Thooj Ntawv Uas Ya

1 Kuv rov tsa muag saib mas pom dheev ib thooj ntawv uas ya yuj yees.

2 Tus tubtxib saum ntuj hais rau kuv tias, koj pom abtsi? Kuv teb tias, kuv pom ib thooj ntawv ya yuj yees, thooj ntawv ntawd ntev nees nkaum tshim dav kaum tshim.

3 Mas nws hais rau kuv tias, thooj ntawv no yog tej lus foom tsis zoo uas yuav mus txhua nrho hauv ntiajteb. Txhua tus uas ua tub sab yuav raug rhuav tshem raws li uas hais rau thooj ntawv ntawd sab hauv, thiab txhua tus uas cog lus twv dag yuav raug rhuav tshem raws li uas  hais rau thooj ntawv ntawd sab nraud.

4 (יחוח)Yahweh  uas muaj hwjchim loj kawg nkaus hais tias, kuv yuav xa thooj ntawv ntawd tawm mus, mas thooj ntawv ntawd yuav nkag rau hauv cov tub sab lub tsev thiab nkag rau hauv cov tibneeg uas tuav kuv lub npe cog lus twv dag lub tsev. Mas thooj ntawv ntawd yuav nyob hauv lub tsev ntawd, thiab ua rau tej ntoo tej pob zeb uas ua tsev puam tsuaj tag huvsi.

​

Tus Pojniam Hauv Lub Tawb Efas

5 Tus tubtxib saum ntuj uas nrog kuv hais lus txav zog los hais rau kuv tias, tsa muag saib yam uas tawm mus yog abtsi.

6 Kuv thiaj nug tias, yam ntawd yog abtsi? Nws teb tias, yam ntawd yog lub tawb uas tawm mus. Thiab nws hais tias, yam ntawd yog tej kev txhaum uas cov tibneeg thoob plaws hauv lub tebchaws no ua.

7 Lub hau tawb uas muab txhuas ua cia li qheb kiag, ua ciav muaj ib tug pojniam zaum hauv lub tawb efas ntawd.

8 Mas tus tubtxib hais tias, tus no yog tej kev txhaum kev phem. Mas nws cia li muab tus pojniam ntawd thawb kiag rau hauv lub tawb thiab muab lub hau uas muab txhuas ua kaw nkaus rau.

9 Kuv tsa muag saib mas pom dheev ob tug pojniam tuaj txog ntawd. Muaj cua nyob hauv ob tug pojniam ntawd phab tis, ob sab tis zoo li phab tis noog dej dub. Ob tug pojniam ntawd txawm muab lub tawb efas ntawd nqa ya rau saum ib nta ntuj.

10 Kuv txawm nug tus tubtxib uas nrog kuv hais lus tias, ob tug pojniam ntawd yuav coj lub tawb efas ntawd mus rau qhovtwg? 11 Nws teb kuv tias, yuav coj mus rau tebchaws Sinas, yuav mus ua tsev rau lub tawb efas. Thaum ua tau tiav lawd, ob tug pojniam ntawd yuav muab lub tawb efas txawb rau lub chaw uas npaj cia lawd.