Tej Lus Uas Hais Txog Cov Asmoo‎s

1 Tej lus uas hais txog cov Asmoo‎s. (יחוח)Yahweh hais li no tias, Ixay-ees tsis muaj tub li lov? Tsis muaj tus uas tuav qub txeeg qub teg lov? Ua cas dab Mikhoos txeeb tau Kas tebchaws, thiab tej tibneeg uas teev tus dab ntawd mus nyob hauv Kas tej moos? 2 (יחוח)Yahweh hais tias, vim li ntawd, saib maj, lub caij lub nyoog tabtom los yuav txog mas kuv yuav ua kom hnov lub suab ua rog tawm tsam lub moos Lanpas hauv Asmoo‎s tebchaws. Lub moos ntawd yuav pob tag ua tej pawg tsis muaj tibneeg nyob, thiab tej zej zog ib ncig lub moos ntawd yuav raug muab hlawv tag. Mas cov Ixayees yuav txeeb tau ntawm cov uas twb txeeb mus lawm rov qab los (יחוח)Yahweh hais li no ntag. 3 Lub moos Hesanpoos es, cia li quaj nyiav, vim yog lub moos Ais raug muab tso tseg piam tag. Lanpas tej ntxhais es, cia li muab khaub seev tsaj los hnav, cia li quaj ntsuag, khiav mus khiav los hauv tej kev ntawm tej ciam teb, rau qhov tus dab Mikhoos yuav khiav tawm tebchaws nrog nws cov pov thawj thiab cov uas ua koom tu tus dab ntawd ua ke. 4 Tus ntxhais uas fav xeeb es, ua cas koj yuav khav txog koj tej hav, yog tej hav uas muaj dej ntws nto? Koj tso siab rau koj tej nyiaj txiag, hais tias, leejtwg yuav tuaj ua rog rau kuv naj?

5 (יחוח)Yahweh uas muaj hwjchim loj kawg nkaus hais tias, kuv yuav coj kev txhawj kev ntshai ntawm cov tibneeg sawvdaws uas nyob ib ncig koj los raug koj, mas nej yuav raug muab ntiab tawm mus, txhua tus yuav khiav ncaj nraim ntawm nws xubntiag mus, yuav tsis muaj leejtwg qaws tau cov uas khiav ntawd los ua ke. 6 Tiamsis yav tom qab, kuv yuav pub cov Asmoo‎s rov qab vam meej li qub. (יחוח)Yahweh hais li no ntag.

​

Tej Lus Uas Hais Txog Edoos

7 Tej lus uas hais txog Edoos. (יחוח)Yahweh uas muaj hwjchim loj kawg nkaus hais li no tias, tsis muaj tswvyim nyob hauv lub moos Themas dua li lawm lov? Cov tibneeg txawj ntse tej lus sablaj uas zoo puam tsuaj tag lawm lov? Lawv tej tswvyim ploj ntais li lawm lov?

8 Cov uas nyob hauv lub moos Dedas es, cia li khiav, cia li tig rov qab, cia li khiav mus nkaum qhov taub, vim yog kuv yuav coj xwm txheej phem los raug Exaus rau lub sijhawm uas kuv rau txim rau lawv. 9 Yog cov uas de txiv hmab tuaj de ntawm koj, lawv yuav tsis tseg ib txhia cia li lov? Yog tub sab tuaj hmo ntuj, lawv yuav tsis lws kom txaus lawv siab xwb lov? 10 Tiamsis kuv de Exaus tej txiv du lug, kuv rhuav nws tej chaw nkaum mas nws tsiv nraim tsis tau li lawm. Nws tej tub ki thiab nws tej txheeb ze thiab nws tej kwvtij zej zog raug puam tsuaj tag, nws tu noob tsis tshuav ib tug li lawm. 11 Cia li muab nej tej menyuam ntsuag tso tseg, kuv yuav tuav lawv txojsia, thiab cia nej tej poj ntsuam tso siab rau kuv.

