Anplas Pab Lauj

1 Thaum ntawd vajntxwv Alafees uas kav Sinas, vajntxwv Ali‑aus uas kav lub moos Eelaxas, vajntxwv Khentaulaumaws uas kav lub moos Elas, thiab vajntxwv Thidas uas kav lub moos Kauyis.

2 Cov vajntxwv no ua rog rau vajntxwv Npelas uas kav lub moos Xaudoos, vajntxwv Npisas uas kav lub moos Kaumaulas, vajntxwv Sinaj uas kav lub moos Amas, vajntxwv Semenpaws uas kav lub moos Xenpau-is, thiab tus vajntxwv uas kav lub moos Npelas, uas yog lub moos Xau‑as.  

3 Cov vajntxwv no sau zog ua ke rau ntawm lub tiaj Xidis (uas yog Hiavtxwv Ntsev.)   

4 Cov vajntxwv no tau zwm rau vajntxwv Khentaulaumaws tau kaum ob xyoo, tiamsis xyoo kaum peb lawv tau ntxeev siab.

5 Mas xyoo uas kaum plaub Khentaulaumaws thiab cov vajntxwv uas koom nws ntawd tuaj ua rog yeej cov tib­neeg Lefais ntawm lub moos Athalaus-Khanais, thiab cov tibneeg Xuxis ntawm lub moos Has, thiab cov Emis ntawm lub moos Saveskhilithais,    

6 Thiab cov tibneeg Haulais pem tej roob Xe-is mus txog lub moos Eepalas uas nyob npuas tebchaws moj sab qhua. 

7 Mas lawv tig rov los txog lub moos Eemixaphas uas yog lub moos Khades, lawv kov yeej cov Amalej lub teb­chaws thiab kov yeej cov Amaulais uas nyob hauv lub moos Haxaxoothamas.

8 Mas Xaudoos tus vajntxwv, Kaumaulas tus vajntxwv, Amas tus vajntxwv, Xenpau‑is tus vajntxwv, thiab Npelas uas yog Xau‑as tus vajntxwv, kuj tawm mus rau ntawm lub tiaj Xidis.

9 Ua rog rau vajntxwv Khentaulaumaws uas kav lub moos Elas, vajntxwv Thidas uas kav lub moos Kauyis, vajntxwv Alafees uas kav Sinas, thiab vajntxwv Ali-aus uas kav lub moos Eelaxas, plaub tug vajntxwv ua rog rau tsib tug vajntxwv. 

10 Lub tiaj Xidis muaj qhov roj av nplaum thoob plaws, mas thaum Xaudoos tus vajntxwv thiab Kaumaulas tus vajntxwv khiav los, muaj qee leej txawm poob rau hauv cov qhov roj ntawd, cov uas tshuav khiav tag rau pem tej roob.

11 Cov yeeb ncuab thiaj tuaj muab lawv tej qhov txhia chaw mov noj hauv Xaudoos thiab Kaumaulas huvsi sau zog mus lawm.  

12 Lawv kuj kuav kiag Lauj uas yog Anplas tus kwv tus tub uas nyob hauv lub moos Xaudoos. 

13 Mas muaj ib tug khiav dim hauv tshav rog tuaj hais rau Anplas uas yog tibneeg Henplais paub. Anplas nyob ze Males cov ntoo xeeb. Males yog tibneeg Amaulais, nws kwvtij yog Ekhaus thiab Anaws, lawv cov no nrog Anplas sib raug zoo. 

14 Thaum Anplas hnov tias nws tus kwvtij txheeb raug ntes coj mus lawm, ces nws txawm coj nws cov tibneeg uas yug hauv nws tsev uas nws qhia kom txawj ua rog, peb puas kaum yim leej caum mus cuag ntawm lub moos Daj.

15 Thaum tsaus ntuj Anplas thiaj faib nws cov tub rog ua tej pab tej pawg, nws thiab nws cov tub qhe thiaj txeem mus ntaus yeeb ncuab thiab muab caum mus txog lub moos Haunpas uas nyob ntawm lub nroog Damaxakas sab ped. 

16 Mas nws muab tau tej qhov txhia chaw huvsi rov los thiab coj tau Lauj uas yog nws tus kwv tus tub thiab nws tej qhov txhia chaw thiab tej pojniam thiab nws cov tibneeg huvsi rov los.

​

Mekhixedes Foom Koob Hmoov Rau Anplas 

17 Thaum Anplas mus tua yeej Khentaulaumaws thiab cov vajntxwv uas koom nrog Khentaulaumaws rov qab los, mas tus vajntxwv hauv lub moos Xaudoos tawm tuaj tos Anplas ntawm lub hav Saves (uas yog lub Hav Vajntxwv).

18 Thiab Mekhixedes uas yog vajntxwv hauv lub moos Xalees coj ncuav thiab cawv txiv hmab tuaj tos. Mekhixedes yog (יחוח)Yahweh uas loj dua ntais tus pov thawj.

19 Mas nws foom koob hmoov rau Anplas hais tias, thov (יחוח)Yahweh uas loj dua ntais uas tsim lub ntuj thiab lub ntiajteb, pub koob hmoov rau Anplas lauj.  

20 Qhuas (יחוח)Yahweh tus loj dua ntais, uas muab koj cov yeeb ncuab rau hauv koj txhais tes. Anplas txawm muab txhua yam uas nws coj los ntawd ib feem hauv kaum pub rau Mekhixedes. 

21 Xaudoos tus vajntxwv hais rau Anplas tias, thov muab cov tibneeg rau kuv xwb, tej qhov txhia chaw koj cia li coj mus yuav.

22 Anplas hais rau Xaudoos tus vajntxwv tias, kuv twb tsa tes twv rau (יחוח)Yahweh tus loj dua ntais uas tsim ntuj tsim teb tias,

23 kuv tsis yuav ib txoj xov, lossis ib txoj hlua khau, lossis ib yam abtsi uas yog koj li, xwv koj thiaj hais tsis tau tias, kuv txhawb Anplas nplua nuj. 

24 Kuv tsis yuav ib yam ab tsi li, tsuas yog yuav tej zaub mov uas kuv cov tibneeg tau noj lawm, thiab cov tibneeg uas nrog kuv mus li feem xwb, yog Anaws, Ekhaus thiab Males li feem. Cia lawv coj lawv li feem mus.