1 Cia txhua tus uas nyob hauv tus qab quab uas ua qhev suav tias, lawv tus lospav yog tus uas tsim nyog hwm kawg, kom Abba (יחוח)Yahweh lub npe, thiab tej lus qhia thiaj tsis raug saib tsis taus. 2 Cov qhev uas tus lospav yog ib tug ntseeg, kuj tsis txhob saib tsis taus tus lospav, rau qhov ob tog puavleej yog kwvtij lawm. Tiamsis lawv yuav tsum yimhuab ua haujlwm zoo rau tus lospav, vim tias tus lospav uas tau txiaj ntsig ntawm cov tub qhe ntawd, yog tus uas ntseeg thiab ntxim hlub. Cia li qhuab qhia thiab ntuas zaj no.

​

Kev Nplua Nuj

3 Yog leejtwg qhia txawv tej no thiab tsis pom zoo raws li tej lus raug cai uas peb tus Cawmseej (יהושע)Yahshua Messiah qhia, thiab tej lus qhia uas haum Abba (יחוח)Yahweh txojkev, 4 kuj yog nws khav theeb thiab tsis paub abtsi li. Nws nyiam sib cav sib ceg dhau cai thiab sib cav rau tej nyuag lo lus uas ua rau muaj kev sib khib, sib faib, xyav luag moo, pheej xav tias luag phem, 5 thiab ua rau cov tibneeg uas xav phem thiab tsis muaj txoj tseeb kiag li sib cav. Lawv xav tias qhov uas hwm Abba (יחוח)Yahweh yog ncauj kev nrhiav tshaj thawj.

6 Qhov uas hwm Abba (יחוח)Yahweh thiab tau kev kaj siab, kuj yog tau tshaj thawj ntau kawg. 7 Vim peb tsis tau coj ib yam abtsi los rau hauv lub ntiajteb, thiab peb yuav coj tsis tau ib yam abtsi tawm hauv lub ntiajteb mus li thiab.

8 Tiamsis yog peb muaj noj muaj hnav, peb yuav txaus siab rau tej ntawd. 9 Cov uas xav nplua nuj, kuj poob rau hauv txojkev dag ntxias thiab mag rooj hlua, thiab poob rau hauv txojkev ntshaw ntau yam uas ruam, thiab ua kom raug ceeblaj, uas yuav coj mus txog kev liamsim thiab kev puam tsuaj. 10 Vim tias qhov uas ntshaw nyiaj txiag, yog txhua yam kev phem tus cag. Qhov uas ntshaw nyiaj txiag no, ua rau qee leej yuam kev ntawm txojkev ntseeg, thiab lawv lub siab raug ntau yam kev txom nyem chob.

​

Sha-ul Qhia Timothy

11 Koj uas yog Abba (יחוח)Yahweh haiv neeg, cia li khiav kom dhau tej no. Cia li nrhiav txojkev ncaj ncees, kev hwm Abba (יחוח)Yahweh, kev ntseeg, kev hlub, kev ua siab ntev thev, thiab kev zam xeeb. 12 Cia li tawm tsam kom txaus nkaus rau hauv txojkev ntseeg lub tshav rog. Cia li tuav rawv txojsia ib txhis uas Abba (יחוח)Yahweh hu koj los txais, rau thaum koj yeem lees tib zoo tab meeg ntau leej timkhawv. 13 Kuv nkaw lus rau koj tab meeg Abba (יחוח)Yahweh uas pub txojsia rau txhua yam, thiab tab meeg (יהושע)Yahshua Messiah uas ua timkhawv lees tib zoo rau ntawm Phauthi‑aus Philaj lub xub-ntiag. 14 Kom koj tuav rawv tej lus nkaw no huvsi, tsis txhob ua ib qho phem thiaj tsis muaj chaw thuam li, mus txog thaum peb tus Cawmseej (יהושע)Yahshua Messiah rov los. 15 Abba (יחוח)Yahweh yuav ua kom tshwm los rau lub sijhawm uas teem cia. Yog Abba (יחוח)Yahweh tus uas tsim nyog qhuas, thiab yog tib tug uas muaj hwjchim loj kawg nkaus, yog ib tsoom vajntxwv tus Vajntxwv, thiab yog cov uas muaj hwjchim tus Tswv, 16 yog tib tug uas tsis txawj tuag, thiab nyob hauv qhov kaj tsis muaj leejtwg mus tau ze, thiab tsis muaj leejtwg txeev pom thiab pom tsis tau. Thov kom nws tau koob meej thiab hwjchim tswjhwm mus ib txhis. Haleluyah! Amen! 17 Hais txog cov uas nplua nuj tiam no, koj cia li nkaw lus rau lawv kom tsis txhob khav theeb, thiab tsis txhob vam tej nyiaj txiag uas tsis ruaj khov, tiamsis cia siab rau Abba (יחוח)Yahweh, tus uas pub txhua yam nplua mias rau peb kom peb thiaj muaj siab xyiv fab. 18 Cia li nkaw lus kom lawv ua zoo, thiab ua tes haujlwm zoo kom ntau kawg, thiab ua lub siab dav, zoo siab faib rau luag.

19 Qhov uas ua li ntawd, yog khaws qhov txhia chaw cia ua lub chaw tiag ruaj khov, rau tom hauv ntej, kom lawv thiaj tuav tau txojsia, yog txojsia uas tseeb.

20 Timothy es, cia li tuav rawv tej uas twb muab cob rau koj lawm. Cia li zam tej lus tsis muaj qabhau uas saib tsis taus Abba (יחוח)Yahweh, thiab tej lus sib cav uas luag xav yuam kev, tias yog kev txawj ntse. 21 Muaj qee leej, lees yuav tej kev txawj ntse ntawd, thiaj yuam kev ntawm txojkev ntseeg. Thov Abba (יחוח)Yahweh txojkev hlub nrog nraim koj.