Txoj Hlua Ntsuas

1 Kuv tsa muag saib mas pom dheev ib tug txivneej muaj ib txoj hlua ntsuas hauv nws txhais tes.

2 Kuv nug nws hais tias, koj mus qhovtwg? Nws hais rau kuv tias, kuv yuav mus ntsuas lub nroog Yeluxalees saib dav li cas thiab ntev li cas.

3 Tus tubtxib saum ntuj uas nrog kuv hais lus txawm cia li mus lawm thiab muaj dua ib tug tubtxib saum ntuj tuaj ntsib nws, 4 mas hais rau nws tias, dhia maj, hais rau tus hluas ntawd tias, Yeluxalees yuav zoo li tej zej zog uas tsis muaj ntsa loog, vim muaj tibneeg thiab tsiaj txhu nyob coob heev.

5 Kuv yuav ua ntsa loog nplaim taws uas vij nws. Kuv yuav ua hwjchim ci ntsa iab rau hauv lub nroog ntawd. (יחוח)Yahweh  hais li no ntag.

​

Hu Cov Uas Poob Tebchaws Rov Los

6 (יחוח)Yahweh  hais tias, los los, cia li khiav tawm hauv lub tebchaws sab ped rov los. (יחוח)Yahweh  hais tias, kuv twb muab nej ntiab khiav mus yam nkaus li cua ntsawj plaub fab ntuj tuaj.

7 Nej cov uas nrog Npanpiloos tus ntxhais nyob, cia li khiav los rau hauv Xi‑oo.

8 Thaum (יחוח)Yahweh  lub hwjchim txib kuv mus rau ntawm cov tibneeg uas lws nej, (rau qhov yog leejtwg kov nej kuj yog kov (יחוח)Yahweh  lub ntsiab muag. (יחוח)Yahweh  uas muaj hwjchim loj kawg nkaus hais li no tias, 9 Saib nawj, kuv yuav tsa kuv txhais tes rau saum lawv mas lawv yuav raug muab lws rau cov uas ua lawv qhev. Mas nej yuav paub tseeb tias yog (יחוח)Yahweh  uas muaj hwjchim loj kawg nkaus txib kuv tuaj.

10 Xi‑oo tus ntxhais es, cia li hu nkauj xyiv fab hlo rau qhov kuv tuaj mas kuv yuav nyob hauv nej nruab nrab. (יחוח)Yahweh  hais li no ntag.

11 Mas hnub ntawd yuav muaj ntau haiv neeg los tuaj (יחוח)Yahweh  tog thiab yuav ua kuv haiv neeg. Kuv yuav nyob hauv nej nruab nrab mas nej yuav paub tseeb tias, (יחוח)Yahweh  uas muaj hwjchim loj kawg nkaus txib kuv los rau nej.

12 (יחוח)Yahweh  yuav los txais yuav Yahdah tebchaws ua nws teej nws tug ua nws feem hauv lub tebchaws dawb huv thiab yuav rov xaiv lub nroog Yeluxalees.

13 Ib tsoom tibneeg es, cia li nyob twjywm rau ntawm (יחוח)Yahweh  lub xub ntiag, rau qhov (יחוח)Yahweh  twb sawv ntawm nws lub chaw dawb huv tuaj lawm.