Cov Tibneeg Uas Tuaj Daviv Tog Ntawm Xilaj

1 No yog cov txivneej uas tuaj cuag Daviv ntawm Xilaj rau thaum nws tawm tsis tshua tau mus qhov twg rau qhov nws khiav  Sha-ul uas yog Khij tus tub. Lawv yog cov siab loj siab tuab uas pab Daviv ua rog.

2 Lawv yog cov uas txawj tua hneev nti, lawv tua tau hneev nti thiab fiav ntaus qe zeb ob sab tes huvsi. Lawv yog xeem Npeeya-mees, yog Sha-ul cov kwvtij.

3 Tus thawj yog Ahiyexaws, tus ob yog Yahas, mas nkawv yog Sema‑as hauv moos Kinpe‑as cov tub, thiab Amaves ob tug tub uas yog Yexi‑ees thiab Peleb. Thiab Npelakhas thiab Yahus hauv moos Anathaus,

4 Isamayah hauv moos Kinpe‑oos, yog ib tug siab loj siab tuab hauv peb caug tus tub rog thiab yog ib tug thawj uas kav peb caug leej ntawd. Thiab Yeremyah, Yahaxi‑ees, Yahkanas, Yahxanpas hauv moos Kedelas,

5 Eluxais, Yelimaus, Melekhiyah, Semaliyah, Sefathiyah hauv cum Halub,

6 Eekhanas, Yisiyah, Axalees, Yahexaws thiab Yasaunpe‑as uas yog cum Khaulas.

7 Thiab Yaulas hauv moos Kedaus ob tug tub uas yog Yelauhas thiab Xenpadi-yah.

8 Muaj cov tub rog hauv xeem Nkas khiav mus cuag Daviv rau ntawm lub chaw ruaj khov hauv tebchaws moj sab qhua.  Lawv yog cov uas siab loj siab tuab uas txawj ua rog, lawv txawj siv daim phiaj hlau thaiv hauv siab thiab siv hmuv. Lawv ntsej muag nyaum zoo li tsov ntxhuav thiab lawv khiav nrawm li kauv seb saum roob.

9 Exaws yog tus thawj, tus ob yog Obadyah, tus peb yog Elias,

10 tus plaub yog Misamanas, tus tsib yog Yeremyah,

11 tus rau yog Athais, tus xya yog Eli‑ees,

12 tus yim yog Yahkanas, tus cuaj yog Eexanpas,

13 tus kaum yog Yeremyah, tus kaum ib yog Manpanais.

14 Cov tibneeg Nkas no ua cov thawj kav cov tub rog, tus yau muaj zog cuag li ib puas leej tub rog, tus loj muaj zog cuag li ib txhiab leej.

15 Cov tibneeg no yog cov uas hla tus dej Yaladees rau thaum lub ib hlis, thaum uas dej nyab ob sab ntug huvsi, thiab ua rau cov uas nyob ntawm tej ntug hav sab hnub tuaj thiab sab hnub poob tawg khiav tag huvsi.

16 Muaj cov txivneej qee leej hauv xeem Npeeyamees thiab xeem Yahdah tuaj cuag Daviv ntawm lub chaw ruaj khov.

17 Daviv txawm tawm mus tos txais lawv thiab hais rau lawv tias, yog nej tuaj ntaus phooj ywg rau kuv es yuav pab kuv, kuv yuav nrog nej koom ua ib lub siab. Tiamsis yog nej tuaj es txawm yog kuv txhais tes tsis ua txhaum abtsi los nej yuav muab kuv muag rau kuv cov yeeb ncuab, ces thov peb tej poj koob yawm txwv Tus Tswv (יחוח)Yahweh saib thiab txiav txim rau nej.  

18 (יחוח)Yahweh Tus Ntsuj Plig Dawb Huv txawm los kav Amaxais uas yog tus thawj hauv peb caug tus tub rog lub siab mas nws hais tias, Daviv es, peb puav leej yog koj li, Yisais tus tub es, peb tuaj koj tog. Thov kom koj noj qab nyob zoo, thiab cov uas pab koj noj qab nyob zoo. Rau qhov koj Tus Tswv

(יחוח)Yahweh yog tus pab koj.  Mas Daviv thiaj txais yuav lawv thiab tsa lawv ua cov thawj kav nws cov tub rog.

19 Muaj qee leej hauv xeem Manaxes kuj tau khiav mus tuaj Daviv tog rau lub sijhawm uas Daviv mus nrog cov Filixatees ua rog rau  Sha-ul. Tiamsis Daviv tsis pab cov Filixatees, rau qhov Filixatees cov thawj tau sablaj thiab xa Daviv rov qab. Lawv hais tias, tsam ces nws yuav khiav mus tuaj Sha-ul uas yog nws tus tswv tog mas peb yuav tuag tiag tiag li.

