Tej Lus Uas Hais Txog Npanpiloos

1 Tej lus uas (יחוח)Yahweh kom Yeremyah‎ uas ua xibhwb cev (יחוח)Yahweh lus hais txog Npanpiloos thiab hais txog cov Kheedias lub tebchaws. 2 Cia li tshaj tawm thiab piav rau hauv ib tsoom tebchaws, cia li tsa chij thiab piav nrov, tsis txhob npog kiag li, cia li hais tias, Npanpiloos raug txeeb lawm, tus dab Npees kuj raug txaj muag, tus dab Melaudas kuj ntshai kawg li. Tej dab mlom kuj raug txaj muag, thiab tej dab mlom kuj ntshai kawg li. 3 Muaj ib lub tebchaws sab qaum teb ped tuaj tawm tsam lub nroog ntawd, thiab yuav ua rau nws lub tebchaws nyob do cuas cia, tsis muaj leejtwg nyob hauv kiag li, tibneeg thiab tsiaj txhu yuav khiav tag huvsi. 4 (יחוח)Yahweh hais tias, Hnub ntawd thiab lub sijhawm ntawd, cov Ixayees thiab cov Yahdah yuav tuaj ua ke, yuav quaj taug kev tuaj.

Mas lawv yuav nrhiav (יחוח)Yahweh uas yog lawv Tus Tswv. 5 Lawv yuav nug txojkev uas mus rau Xi‑oo, lawv tig kiag ncaj nraim mus rau lub nroog ntawd thiab hais tias, cia peb cog lus tseg tias peb yuav koom kiag rau (יחוח)Yahweh mus ib txhis, thiab pheej nco ntsoov li. 6 Kuv haiv neeg yog cov yaj uas ploj lawm, cov uas yug lawv coj lawv yuam kev lawm, tso lawv khiav rau pem tej roob, lawv thiaj khiav ib lub roob dhau ib lub roob, lawv tsis nco qab lawv lub nkuaj lawm.

7 Sawvdaws uas ntsib lawv kuj muab lawv tom noj, thiab lawv cov yeeb ncuab hais tias, peb tsis txhaum, rau qhov lawv tau ua txhaum rau (יחוח)Yahweh uas yog lawv lub chaw nyob tiag tiag, yog (יחוח)Yahweh uas yog lawv tej poj koob yawm txwv lub chaw vam. 8 Cia li khiav tawm hauv Npanpiloos cia li tawm hauv cov Kheedias lub tebchaws, cia li ua zoo yam nkaus li tus txiv tshis uas coj pab tshis kev. 9 Saib maj, kuv yuav tshoov thiab coj ib co tebchaws uas muaj zog tuaj sab ped tuaj tawm tsam Npanpiloos. Lawv yuav txhij lawv tej tibneeg tuaj tawm tsam nws, mas Npanpiloos yuav raug cov tibneeg ntawd txeeb tau. Lawv tej xub hneev zoo ib yam nkaus li tej tub rog uas txawj ua rog tsis rov qab los tes dawb tes do. 10 Kheedias tebchaws yuav raug lws, txhua tus uas lws lawv yuav tau txaus nkaus lub siab. (יחוח)Yahweh hais li no ntag.

11 Cov uas lws kuv qub txeeg qub teg es, txawm yog nej zoo siab, txawm yog nej zoo siab xyiv fab kawg, thiab txawm yog nej khiav paj paws yam li tus xyuas nyuj hauv tshav zaub thiab hee yam li tus txiv nees, 12 los nej niam yuav txaj muag kawg, thiab tus uas yug nej yuav poob koob meej. Saib maj, nws yuav ua lub tebchaws uas nyob tom tw, yuav ua tebchaws moj sab qhua uas qhuav heev thiab ua ntuj nrag teb do.

