nyob do cuas cia mus ib txhis. 63 Thaum koj nyeem phau ntawv no tag, cia li muab ib lub pob zeb khi rau phau ntawv, es muab pov rau hauv nruab nrab tus dej Yufetis,

64 thiab hais tias, Npanpiloos yuav tog rau hauv ib yam li no tsis ntab los li, vim yog tej xwm txheej phem uas kuv yuav coj los raug nws. Yeremyah‎ tej lus tag li no lawm.