Tej Lus Uas Hais Txog Mau‑as

1 Tej lus uas hais txog Mau‑as. (יחוח)Yahweh tus muaj hwjchim loj kawg nkaus uas yog Ixayees Tus Tswv hais li no tias, Nenpaus yuav raug txom nyem lauj, rau qhov raug muab tso tseg piam tag. Khili-yathais raug txaj muag, luag txeeb tau lawm, lub chaw ruaj khov kuj raug txaj muag thiab pob tag. 2 Mau‑as lub koob meej ploj tag. Cov tibneeg hauv lub moos Hesanpoos ntaus tswvyim ua phem rau Mau‑as. Lawv hais tias, cia li tuaj, peb muab nws rhuav kom ua tsis tau ib lub tebchaws. Lub moos Mamee es, koj yuav raug muab ua nyob ntsiag to, hniav ntaj yuav caum koj qab. 3 Mloog saib, muaj suab hu ntawm lub moos Haulauna‑is tuaj tias, kev puam tsuaj, kev rhuav tshem du lug tuaj txog lauj! 4 Mau‑as tebchaws raug puam tsuaj lawm, hnov nws tej menyuam quaj qw. 5 Lawv quaj heev taug kev nce mus pem lub moos Luhij. Lawv hnov lub suab quaj ntsuag vim yog raug kev puam tsuaj, ntawm txojkev uas nqes mus nram lub moos Haulauna‑is. 6 Cia li khiav, cia li khiav kom dim. Khiav yam li nees luav qus hauv ntuj nrag teb do. 7 Vim nej tso siab rau nej tej haujlwm  thiab nej tej nyiaj txiag, nej yuav raug ntes, thiab tus dab Khemauj yuav khiav tawm tebchaws nrog nws cov pov thawj thiab cov uas ua koom tu tus dab ntawd ua ke. 8 Tus uas ua kom puam tsuaj yuav los rau saum txhua lub moos, tsis muaj ib lub moos twg yuav dim li. Hauv tej hav los yuav puam tsuaj, hauv tej tiaj kuj yuav raug muab ua kom puam tsuaj, raws li uas (יחוח)Yahweh tau hais tseg lawd. 9 Cia li muab kooj tis rau Mau‑as, kom nws thiaj li ya tau tawm mus. nws tej moos yuav raug nyob do cuas cia, tsis muaj tibneeg nyob hauv li lawm. 10 Cia tus uas tsis kub siab ua (יחוח)Yahweh tej haujlwm raug foom tsis zoo, thiab cia tus uas tswj nws rab ntaj tsis tua tibneeg raug foom tsis zoo. 11 Mau‑as yeej nyob siab tus yees txij thaum yau los, lawv nyob tus yam nkaus li cawv txiv hmab txo tog hauv lub hub, tsis muab theej rau lub ub lub no, thiab tsis raug poob tebchaws, mas thiaj qab li qub thiab tsw tus qub ntxhiab.

12 (יחוח)Yahweh hais tias, vim li ntawd saib maj, lub caij lub nyoog tabtom los yuav txog mas kuv yuav txib tus uas theej tuaj muab lawv theej, thiab muab lawv tej hub nchuav du lug thiab muab lawv tej hub tsoo tawg ua tej dwb daim.

13 Mas Mau‑as yuav txaj muag tus dab Khemauj ib yam nkaus cov Ixayees txaj muag qhov uas lawv tso siab rau dab ntawm Npe‑ees. 14 Nej cov Mau‑as yuav ua li cas hais tau tias, peb yog cov tub rog uas siab loj siab tuab thiab txawj ua rog?

