(יחוח)Yahweh Hu Anplas

1 (יחוח)Yahweh hais rau Anplas tias, koj cia li tawm hauv koj lub teb­chaws, thiab tawm hauv koj cov kwvtij, thiab koj txiv lub tsev mus rau lub tebchaws uas kuv yuav qhia rau koj. 

2 Kuv yuav tsa koj ua ib haiv neeg loj thiab kuv yuav foom koob hmoov rau koj, thiab ua rau koj lub npe nrov nto moo lug mus, mas koj yuav ua rau lwm tus tau koob hmoov. 

3 Kuv yuav foom koob hmoov rau cov uas foom koob hmoov rau koj. Kuv yuav tsawm foom cov uas foom koj tsis zoo. Ib tsoom tibneeg hauv lub ntiajteb yuav tau koob hmoov los ntawm koj.  

 4 Mas Anplas kuj mus raws li (יחוח)Yahweh tau hais rau nws. Lauj kuj nrog nws mus thiab. Thaum Anplas tawm hauv lub moos Halas mus, nws hnub nyoog muaj xya caum tsib xyoos.

5 Anplas coj nws tus pojniam Xalais thiab Lauj uas yog nws tus kwv tus tub, thiab ib puas tsav yam uas lawv khwv tau, thiab tej tub qhe uas lawv tau hauv lub moos Halas, mas lawv tsiv mus rau Khana‑as tebchaws. Thaum mus txog Khana‑as tebchaws lawm,

6 Anplas txawm mus zuj zus txog lub chaw tseem ceeb ntawm lub moos Sekhees yog mus txog tus ntoo xeeb ntawm Maules. Lub sijhawm ntawd, cov Khana‑as nyob hauv lub tebchaws ntawd. 

7 Mas (יחוח)Yahweh los tshwm rau Anplas pom thiab hais tias, lub tebchaws no kuv yuav pub rau koj caj ces. Anplas txawm ua ib lub thaj qhov ntawd rau (יחוח)Yahweh uas los tshwm rau nws pom. 

8 Nws tshais chaw qhov ntawd mus rau lub roob uas nyob lub moos Npethees sab hnub tuaj, ces txawm tsa tsev ntaub tsuam qhov ntawd, lub moos Npethees nyob sab hnub poob, lub moos Ai nyob sab hnub tuaj. Nws txawm ua ib lub thaj rau (יחוח)Yahweh qhov ntawd thiab tuav (יחוח)Yahweh lub npe thov (יחוח)Yahweh. 

9 Anplas kuj tshais chaw mus zuj zus ib ntus, ib ntus, mus rau nram Nekes.

​

Anplas Nyob Hauv Iziv Tebchaws

10 Muaj kev tshaib nqhis hauv lub teb­chaws. Anplas txawm tsiv mus nyob ib ntus nram Iziv tebchaws, vim yog hauv Khana‑as tebchaws muaj kev tshaib nqhis heev.

11 Thaum mus yuav txog Iziv teb­chaws, Anplas hais rau nws tus pojniam Xalais tias, kuv paub tias koj yog ib tug pojniam zoo nkauj.

12 Thaum cov tibneeg Iziv pom koj, lawv yuav hais tias, tus pojniam no yog yawg ntawd tus pojniam, ces yuav muab kuv tua pov tseg, yuav tseg koj nyob. 

13 Koj cia li hais tias, koj yog kuv tus muam, xwv lawv thiaj ua zoo rau kuv, vim yog muaj koj thiab, lawv thiaj tseg kuv txojsia, vim yog saib rau koj.

14 Thaum Anplas nkag mus txog hauv Iziv tebchaws lawm, cov Iziv pom tias tus pojniam zoo nkauj heev. 

15 Thaum Falaus cov tub teg tub taws pom nws lawm, lawv txawm qhuas nws rau Falaus. Lawv txawm coj Xalais mus rau hauv Falaus lub tsev. 

16 Mas Falaus ua zoo rau Anplas heev, vim yog saib rau Xalais. Anplas thiaj tau yaj, tau nyuj, tau txiv nees luav, thiab tau tub qhe, nkauj qhe, thiab tej maum nees luav, thiab tej ntxhuav.

17 Tiamsis (יחוח)Yahweh ua mob phem loj los raug Falaus thiab nws tsev neeg, vim yog tim Xalais uas yog Anplas tus pojniam.

18 Falaus thiaj hu Anplas tuaj thiab hais tias, koj ua abtsi li no rau kuv? Ua cas koj tsis hais tias tus pojniam no yog koj tus pojniam?  

19 Ua cas koj hais tias nws yog koj tus muam, kuv thiaj coj nws los ua kuv tus pojniam? Koj tus pojniam nyob no nawj, cia li coj nws mus thiab khiav tawm mus.

20 Falaus hais txog Anplas rau nws cov tub teg tub taws, mas lawv thiaj xa Anplas thiab nws tus pojniam, thiab tej qhov txhia chaw uas nws muaj huvsi rov mus.

​