12 Rau qhov (יחוח)Yahweh hais li no tias, yog tus uas tsis tsim nyog haus lub khob no los yuav tsum haus, koj yuav dim kev teem txim tau lov? Koj yeej yuav tsis dim, koj yuav tsum haus. 13 (יחוח)Yahweh hais tias, kuv tuav kuv lub npe cog lus khov kho tias lub moos Npauxas yuav ua lub chaw ceeb thiab ntshai, thiab yuav raug luag thuam luag, thiab yuav raug tso tseg piam tag thiab ua lo lus tsawm foom, thiab nws tej moos huvsi yuav muab tso tseg nyob do cuas mus ib txhis. 14 Kuv hnov xov tuaj ntawm (יחוח)Yahweh, thiab ib tug tub tshaj xo raug txib mus hais rau ib tsoom tebchaws tias, cia li sau zog tuaj tawm tsam lub tebchaws ntawd, thiab sawv tsees ua rog. 15 Saib maj, kuv yuav ua rau koj me dua tej tebchaws huvsi, ua rau ib tsoom tibneeg saib tsis taus koj. 16 Qhov uas koj ua rau luag ceeb thiab ntshai thiab qhov uas koj lub siab khav theeb, dag ntxias koj. Koj yog tus uas nyob saum tej kem zeb thiab nyob ruaj saum tej ncov roob. Txawm yog koj ua zes nyob siab yam nkaus li tej dav, los kuv yuav muab koj chua nqes qhov ntawd los. (יחוח)Yahweh hais li no ntag. 17 Edoos yuav ua lub chaw uas luag ceeb thiab ntshai, thiab txhua tus uas hla mus yuav ceeb thiab ntshai kawg thiab yuav thuam vim yog qhov uas lawv raug puam tsuaj tag.

18 (יחוח)Yahweh hais tias, Ib yam li thaum ub lub moos Xaudoos thiab lub moos Kaumaulas thiab tej moos uas nyob ze ntawd raug puam tsuaj tag, yuav tsis muaj tibneeg mus so rau hauv Edoos ib yam nkaus, thiab yuav tsis muaj tibneeg nyob hauv Edoos li lawm. 19 Saib maj, kuv yuav ua rau lawv khiav tawm hauv Edoos sai kawg, yam nkaus li tus tsov ntxhuav uas tawm hauv lub hav zoov ntawm ntug dej Yaladee‎s khiav mus huas yaj hauv lub nkuaj uas ruaj khov. Kuv yuav tsa tus uas kuv xaiv cia lawd kav Edoos. Muaj leejtwg zoo cuag li kuv? Leejtwg yuav teem sijhawm rau kuv tuaj? Tus yug yaj twg yuav tawm tsam yeej kuv? 20 Vim li no cia li mloog tej uas (יחוח)Yahweh npaj tseg yuav tawm tsam Edoos thiab tej uas nws npaj siab yuav ua rau cov tibneeg hauv lub moos Themas. Txawm yog cov me me uas nyob hauv pab ntawd los yeej yuav raug muab cab tawm mus. Lawv lub nkuaj yeej yuav ntshai heev kawg rau tej uas lawv raug. 21 Thaum hnov lub suab uas lawv ntog mas lub ntiajteb yuav ntseeg nkaws, lawv lub suab quaj qw yuav nrov mus txog Hiavtxwv Liab. 22 Saib maj, yuav muaj ib tug sawv tsees qwv tis nkaus ya los yam li tus dav thiab nthuav tis kiag tawm tsam lub moos Npauxas. Hnub ntawd Edoos tej tub rog lub siab yuav zoo yam nkaus li tus pojniam uas tabtom mob plab yug menyuam lub siab.

​

 Tej Lus Uas Hais Txog Damaxakas

23 Tej lus uas hais txog lub nroog Dama-xakas. Lub moos Hama thiab lub moos Apa ntxhov siab vim lawv hnov xov phem. Lawv ntshai siab yaj tag, thiab lawv siab fab tag zoo yam nkaus li dej hiavtxwv uas nyob tsis tus.

24 Damaxaka kuj tsaug leeg tag, nws tig kiag khiav thiab ras zom zaws, lawv lwj siab thiab mob ntsaj laws yam nkaus tus pojniam tabtom yug menyuam. 25 Lub nroog uas muaj koob meej raug muab tso tseg lawm lauj, yog lub nroog uas zoo siab xyiv fab. 26 Vim li no tej tub hluas hauv lub nroog ntawd yuav ntog tuag tag rau hauv tej tshav puam, thiab hnub ntawd tej tub rog hauv lub nroog huvsi yuav raug puam tsuaj tag. (יחוח)Yahweh uas muaj hwjchim loj kawg nkaus hais li no ntag. 27 Kuv yuav zes taws rau lub ntsa loog Damaxakas, thiab hluavtaws yuav kub vajntxwv Npee-hadas tej chaw ruaj khov.

