Aplas Thiab Lauj Sib Ncaim

1 Anplas thiab nws tus pojniam txawm tawm hauv Iziv tebchaws coj txhua yam uas nws muaj mus txog Nekes. Lauj kuj nrog nws mus thiab. 

2 Anplas muaj tsiaj txhu thiab nyiaj, thiab kub nplua mias.

3 Nws tsiv ntawm Nekes ib ntus zuj zus mus txog lub moos Npethees, yog lub chaw uas yav dhau los nws tau tsa tsev ntaub rau ntu nruab nrab lub moos Npethees thiab lub moos Ai. 

4 Thiab yog lub chaw uas yav nram ntej nws tau ua lub thaj cia. Thiab Anplas tuav (יחוח)Yahweh lub npe thov qhov ntawd.

5 Lauj uas nrog Anplas ua ke, kuj muaj yaj, muaj tshis, thiab muaj nyuj tsheej pab, thiab muaj tej tsev ntaub. 

6 Lub tebchaws yug tsis tau nkawv nyob ua ke, vim nkawv muaj tsiaj txhu coob qhov txhia chaw ntau kawg li, mas tebchaws tsis txaus nkawv nyob ua ke.

7 Anplas cov tub qhe yug tsiaj thiab Lauj cov tub qhe yug tsiaj, kuj sib cav sib ceg. Lub sijhawm ntawd, cov Khana‑as thiab cov Pelixais tseem nyob hauv lub tebchaws ntawd. 

8 Anplas thiaj hais rau Lauj tias, tsis txhob cia wb sib cav sib ceg thiab tsis txhob cia koj cov tub qhe yug tsiaj, thiab kuv cov tub qhe yug tsiaj, sib cav sib ceg, rau qhov wb yog txiv tub.

9 Lub teb­chaws huvsi nyob ntawm koj xubntiag no. Koj cia li ncaim ntawm kuv mus. Yog koj mus rau sab laug, kuv yuav mus rau sab xis, lossis yog koj mus rau sab xis, kuv yuav mus rau sab laug.  

10 Lauj tsa muag saib mas pom tias lub tiaj ntawm ntug dej Yaladees mus txog lub moos Xau‑as, muaj dej zoo txhua qhov ib yam li (יחוח)Yahweh lub vaj thiab ib yam li Iziv tebchaws. No yog ua ntej uas (יחוח)Yahweh tsis tau ua kom lub moos Xaudoos thiab lub moos Kaumaulas puam tsuaj. 

11 Lauj thiaj xaiv lub tiaj ntawm ntug dej Yaladees rau nws, thiab Lauj txawm mus rau sab hnub tuaj, nkawv thiaj sib ncaim. 

12 Anplas nyob hauv Khana‑as tebchaws hos Lauj mus nyob hauv tej moos nram tiaj, thiab nws tshais tsev ntaub mus nyob ze lub moos Xaudoos.

13 Cov tib neeg hauv lub moos Xaudoos ua phem ua txhaum loj rau (יחוח)Yahweh. 

14 Thaum Lauj ncaim Anplas lawm, (יחוח)Yahweh hais rau Anplas tias koj tsa muag saib ntawm qhov chaw uas koj nyob no mus rau sab ped, sab nrad, sab hnub tuaj, sab hnub poob.

15 Tag nrho lub tebchaws uas koj pom no, kuv yuav muab pub rau koj thiab koj caj ces mus ib txhis. 

16 Kuv yuav ua kom koj caj ces coob yam li tej hmoov av, leejtwg suav txheeb tej hmoov av thiaj li suav txheeb koj caj ces.

17 Koj cia li sawv tsees mus ncig kom thoob plaws lub tebchaws no rau sab ntev, thiab sab dav huvsi, rau qhov kuv yuav muab lub tebchaws no rau koj. 

18 Anplas thiaj tshais tsev ntaub los nyob ze cov ntoo xeeb ntawm Males uas nyob ntawm Henploos, thiab nws ua ib lub thaj rau (יחוח)Yahweh qhov ntawd.