13 Vim yog (יחוח)Yahweh txojkev npau taws, yuav tsis muaj tibneeg nyob hauv Npa-npiloos li lawm, nws yuav nyob do cuas qhuav qhawv cia. Txhua tus uas hla Npanpi-loos yuav poob siab nthav thiab thuam vim tej qhov txhab uas nws raug ntaus huvsi. 14 Nej txhua tus uas txawj tua hneev, cia li txhij tuaj tawm tsam vij nkaus Npanpiloos. Cia li tua nws, tsis txhob khuvxim xub hneev, vim nws ua txhaum rau (יחוח)Yahweh. 15 Cia li tsa suab qw tawm tsam vij nkaus nws, nws twb swb lawm. Tej chaw faj xwm twb pob tag lawm, nws tej ntsa loog kuj raug muab tsoo vau tag lawm. Vim tej no yog (יחוח)Yahweh ua pauj, cia li ua pauj rau nws, ua rau nws yam li nws tau ua los lawm. 16 Cia li muab tus uas tseb noob hauv Npanpiloos txiav pov tseg, thiab muab tus uas tuav rab liag rau lub caij hlais txiav mus. Vim yog tus uas quab yuam rab ntaj, txhua tus nyias thiaj li tig mus txog nyias haiv neeg thiab txhua tus nyias khiav mus rau hauv nyias lub tebchaws. 17 Ixayees zoo li ib tug yaj uas tej tsov ntxhuav muab ntiab khiav lawm. Chiv thawj Axlias tus vajntxwv tom lawv noj, thaum kawg no vajntxwv Nenpu-khanexa‎s hauv Npanpiloos cua lawv tej pob txha. 18 Vim li no, (יחוח)Yahweh tus muaj hwjchim loj kawg nkaus, uas yog Ixayees Tus Tswv, hais li no tias, saib maj, kuv yuav coj kev teem txim los rau Npanpiloos tus vajntxwv thiab nws lub tebchaws, ib yam li kuv teem txim rau Axlias tus vajntxwv. 19 Kuv yuav pub Ixayees rov qab los txog lawv lub tshav zaub, mas lawv yuav tau noj saum lub roob Khamees thiab hauv Npasas, lawv yuav tsau npo saum Efa‑is tej pov roob thiab hauv Kile‑as. 20 (יחוח)Yahweh hais tias, Hnub ntawd thiab lub sijhawm ntawd, yuav nrhiav lub txim hauv Ixayees los tsis muaj ib qho li. Yuav nrhiav kev txhaum hauv Yahdah los tsis muaj kiag li, rau qhov kuv yuav zam txim rau cov tibneeg uas kuv tso tseg tshuav nyob ntawd. 21 Cia li mus ua rog rau lub tebchaws Melatha‑is, thiab ua rog rau cov uas nyob hauv Pekhaus. (יחוח)Yahweh hais tias, cia li muab lawv tua thiab raws ua kom lawv puam tsuaj tag huvsi, thiab ua txhua yam raws li uas kuv hais kom nej ua. 22 Lub suab ua rog nyob hauv lub tebchaws, thiab lub suab ua kom puam tsuaj loj kawg. 23 Rab rauj uas tsoo lub ntiajteb huvsi kuj raug muab rhuav thiab raug muab lov lawm lauj! Npanpiloos ua lub chaw uas ib tsoom tebchaws ceeb thiab ntshai lauj!

24 Npanpiloos es, kuv cuab hlua rau koj, koj kuj mag rooj hlua ntawd, thiab koj tsis paub li. Luag ntsib koj thiab ntes koj vim yog koj siv zog ntsos tawm tsam (יחוח)Yahweh.

25 (יחוח)Yahweh tau qheb nws lub txhab cuab yeej ua rog, thiab rho nws kev npau taws li cuab yeej tawm los, rau qhov (יחוח)Yahweh uas muaj hwjchim loj kawg nkaus tseem muaj haujlwm ua hauv cov Kheedias lub tebchaws.

26 Cia li tuaj plaub fab kaum ntuj tuaj tawm tsam nws, cia li qheb nws tej txhab qoob, cia li muab nws tib ua tej pawg yam li tib mog tib qeb, thiab muab ua puam tsuaj tag huvsi, tsis txhob cia tshuav ib yam kiag li. 27 Cia li muab nws tej txiv nyuj tua huvsi, cia lawv nqes mus rau hauv lub chaw tua. Lawv raug txom nyem lauj, vim lawv lub sijhawm los txog lawm, yog lub sijhawm uas teem lawv lub txim.

28 Mloog saib, cov uas khiav dim hauv Npa-npiloos tebchaws mus piav rau hauv Xi‑oo txog tej uas (יחוח)Yahweh uas yog peb Tus Tswv ua pauj, yog nws ua pauj nws lub tuam tsev. 29 Cia li hu cov uas txawj tua hneev tuaj tawm tsam Npanpiloos, yog txhua tus uas nta hneev. Cia li mus tsuam chaw nyob vij nkaus nws, tsis txhob tseev ib tug khiav dim li. Cia li ua pauj rau nws raws li nws ua lawd, cia li ua rau nws yam li nws tau ua los, vim nws khav theeb tawm tsam (יחוח)Yahweh, uas yog tus Dawb Huv hauv cov Ixayees. 30 Vim li no nws tej tub hluas yuav ntog tuag tag rau hauv tej tshav puam, thiab nws tej tub rog huvsi yuav raug puam tsuaj rau hnub ntawd. (יחוח)Yahweh hais li no ntag.

