Sha-ul Thiab Nws Cov Tub Tuag

(1 Xamuyees 31:1-13)

1 Cov Filixatees tuaj ua rog rau cov Ixayees, mas cov Ixayees khiav cov Filixatees thiab raug tua tuag rau saum lub roob Kinpau‑as.

2 Cov Filixatees caum cuag Sha-ul thiab nws cov tub, mas cov Filixatees tua Yahnathas thiab Anpinadas thiab Makhi-suas uas yog Sha-ul cov tub tuag tag.   

3 Ua rog nyhav heev tuaj ti Sha-ul, cov tub rog tua hneev ntsib Sha-ul, txawm tua raug nws mob heev.

4 Ces Sha-ul txawm hais rau tus uas nqa nws tej cuab yeej tias, cia li rho ntaj los nkaug kuv kom tshab plaws, ntshai tsam cov uas tsis ua kevcai txiav no tuaj ua limhiam saib tsis taus kuv. Tiamsis tus uas nqa tej cuab yeej tsis kam nkaug, vim yog ntshai heev. Ces Sha-ul txawm rho kiag nws rab ntaj los cuab es nws khwb nkaus chob kiag rab ntaj ntawd.

5 Thaum tus uas nqa tej cuab yeej pom tias Sha-ul tuag lawm, nws kuj cuab nws rab ntaj khwb nkaus chob nws tuag thiab.

6 Yog li ntawd Sha-ul thiaj tuag thiab nws peb tug tub thiab nws cov tibneeg sawvdaws tuag huvsi ua ke.

7 Thaum cov Ixayees sawvdaws uas nyob hauv lub hav pom tias cov tub rog khiav lawm thiab Sha-ul thiab Sha-ul cov tub tuag tag lawm, lawv txawm tso lawv tej moos tseg khiav tag, mas cov Filixatees los nyob rau hauv.

8 Hnub tom qab thaum cov Filixatees tuaj mus khaws cov uas raug tua tuag tej cuab yeej mus yuav, lawv pom Sha-ul thiab Sha-ul cov tub tuag rau saum lub roob Kinpau‑as lawm.

9 Lawv kuj hle nws tej cuab yeej thiab coj nws lub taubhau thiab nws tej cuab yeej ua rog mus, thiab lawv tso tibneeg xa xov mus thoob Filixatees tebchaws, coj xov zoo mus qhia rau lawv tej dab mlom thiab qhia rau cov pejxeem.

10 Lawv muab Sha-ul tej cuab yeej ua rog khaws cia rau hauv lub tsev uas teev lawv tej dab, thiab muab nws taubhau dai rau hauv lub tsev teev dab Dakoos.  

11 Thaum cov tibneeg hauv lub moos Yanpes Kile‑as sawvdaws hnov txhua yam uas cov Filixatees ua rau Sha-ul lub cev tuag,

12 cov txivneej uas siab loj siab tuab sawvdaws txawm sawv tsees mus ib hmos kaj ntug thiab coj Sha-ul thiab Sha-ul cov tub lub cev tuag los rau ntawm lub moos Yanpes. Lawv coj cov pob txha mus faus rau hauv tsob qab ntoo qheb hauv lub moos Yanpes thiab yoo mov tau xya hnub.

13 Sha-ul thiaj tuag vim yog nws lub siab tsis xib rau (יחוח)Yahweh. Nws ua tsis ncaj rau (יחוח)Yahweh, rau qhov nws tsis tuav rawv (יחוח)Yahweh tej lus cob qhia, thiab nws mus hais tus txiv neeb txiv yaig pab saib yaig,

14 thiab nws tsis mus nug (יחוח)Yahweh saib yuav ua li cas. Yog li ntawd

(יחוח)Yahweh thiaj muab nws tua thiab muab kiag lub tebchaws rau Yisais tus tub Daviv kav.