20 Thaum uas nws mus rau lub moos Xilaj mas cov txivneej hauv xeem Manaxes no khiav tuaj ua nws tog, yog Anas, Yahxanpas, Yediya‑ees, Mikha‑ees, Yahxanpas, Elihus thiab Xilethais, yog cov thawj kav ib txhiab leej tub rog hauv xeem Manaxes.   

21 Lawv pab Daviv ntaus cov tibneeg uas tuaj lwg teb chaws, rau qhov lawv sawvdaws yog tub rog uas siab loj siab tuab thiab ua cov thawj kav pab tub rog. 22 Txhua txhua hnub muaj txiv neej khiav los tuaj Daviv tog yuav pab nws, mas nws pab tub rog thiaj li coob heev yam nkaus li (יחוח)Yahweh pab tub rog.

​

Daviv Pab Tub Rog Ntawm Henploos 

23 No mus yog tej pab tub rog uas coj cuab yeej ua rog uas khiav los cuag Daviv rau ntawm lub moos Henploos es yuav muab lub tebchaws uas Sha-ul kav rau Daviv, raws li tej lus uas (יחוח)Yahweh hais tseg.

24 Xeem Yahdah cov uas tuav phiaj hlau thiab hmuv muaj 6,800 leej tub rog uas coj cuab yeej ua rog.

25 Xeem Xime‑oos cov uas siab loj siab tuab ua rog muaj 7,100 leej.

26 Xeem Levis muaj 4,600 leej,

27 thiab Yahyadas uas ua thawj coj hauv Aloos cum muaj tibneeg nrog nws 3,700 leej,

28 thiab Xadaus uas yog ib tug tub hluas siab loj siab tuab thiab nees nkaum ob tug thawj tub rog hauv nws cum.

29 Xeem Npeeyamees uas yog Sha-ul cov kwvtij muaj 3,000 leej.  Yav dhau los cov no feem coob tau zwm rau Sha-ul caj ces.

30 Xeem Efa‑is muaj 20,800 leej uas siab loj siab tuab, yog cov uas muaj suab muaj npe hauv lawv tej cum.

31 Ib nrab xeem Manaxes muaj 18,000 leej, yog cov uas raug xaiv npe kom mus tsa Daviv ua vajntxwv.

32 Xeem Ixakhas muaj cov uas tab fab dav paub caij paub nyoog paub tias Ixayees tsim nyog ua abtsi, muaj cov ua thawj 200 leej thiab tej kwvtij huvsi uas lawv kav.

33 Xeem Xenpuloos muaj 50,000 leej tub rog uas tau ua rog dua lawm, nqa txhua yam cuab yeej ua rog txhij zog ua rog, mas lawv ua ib lub siab yuav pab Daviv.

34 Xeem Nathalis muaj cov uas ua thawj kav tub rog 1,000 leej thiab muaj 37,000 leej tub rog uas coj daim phiaj hlau thiab hmuv.

35 Xeem Daj muaj 28,600 leej tub rog uas npaj txhij zog ua rog. 

36 Xeem Asaws muaj 40,000 leej tub rog uas tau ua rog dua los lawm thiab npaj txhij zog yuav ua rog.

37 Xeem Lunpees thiab xeem Nkas thiab ib nrab xeem Manaxes uas nyob sab ntug dej Yaladees hnub tuaj muaj 120,000 leej tub rog muaj txhua yam cuab yeej ua rog.

38 Cov tub rog no huvsi npaj txhij ua rog tau tuaj rau ntawm Henploos, ua tib lub siab xav tseg tias yuav tsa Daviv ua vajntxwv kav Ixayees huvsi. Cov pejxeem Ixayees uas tseem tshuav, sawvdaws kuj ua tib lub siab yuav tsa Daviv ua vajntxwv ib yam nkaus thiab.

39 Lawv nrog Daviv noj thiab haus qhov ntawd tau peb hnub, rau qhov lawv cov kwvtij tau npaj tseg rau lawv.

40 Cov kwvtij zej zog uas nyob deb txog tebchaws Ixakhas, tebchaws Xenpuloos thiab tebchaws Nathalis, tau npaj zaub mov rau nees luav, ntxhuav, luj txwv thiab nyuj thauj ntau kawg li tuaj. Muaj hmoov mog ntxhib, ncuav txiv cev, tej tauv txiv hmab qhuav thiab cawv txiv hmab, thiab roj thiab nyuj thiab yaj, rau qhov muaj kev zoo siab xyiv fab hauv Ixayees tebchaws.