​

Tej Lus Uas Hais Txog Cov Khedas Thiab Lub Moos Haxaus

28 Hais txog cov Khedas thiab ib cheeb tsam ntawm lub moos Haxaus uas vajntxwv Nenpukhanexa‎s hauv Npanpiloos ntaus rog rau, (יחוח)Yahweh hais li no tias, cia li sawv tsees, mus ua rog rau cov Khedas, cia li muab cov tibneeg uas nyob sab hnub tuaj ua kom puam tsuaj tag. 29 Lawv tej tsev ntaub thiab lawv tej pab yaj pab tshis, lawv tej ntaub lawv tej qhov txhia chaw huvsi yuav raug muab txeeb mus, lawv tej ntxhuav yuav raug coj ntawm lawv mus. Tibneeg yuav qw rau lawv tias, Muaj kev txhawj kev ntshai rau txhua fab lauj!

30 (יחוח)Yahweh hais tias, cov tibneeg hauv lub moos Haxaus es, cia li khiav, cia li mus deb deb, mus nkaum hauv qhov taub tob tob, vim yog vajntxwv Nenpukhanexa‎s hauv Npanpiloos twb ntaus tswvyim phem rau nej, thiab npaj siab tseg tawm tsam nej.

31 (יחוח)Yahweh hais tias, cia li sawv tsees mus ua rog rau ib haiv neeg uas nyob siab tus yees, uas nyob tso siab plhuav, tsis muaj rooj loog tsis muaj las rooj li, lawv nyob lawv ib qho xwb. 32 Lawv tej ntxhuav los yuav lws tau los, lawv tej pab nyuj los yuav txeeb tau los. Kuv yuav ua kom cov uas txiav plaubhau txij npoo nplooj ntseg tawg ri sua rau txhua fab raws cua ntsawj, kuv yuav coj tej xwm txheej phem txhua fab los raug lawv. (יחוח)Yahweh hais li no ntag. 33 Lub moos Haxaus yuav ua lub chaw rau hma nkaum, yuav muab tso tseg nyob do cuas mus ib txhis. Yuav tsis muaj leejtwg so tsis muaj leejtwg nyob rau hauv li lawm.

Tej Lus Uas Hais Txog Elas Tebchaws

34 Tej lus uas (יחוח)Yahweh hais tuaj rau Yeremyah‎ uas ua xibhwb cev (יחוח)Yahweh lus ntsig txog Elas tebchaws rau thaum Xedekhiya‎s pib ua vajntxwv kav Yahdah tebchaws. 35 (יחוח)Yahweh uas muaj hwjchim loj kawg nkaus hais li no tias, saib maj, kuv yuav muab Elas rab hneev lov, yog yam uas lawv vam khom thiab muaj zog. 36 Thiab kuv yuav coj cua plaub fab kaum ntuj tuaj tawm tsam Elas, thiab kuv yuav ua kom lawv tawg ri sua raws li tej cua ntsawj ntawd, yuav tsis muaj ib lub tebchaws twg uas cov tibneeg uas raug ntiab hauv Elas mus nyob tsis txog.

37 Kuv yuav ua rau cov Elas ntshai lawv tej yeeb ncuab thiab cov uas nrhiav txov lawv txojsia kawg nkaus li. (יחוח)Yahweh hais tias, kuv yuav coj tej xwm txheej phem los raug lawv, yog kuv tej kev chim heev. Kuv yuav tso hniav ntaj hniav riam caum cuag lawv mus txog thaum kuv ua rau lawv puam tsuaj tag.

38 Mas kuv yuav ua kuv lub zwm txwv rau hauv Elas, thiab kuv yuav muab lawv tus vajntxwv thiab lawv cov thawj ua kom puam tsuaj tag. (יחוח)Yahweh hais li no ntag. 39 Tiamsis yav tom qab kuv yuav pub Elas rov qab vam meej li qub. (יחוח)Yahweh hais li no ntag.