15 Tus uas ua rau Mau‑as thiab Mau‑as tej moos puam tsuaj tag tuaj txog lawm, thiab Mau‑as tej hluas uas txawj ua rog tshaj plaws kuj raug muab tua lawm. Tus vajntxwv uas lub npe hu ua (יחוח)Yahweh uas muaj hwjchim loj kawg nkaus, hais li no ntag. 16 Vij sub vij sw twb los txog Mau‑as tes lawm, thiab nws txojkev txom nyem nyuaj siab tuaj ze zuj zus lawm. 17 Nej cov uas nyob ib ncig nws sawvdaws thiab nej cov uas paub nws lub npe sawvdaws, cia li quaj ntsuag nws. Cia li hais tias, nws tus cwj uas muaj hwjchim lov lawm lauj, yog nws tus pas nrig uas muaj meej mom. 18 Cov tibneeg hauv lub moos Dinpoos es, cia li nqes saum nej lub rooj uas muaj meej mom los, cia li zaum saum tej av tawg pleb tawg pluav, rau qhov tus uas ua rau Mau‑as puam tsuaj twb los tawm tsam nej lawm, nws twb muab nej tej chaw ruaj khov ua puam tsuaj lawm. 19 Cov tibneeg hauv lub moos Alau‑aws es, cia li sawv ntawm ntug kev zov. Cia li nug cov txivneej uas khiav los thiab cov pojniam uas dim los, hais tias Muaj xwm txheej abtsi tshwm tuaj? 20 Mau‑as raug txaj muag, vim yog tawg tag lawm. Cia li nyiav thiab quaj. Cia li hais rau ntawm ntug dej Anoos tias Mau‑as raug muab tso tseg piam tag lawm. 21 Kev teem txim poob rau saum tej nras tiaj toj siab, yog lub moos Hauloos, Yaxas, Mefa‑as, 22 Dinpoos, Nenpaus, Npedilatha‑is,

23 Khiliyatha‑is, Npekamus, Npeme‑oos, 24 Kheli‑aus thiab Npauxas thiab tej moos huvsi hauv Mau‑as tebchaws tsis hais deb thiab ze. 25 Mau‑as txwm kub raug muab txiav lawm, nws txhais npab kuj lov lawm.

(יחוח)Yahweh hais li no ntag. 26 Vim yog nws tsab ua loj tawm tsam (יחוח)Yahweh, cia li ua kom nws qaug cawv, xwv nws thiaj li da luj luam saum nws cov ntuav thiab raug luag thuam. 27 Ixayees tsis raug koj thuam luag lov? Koj pom nws yog tub sab lov es koj thiaj hais co hau nto txog nws? 28 Cov Mau‑as es, cia li khiav tawm hauv tej moos mus nyob pem tej roob zeb, cia li ua yam nkaus li tus nquab taug uas ua zes rau ntawm rooj qhov tsua. 29 Peb twb hnov txog Mau‑as tej kev khav theeb, lawv khav theeb heev, lawv tsab ua loj, khav theeb, muaj plhus ntxiag thiab lawv lub siab saib tsis taus luag.

30 (יחוח)Yahweh hais tias, kuv paub lawv tej kev muaj plhus. Tej uas lawv khav tsis muaj tseeb, tej uas lawv ua kuj tsis muaj qabhau. 31 Vim li no kuv thiaj quaj nyiav txog Mau‑as, kuv quaj rau cov Mau‑as huvsi. Kuv quaj ntsuag cov tibneeg hauv Khiheles. 32 Tej txiv hmab ntawm lub moos Ximas es, kuv quaj nej heev dua li quaj lub moos Yaxaws. Nej tej ceg hlav nthuav mus dhau dej hiavtxwv, mus txog lub moos Yaxaws. Tus uas ua kom puam tsuaj twb los raug nej tej txiv ntuj qhua thiab nej tej txiv hmab uas nej twb de los lawm. 33 Txojkev xyiv fab kev zoo siab twb raug muab rho tawm hauv Mau‑as tej liaj teb uas ntsu qoob lawm. Kuv ua rau tej kua txiv hmab tu nrho ntawm lub qhov tsuam txiv hmab. Tsis muaj leejtwg qw zoo siab tsuam kua txiv hmab. Lub suab qw ntawd tsis yog lub suab uas qw xyiv fab.

