Khayees Thiab Anpees

1 Adas nrog nws tus pojniam Evas pw, mas Evas thiaj xeeb tub thiab yug tau tus tub Khayees. Evas hais tias, (יחוח)Yahweh pab kuv yug tau ib tug tub. 

2 Dhau ntawd, Evas yug tau dua ib tug tub hu ua Anpees. Anpees yog tibneeg yug yaj, Khayees yog tibneeg ua teb. 

3 Muaj ib hnub, Khayees coj tej qoob loo uas nws sau hauv nruab teb tuaj xyeem rau (יחוח)Yahweh 

4 Hos Anpees coj tej menyuam yaj uas yog thawj tug hauv nws pab yaj, tuaj muab cov roj yaj ntawd xyeem. Mas (יחוח)Yahweh txaus siab rau Anpees thiab tej uas nws coj tuaj xyeem.

5 Tiamsis (יחוח)Yahweh tsis txaus siab rau Khayees thiab tej uas nws coj tuaj xyeem ntawd. Khayees thiaj chim heev ua ntsej muag o wv. 

6 (יחוח)Yahweh thiaj nug Khayees tias, ua cas koj chim? Ua cas koj ntsej muag o wv?

7 Yog koj ua zoo, kuv yuav txais koj los tsis yog? Yog koj ua tsis zoo, lub txim pliab lua zov ntawm qhov rooj xav tom koj, tiamsis koj yuav tau kov yeej lub txim ntawd.

8 Khayees hais rau nws tus kwv Anpees tias, wb ua ke mus teb. Thaum nkawv mus txog nram teb, Khayees txawm muab nws tus kwv Anpees ntaus thiab tua pov tseg lawm.

9 Mas (יחוח)Yahweh nug Khayees tias, koj tus kwv Anpees dua twg lawm? Khayees teb tias, kuv tsis paub, kuv nim yog tus uas zov kuv tus kwv lov?

10 (יחוח)Yahweh hais tias, koj ua li cas lawm? Koj tus kwv cov ntshav quaj qw hauv cov av tuaj txog kuv lawm. 

11 Nimno koj yuav raug foom tsis zoo ntawm cov av uas rua ncauj nqos koj tus kwv cov ntshav hauv koj txhais tes. 

12 Thaum koj ua teb, cov av yuav tsis zoo qoob loo rau koj. Koj yuav khiav mus nyob tsis muaj vag tsis muaj tse rau hauv lub ntiajteb. 

13 Khayees hais rau (יחוח)Yahweh tias, kuv lub txim nyhav dhau kuv ris tsis taus.

14 Hnub no koj muab kuv ntiab tawm hauv cov av thiab dhau ntawm koj lub xub­ntiag mus. Kuv yuav khiav mus nyob tsis muaj vag tsis muaj tse rau hauv lub ntiaj teb. Leejtwg ntsib kuv kuj yuav muab kuv tua pov tseg.

15 Mas (יחוח)Yahweh hais rau Khayees tias, tsis tau. Leej twg tua Khayees mas yuav raug pauj xya npaug. Thiab (יחוח)Yahweh ntaus cim rau Khayees lub cev, xwv leejtwg ntsib nws los thiaj tsis muab nws tua.

16 Khayees thiaj tawm hauv (יחוח)Yahweh lub xubntiag mus, thiab nyob rau hauv teb­chaws Nauj, uas nyob Edees sab hnub tuaj.

​

Khayees Caj Ces

17 Khayees nrog nws tus pojniam pw, mas nws thiaj xeeb tub, thiab yug tau tus tub Enauj. Khayees rhawv ib lub moos thiab hu lub npe raws nws tus tub Enauj.

18 Enauj yug tau Ilaj, thiab Ilaj yug tau Mehuya‑ees, thiab Mehuya‑ees yug tau Methusa‑ees, thiab Methusa‑ees yug tau Lames. 

19 Lames yuav ob tug pojniam, ib tug hu ua Adas, ib tug hu ua Xilas. 

20 Adas yug tau Yanpas. Yanpas yog cov uas nyob hauv tsev ntaub thiab yug tsiaj cov yawg koob.  

21 Nws tus kwv yog Yunpas. Yunpas yog cov uas txawj ntaus nkauj nog ncas thiab tshuab raj, yog sawvdaws cov yawg koob.   

22 Xilas yug tau Thunpas Khayees, uas yog Kws tooj Kws hlau, ntaus txhua yam cuab yeej siv. Thunpas Khayees muaj ib tug muam hu ua Na‑amas. 

23 Lames hais rau nws ob tug pojniam tias, Adas thiab Xilas, cia li mloog kuv tej lus, Lames tej pojniam cia li mloog kuv hais, kuv tua ib tug txivneej, vim nws ua raug kuv mob, yog tua ib tug hluas, vim nws ntaus kuv. 

24 Yog ua raug Khayees, yuav ua pauj xya npaug, yog ua raug Lames yeej yuav ua pauj xya caum xya npaug.

​

Xej Thiab Enaus

25 Adas rov nrog nws tus pojniam pw, mas nws yug tau ib tug tub thiab tis npe hu ua Xej. Nws hais tias, (יחוח)Yahweh pub kuv muaj dua ib tug tub nyob Anpees chaw, rau qhov Khayees muab Anpees tua lawm. 

26 Xej muaj ib tug tub mas tis npe hu ua Enaus. Lub sijhawm ntawd tibneeg pib tuav (יחוח)Yahweh lub npe thov.