Lub Teeb Kub Thiab Tsob Txiv Aulib

1 Tus tubtxib saum ntuj uas nrog kuv hais lus rov qab los ntawm kuv mas tsa kuv yam nkaus li tsa tus tibneeg uas tsaug zog heev.

2 Nws hais rau kuv tias, koj pom abtsi? Kuv teb tias, kuv pom ib lub chaw txawb teeb yog muab kub ua huvsi. Muaj ib lub phaj txawb saum lub chaw ntawd thiab muaj xya lub teeb txawb hauv lub phaj, thiab muaj xya tus teeb xeeb.

3 Thiab muaj ob tsob txiv aulib nyob ntawm lub phaj, ib tsob nyob sab xis ib tsob nyob sab laug.

4 Mas kuv nug tus tubtxib saum ntuj uas nrog kuv hais lus tias, Yawg hlob, tej no yog abtsi?

5 Tus tubtxib saum ntuj uas nrog kuv hais lus teb kuv tias, koj tsis paub tias, tej no yog abtsi lov? Kuv teb tias, Yawg hlob, kuv yeej tsis paub.

6 Ces nws hais rau kuv tias, no yog (יחוח)Yahweh  tej lus uas hais tuaj rau Xelunpanpees tias, tsis yog siv dag siv zog, tsis yog siv hwjchim, tiamsis yog kuv Tus Ntsuj Plig Dawbhuv yuav pab. (יחוח)Yahweh  hais li no ntag.

7 Lub roob loj es, koj yog abtsi? Koj yuav raug nphau ua tiaj ntees rau ntawm Xelunpanpees xubntiag. Nws yuav coj lub pob zeb uas yuav muab txawb saum ruv tsev los mas sawvdaws yuav qw tias, zoo nkauj lauj, zoo nkauj lauj!

8 Tsis tag li ntawd, (יחוח)Yahweh  hais lus tuaj rau kuv tias, 9 Xelunpanpees txhais tes pua tej taw uas ua lub tuam tsev no thiab nws txhais tes yuav ua kom tiav. Mas koj yuav paub tias yog (יחוח)Yahweh  uas muaj hwjchim loj kawg nkaus txib kuv los rau nej.

10 Yog leej twg saib tsis taus hnub uas ua tej haujlwm me me mas nws yuav zoo siab thaum uas pom lub qe hlau uas ntsuas qhov ntseg hauv Xelunpanpees txhais tes. (Xya lub teeb no yog (יחוח)Yahweh  cov qhov muag uas pom tag nrho lub qab ntuj no. )

11 Kuv thiaj li nug nws tias, ob tsob txiv aulib uas nyob ntawm lub chaw txawb teeb sab xis sab laug yog abtsi?

12 Thiab kuv rov nug zaum ob tias, ob tug ceg txiv aulib uas nyob ob sab ntawm ob tug teeb xeeb uas xuas kub ua es hliv roj rau hauv yog abtsi?

13 Nws hais rau kuv tias, tej no koj tsis paub los?

Kuv hais tias, Yawg hlob, kuv tsis paub.

14 Ces nws hais tias, ob tug ceg no yog ob tug uas raug tsa los sawv ntawm (יחוח)Yahweh  uas kav tag nrho lub qab ntuj no xubntiag.