31 (יחוח)Yahweh uas muaj hwjchim loj kawg nkaus hais tias, tus uas khav theeb saib maj, kuv tawm tsam koj, vim yog koj lub sijhawm los txog lawm, yog lub sijhawm uas kuv yuav rau txim rau koj. 32 Tus uas khav theeb yuav dawm thiab ntog, yuav tsis muaj leejtwg tsa nws sawv, thiab kuv yuav zes taws rau nws tej moos, mas hluavtaws yuav kub txhua yam uas nyob ib ncig ntawm nws.

33 (יחוח)Yahweh uas muaj hwjchim loj kawg nkaus hais li no tias, cov Ixayees raug quab yuam thiab cov Yahdah kuj raug quab yuam ua ke. Cov uas ntes lawv coj mus kuj tuav lawv ruaj kawg, cov uas ntes lawv tsis yeem tso lawv dim.

34 Tus uas txhiv lawv muaj zog, nws lub npe yog (יחוח)Yahweh uas muaj hwjchim loj kawg nkaus. Nws yeej yuav hais lawv tshaj plaub, kom nws thiaj li pub tau txojkev kaj siab lug rau lub ntiajteb, tiamsis pub kev ntxhov siab kev lwj siab rau cov uas nyob hauv Npanpiloos. 35 (יחוח)Yahweh hais tias, cia hniav ntaj raug cov Kheedias thiab raug cov uas nyob hauv Npanpiloos thiab raug nws cov thawj thiab cov uas txawj ntse. 36 Cia hniav ntaj raug cov uas saib sij saib yaig kom lawv thiaj li ua tibneeg ruam. Cia hniav ntaj raug nws tej tub rog, kom lawv thiaj ntshai heev. 37 Cia hniav ntaj raug nws tej nees thiab nws tej tsheb nees ua rog, thiab raug lwm haiv neeg uas ua lawv li tub rog, kom lawv thiaj zoo li tej pojniam. Cia hniav ntaj raug nws tej nyiaj txiag huvsi kom tej nyiaj txiag ntawd thiaj raug lws mus.

38 Cia lub ntuj qhua teb nkig raug nws, kom nws tej dej thiaj qhuav tag, vim lub tebchaws tsuas yog muaj dab mlom xwb thiab lawv qaug siab rau tej dab mlom ntawd. 39 Vim li no mas tej tsiaj qus thiab tej hma yuav los nyob hauv Npanpiloos, thiab tej noog ntxhuav yuav nyob rau hauv, nws yuav tsis muaj tibneeg nyob mus ib txhis li, txhua tiam tibneeg yuav tsis muaj nyob hauv kiag li. 40 Ib yam li thaum (יחוח)Yahweh muab lub moos Xaudoos thiab lub moos Kaumaulas thiab tej moos uas nyob ze rhuav pov tseg, yuav tsis muaj tibneeg mus so rau hauv Npanpiloos ib yam nkaus, thiab yuav tsis muaj tibneeg nyob hauv nws. (יחוח)Yahweh hais li no ntag. 41 Saib maj, ib haiv neeg tabtom tuaj sab qaum teb ped tuaj, yog lub tebchaws uas muaj zog, thiab ntau tus vajntxwv tabtom sawv kev tuaj qab ntuj kawg tuaj. 42 Lawv tuav rawv hneev thiab hmuv, lawv nyaum heev tsis khuvleej leejtwg kiag li. Lawv lub suab nrov vig voog yam li dej hiavtxwv ntas. Lawv caij nees ua ib kab sab ib kab sab tuaj ua rog rau koj nawj, Npanpi-loos tus ntxhais es. 43 Vajntxwv Npanpiloos hnov tej xov no mas nws txhais tes tsaug leeg tag, txojkev nyuaj siab lwj siab npog nkaus nws, nws mob yam nkaus li pojniam mob plab yuav yug menyuam. 44 Saib maj, kuv yuav ua rau lawv khiav tawm hauv lub nroog sai kawg, yam nkaus li tus tsov ntxhuav uas tawm hauv lub hav zoov ntawm ntug dej Yaladee‎s khiav mus huas yaj hauv lub nkuaj uas ruaj khov. Kuv yuav tsa tus uas kuv xaiv cia lawd kav nws. Muaj leejtwg zoo cuag li kuv? Leejtwg yuav teem sijhawm rau kuv tuaj? Tus yug yaj twg yuav tawm tsam yeej kuv? 45 Vim li no cia li mloog tej uas (יחוח)Yahweh npaj tseg yuav tawm tsam Npanpiloos thiab tej uas nws npaj siab yuav ua rau cov Kheedias lub tebchaws. Txawm yog cov me me uas nyob hauv pab ntawd los yeej yuav raug muab cab tawm mus. Lawv lub nkuaj yeej yuav ntshai heev kawg rau tej uas lawv raug.

46 Thaum hnov lub suab uas Npanpiloos raug ntes lub ntiajteb yuav ntseeg nkaws, nws lub suab quaj qw yuav nrov mus thoob ib tsoom tebchaws.