Tsa Daviv Ua Vajntxwv Kav Ixayees

(2 Xamuyees 5:1-3)

1 Ib tsoom Ixayees sawvdaws tuaj txoos ua ke, tuaj cuag Daviv hauv lub moos Henploos thiab hais tias, peb nrog koj koom nqaij koom txha.

2 Thaum ub txawm yog Sha-ul ua vajntxwv kav los koj kuj yog tus uas coj cov Ixayees tawm mus thiab coj rov qab los, thiab (יחוח)Yahweh uas yog koj Tus Tswv hais rau koj tias, koj yuav ua tus yug yaj kav kuv haiv neeg Ixayees thiab koj yuav ua kuv haiv neeg Ixayees tus thawj.

3 Yog li ntawd Ixayees cov kev txwj laug sawvdaws thiaj tuaj cuag vajntxwv rau hauv lub moos Henploos, thiab Daviv nrog lawv sib cog lus hauv lub moos Henploos rau ntawm (יחוח)Yahweh xub ntiag, ces lawv txawm hliv roj tsa Daviv ua vajntxwv kav cov Ixayees raws li tej lus uas (יחוח)Yahweh kom Xamuyees hais.

​

Daviv Txeeb Lub Moos Xi‑oo

(2 Xamuyees 5:6-10)

4 Daviv thiab ib tsoom Ixayees huvsi mus rau Yeluxalees uas yog lub moos Yenpus. Cov Yenpus uas yog cov qub tibneeg hauv tebchaws ntawd nyob qhov ntawd.

5 Cov tibneeg hauv Yenpus hais rau Daviv tias, koj yuav txeem tsis tau los rau hauv lub moos no. Txawm li ntawd los Daviv txeeb tau lub chaw ruaj khov Xi‑oo, uas yog Daviv lub nroog.

6 Daviv hais tias, leejtwg xub ntaus cov tib neeg Yenpus ua ntej, tus ntawd yuav tau ua tus loj thiab ua tus thawj kav cov tub rog. Ces Xeluyah tus tub Yahas thiaj xub mus ntaus ua ntej mas nws thiaj tau ua tus loj.

7 Daviv nyob kiag hauv lub chaw ruaj khov ntawd, mas thiaj hu ua Daviv lub nroog.

8 Thiab Daviv tsim lub nroog puag ncig txij ntua lub loog Milaus. Thiab Yahas kuj kho lwm qhov uas tseem tshuav hauv lub nroog ntawd.

9 Daviv muaj hwjchim zuj zus, vim yog (יחוח)Yahweh uas muaj hwjchim loj kawg nkaus nrog nraim nws.

​

Daviv Cov Tub Rog

(2 Xamuyees 23:8-39)

10 No yog Daviv cov tub rog uas ua hlob, yog cov uas nrog ib tsoom Ixayees huvsi pab kom nws kav tau tebchaws, thiab tsa tau nws ua vajntxwv raws li (יחוח)Yahweh tej lus uas hais txog Ixayees.

11 Txij no mus yog hais txog Daviv cov tub rog. Yasaunpas uas yog cum Hamaunis yog tus thawj hauv pab peb tug tub rog. Nws xuas hmuv mus ua ib zaug rog rau peb puas leej mas muab lawv tua tag huvsi.

12 Peb tug tub rog ntawd tus ob yog Daudais tus tub Ele‑axas uas yog cum Ahau‑as.

13 Nws nrog Daviv nyob ntawm lub moos Padamis rau thaum cov Filixatees sau zog tuaj ua rog qhov ntawd.  Muaj ib thaj teb qeb mas cov Ixayees khiav cov Filixatees.

14 Tiamsis nws sawv khov kho hauv nruab nrab thaj teb ntawd zov rawv thaj teb ntawd thiab tua cov Filixatees. Mas (יחוח)Yahweh tau pab lawv kov yeej kiag.

15 Muaj peb leeg hauv pab peb caug tus thawj tub rog nqis mus cuag Daviv ntawm daim txhib zeb hauv lub qhov tsua Adulas rau thaum Filixatees cov tub rog ua yeej hauv lub hav Lefa‑is.

16 Thaum ntawd Daviv nyob hauv lub chaw ruaj khov thiab cov Filixatees ib pab tub rog kuj nyob zov rawv hauv lub moos Npelehees.

17 Mas Daviv txawm hais seev yees tias, kheev muaj ib tug mus nqa tau cov dej hauv lub qhov dej uas nyob ntawm ib sab rooj loog Npelehees los rau kuv haus.