34 Lub moos Hesanpoos thiab lub moos Ele‑ales quaj qw, lawv lub suab quaj nrov mus txog lub moos Yahaj, lawv lub suab quaj nrov ntawm Xau‑as mus txog lub moos Haulauna‑is thiab lub moos Elaselisiyas, vim yog tej dej ntawm Nilis kuj qhuav tag.

35 Kuv yuav coj hnub kawg los rau hauv Mau‑as tebchaws, yog coj los rau tus uas xyeem qhov txhia chaw ntawm tej chaw siab teev dab thiab hlawv xyab rau Mau‑as tej dab. (יחוח)Yahweh hais li no ntag. 36 Vim li no kuv lub siab thiaj li quaj ntsuag rau Mau‑as yam li lub suab raj nplaim, kuv lub siab quaj ntsuag yam li lub suab raj nplaim rau cov tibneeg Khiheles, vim lawv tej nyiaj txiag uas lawv tau los twb puam tsuaj lawm. 37 Lawv muab txhua lub taubhau chais thiab chais txhua ncauj hwj txwv, thiab muab riam suam lawv tej tes huvsi thiab muab khaub seev tsaj hnav ntawm duav. 38 Saum Mau‑as txhua txheej tsev las tshav thiab hauv tej tshav puam tsuas yog muaj kev quaj ntsuag xwb, vim kuv muab Mau‑as tsoo yam nkaus li tsoo tej twj taig uas tsis siv lawm. (יחוח)Yahweh hais li no ntag. 39 Saib Mau‑as tawg tag li cas lauj! Saib lawv quaj nyiav li cas lauj! Saib Mau‑as tig kiag rov qab txaj muag kawg li lauj! Vim li no Mau‑as thiaj raug thuam thiab ua lub chaw rau tej tibneeg uas nyob ib ncig lawv ceeb thiab ntshai. 40 (יחוח)Yahweh hais li no tias, saib maj, ib tug qwv tis nkaus ya los yam li tus dav thiab nthuav tis kiag tawm tsam Mau‑as. 41 Nws yuav ntaus yeej tej moos thiab txeeb tau tej chaw ruaj khov. Hnub ntawd Mau‑as tej tub rog lub siab yuav zoo yam nkaus li tus pojniam uas tabtom mob plab yug menyuam lub siab.

42 Mau‑as yuav raug puam tsuaj, ua tsis tau ib haiv neeg li lawm, vim yog lawv tsab ua loj tawm tsam (יחוח)Yahweh.

43 Cov Mau‑as es, tej kev txhawj kev ntshai thiab tej qhov taub thiab tej hlua cuab nyob ntawm nej xubntiag lawm. (יחוח)Yahweh hais li no ntag. 44 Tus uas khiav ntawm kev txhawj kev ntshai yuav poob rau hauv qhov taub, tus uas daum tawm hauv qhov taub yuav mag lub voj hlua cuab, vim kuv yuav coj tej no los raug Mau‑as rau xyoo uas yuav rau txim rau lawv. (יחוח)Yahweh hais li no ntag.

45 Cov uas khiav mus nraim ntxoov ntxoo ntawm lub moos Hesanpoos mas qaug zog tag, vim yog hluavtaws tawm hauv Hesanpo-os tuaj, thiab nplaim taws tawm hauv Xihoos lub tsev tuaj, mas ua rau Mau‑as lub hauv pliaj puam tsuaj tag, thiab ua rau cov uas ua nruj ua tsiv tiaj taubhau puam tsuaj tag. 46 Mau‑as es, koj yuav raug txom nyem lauj! Dab Khemauj cov tibneeg puam tsuaj tag, vim koj cov tub thiab koj cov ntxhais raug muab ntes coj mus.  

47 Tiamsis yav tom qab kuv yuav pub Mau‑as rov qab vam meej li qub. (יחוח)Yahweh hais li no ntag. Tej lus uas rau txim rau Mau‑as huvsi tag li no lawm.