Tus Pej Thuam Npanpiloos

1 Tag nrho tej tibneeg hauv ntiajteb puavleej paub tib yam lus thiab siv tej lus ib yam nkaus. 

2 Thaum lawv tsiv mus rau sab hnub tuaj, mas mus txog ib lub tiaj ntawm Sinas tebchaws hauv Npanpiloos, ces txawm ua vaj ua tsev nyob qhov ntawd.  

3 Lawv nyias taus nyias hais tias, peb cia li tuaj ua ke ua thwv cib muab hlawv kom tawv. Lawv txawm muaj thwv cib siv ib yam li pob zeb, thiab muaj roj av nplaum siv ib yam li hmoov zeb sib.  

4 Lawv hais tias, cia li tuaj, peb rhawv ib lub nroog, thiab ua ib tug pej thuam kom lub ntsis siab mus nto ntuj, thiab cia peb ua kom peb tau koob meej. Yog peb tsis ua li ntawd, peb yuav khiav ri sua mus thoob ntiajteb.

5 (יחוח)Yahweh nqis los saib lub nroog ntawd, thiab tus pej thuam uas tib­neeg ua ntawd. 

6 Mas (יחוח)Yahweh hais tias, saib maj cov tibneeg no yog tib haiv neeg, thiab lawv sawvdaws hais tib yam lus.  No yog qhov uas lawv nyuam qhuav pib ua xwb, mas nimno yog lawv xav ua ib yam abtsi los lawv yeej ua kom tau xwb. 

7 Cia peb nqis mus ua kom lawv hais lus sib txawv, thiab tsis sib thooj, kom ib leeg hais, ib leeg thiaj tsis nkag siab. 

8 (יחוח)Yahweh thiaj ua rau lawv tawg ri sua qhov ntawd mus thoob ntiajteb, lawv thiaj tso tseg tsis ua lub nroog ntawd lawm.  

9 Vim li no, thiaj hu lub nroog ntawd ua Npanpiloos, vim qhov chaw ntawd (יחוח)Yahweh ua rau lawv nyias hais nyias ib yam lus mus thoob ntiajteb. Thiab (יחוח)Yahweh ua rau lawv tawg ri sua qhov ntawd mus thoob ntiajteb.

​

Xeeb Caj Ces

(1Vaj Keej Kwm 1:24-27)

10 Ntawm no mus yog Xeeb caj ces. Dhau dej nyab ob xyoos, thaum Xeeb hnub nyoog muaj ib puas xyoo mas nws muaj tus tub Apasas.  

11 Thaum Xeeb muaj tus tub Apasas lawm, nws tseem nyob tau tsib puas xyoo thiab muaj tub muaj ntxhais ntxiv. 

12 Apasas hnub nyoog muaj peb caug tsib xyoos li muaj tus tub Selas. 

13 Thaum Apasas muaj tus tub Selas lawm, nws tseem nyob tau plaub puas peb xyoo thiab muaj tub muaj ntxhais ntxiv.

14 Selas hnub nyoog muaj peb caug xyoo li muaj tus tub Enpaws. 

15 Thaum Selas muaj tus tub Enpaws lawm, nws tseem nyob tau plaub puas peb xyoos thiab muaj tub muaj ntxhais ntxiv. 

16 Enpaws hnub nyoog muaj peb caug plaub xyoos li muaj tus tub Peles.

17 Thaum Enpaws muaj tus tub Peles lawm, nws tseem nyob tau plaub puas peb caug xyoo thiab muaj tub muaj ntxhais ntxiv.

18 Peles hnub nyoog muaj peb caug xyoo li muaj tus tub Le‑us. 

19 Thaum Peles muaj tus tub Le‑us lawm, nws tseem nyob tau ob puas cuaj xyoos thiab muaj tub muaj ntxhais ntxiv.

20 Le‑us hnub nyoog muaj peb caug ob xyoos li muaj tus tub Xelus. 

21 Thaum Le‑us muaj tus tub Xelus lawm, nws tseem nyob tau ob puas xya xyoo thiab muaj tub muaj ntxhais ntxiv.  

22 Xelus hnub nyoog muaj peb caug xyoo li muaj tus tub Nahaus. 

23 Thaum Xelus muaj tus tub Nahaus lawm, nws tseem nyob tau ob puas xyoo thiab muaj tub muaj ntxhais ntxiv.  

24 Nahaus hnub nyoog muaj nees nkaum cuaj xyoos li muaj tus tub Thelas. 

25 Thaum Nahaus muaj tus tub Thelas lawm, nws tseem nyob tau ib puas kaum cuaj xyoos thiab muaj tub muaj ntxhais ntxiv. 

26 Thelas hnub nyoog muaj xya caum xyoo li muaj tus tub Anplas thiab Nahaus thiab Halas.

​

Thelas Caj Ces

27 Ntawm no mus yog Thelas caj ces. Thelas muaj peb tug tub yog Anplas, Nahaus thiab Halas. Halas tus tub yog Lauj. 

28 Halas tuag ua nws txiv Thelas ntej rau hauv lub tebchaws uas yug nws, yog hauv cov Kheedias lub moos Aw. 

29 Anplas thiab Nahaus kuj yuav pojniam. Anplas tus pojniam hu ua Xalais, Nahaus tus pojniam hu ua Meekhas. Meekhas yog Halas tus ntxhais. Halas yog Meekhas thiab Ixakhas txiv. 

30 Xalais xeeb tsis taus tub mas tsis muaj menyuam. 

31 Thelas coj nws tus tub Anplas thiab nws tus xeeb ntxwv Lauj uas yog Halas tus tub, thiab Xalais uas yog nws tus nyab, uas yog nws tus tub Anplas pojniam, mas lawv tawm hauv cov Kheedias lub moos Aw, yuav tsiv mus rau Khana‑as tebchaws. Tiamsis thaum lawv los txog ntawm lub moos Halas, lawv txawm nyob qhov ntawd.

32 Thelas hnub nyoog muaj ob puas tsib xyoos, Thelas txawm tuag rau hauv lub moos Halas lawm.