18 Mas peb tug tub rog ntawd thiaj txeem plaws hauv cov Filixatees lub yeej mus ntaus tau dej hauv lub qhov dej ntawm Npelehees ib sab rooj loog coj los pub rau Daviv. Tiamsis Daviv tsis kam haus cov dej ntawd, nws muab hliv xyeem rau (יחוח)Yahweh,

19 thiab hais tias, Au (יחוח)Yahweh, thov tsis txhob cia kuv ua li no. Kuv yuav haus cov tibneeg uas sev nyog txojsia mus ntawd cov ntshav lov? Ua li no nws thiaj tsis kam haus. Tej no yog tej uas peb tug tub rog ntawd ua.  

20 Yahas tus kwv Anpisais ua peb caug leej ntawd tus thawj. Nws xuas hmuv ua rog rau peb puas leej mas muab lawv tua tag huvsi mas thiaj tau koob meej ib yam li peb leeg ntawd.  

21 Nws yog tus muaj koob meej ntau dua peb caug leej ntawd. Nws ua tus thawj kav peb caug leej, tiamsis tsis suav nws rau hauv peb leeg ntawd.

22 Yahyadas tus tub Npenayah yog ib tug siab loj siab tuab hauv lub moos Khaxe‑ees, nws ua tej haujlwm loj. Nws tau tua Mau‑as cov tub rog ob tug uas muaj zog kawg li. Thiab nws tau nqis rau hauv lub qhov mas tua tau ib tug tsov ntxhuav rau hnub uas los los daus.

23 Thiab nws tau tua ib tug tibneeg Iziv uas lub cev loj thiab siab tsib tshim. Tus Iziv ntawd tuav rawv rab hmuv loj li rab nqos, tiamsis Npenayah coj tus pas nrig mus rau ntawm tus Iziv xwb, ces txeeb tau tus Iziv rab hmuv ntawm nws tes los thiab muab nws rab hmuv rov nkaug tus Iziv tuag.

24 Yahyadas tus tub Npenayah tau ua tej haujlwm no thiab tau koob meej ib yam nkaus li peb tug tub rog ntawd.

25 Nws muaj koob meej hauv peb caug leej ntawd tiamsis tsis suav nws rau hauv peb tug tub rog ntawd. Daviv kuj tsa nws ua tus thawj kav pab tub rog uas zov vajntxwv.

26 Cov tub rog hauv pab tub rog yog li no, yog Yahas tus kwv Axahees, Daudais tus tub Eehanas uas nyob hauv Npelehees,

27 Samaus hauv lub moos Halaus, Heles hauv lub moos Pelaus,

28 Ikhes tus tub Ilas hauv lub moos Thekhau‑as, Anpiyexaws hauv lub moos Anathaus,

29 Xinpekhais uas yog Husas cum, Ilais hauv cum Ahau‑as,

30 Mahalais hauv lub moos Nethaufas, Npa‑anas tus tub Heles hauv lub moos Nethaufas,

31 Linpais tus tub Ithais hauv lub moos Kinpe‑as hauv Npeeyamees tebchaws, Npenayah hauv lub moos Pilathoos,

32 Hulais uas nyob ntawm tus dej Ka‑as, Anpi‑ees hauv cum Anpas,

33 Amaves hauv lub moos Npahulis, Eliyanpas hauv lub moos Sa‑anpoos,

34 Hasees hauv cum Kixaus, Sakis tus tub Yahnathas hauv lub moos Halas,

35 Xakhas tus tub Ahihas hauv lub moos Halas, Aws tus tub Elifas,

36 Hefaws hauv lub moos Mekhelas, Ahiyah hauv lub moos Pelaus,

37 Helaus hauv lub moos Khamees, Exanpais tus tub Na‑alais,

38 Nathas tus kwv Yahees, Hakis tus tub Mihas,

39 Xeleb uas yog tibneeg Asmoos, Nahalais hauv lub moos Npe‑awlaus uas kwv Xeluyah tus tub Yahas tej cuab yeej ua rog,

40 Ilas uas yog Ithalas cum, Kales hauv cum Ithalas,

41 Uliyah uas yog tibneeg Hithais, Alais tus tub Xanpas,

42 Sixas tus tub Adinas uas yog xeem Lunpees, yog ib tug thawj hauv xeem Lunpees thiab muaj peb caug leej nrog nws,

43 Ma‑akhas tus tub Hanas, Yahsafas hauv cum Minais,

44 Uxiyah hauv lub moos Athalaus, Hauthas ob tug tub Samas thiab Ye‑i‑ees hauv lub moos Alau‑aws,

45 Silis tus tub Yediya‑ees, thiab nws tus kwv Yahkas hauv lub moos Thixais,

46 Eli‑ees hauv cum Mahavais, thiab Eena‑as ob tug tub Yelinpais thiab Yausayah, thiab Imas uas yog tibneeg Mau‑as,

47 Eli‑ees thiab Aunpes, thiab Ya‑axi‑ees hauv cum Mexaunpais.