1 VAJ KEEB KWM 14

Daviv Tsev neeg

(2 Xamuyees 5:11-16)

1 Vajntxwv Hilas hauv lub nroog Thailab tso tibneeg xa xov tuaj cuag Daviv thiab xa ntoo ciab thiab cov Kws txua pob zeb thiab cov Kws ntoo tuaj ua lub tsev rau Daviv nyob.  

2 Daviv paub tias (יחוח)Yahweh tau tsa nws ua vajntxwv ruaj khov kav cov Ixayees thiab ua rau nws lub tebchaws vam meej, vim yog saib rau nws haiv neeg Ixayees.

3 Daviv yuav dua niam yau thiab coj tej hluas nkauj los kav rau hauv lub nroog Yeluxalees, thiab yug dua tub thiab ntxhais.  

4 Cov menyuam uas Daviv yug hauv Yeluxalees cov npe yog li no, yog Samu‑as, Saunpam, Nathas, Xalaumoos,

5 Ihas, Elisu‑as, Eepeles,

6 Naukas, Nefes, Yafias,

7 Elisamas, Npe‑eeyadas thiab Elifeles.

​

Daviv Kov Yeej Cov Filixatees

(2 Xamuyees 5:17-25)

8 Thaum cov Filixatees hnov tias Daviv raug tsa ua vajntxwv kav cov Ixayees huvsi, cov Filixatees sawvdaws txawm nce tuaj nrhiav Daviv. Daviv hnov li ntawd nws txawm tawm mus tiv lawv.  

9 Cov Filixatees tau tuaj lwg hauv lub hav Lefa‑is.  

10 Daviv txawm ua nug rau (יחוח)Yahweh tias, kuv yuav mus ntaus cov Filixatees lov? Koj yuav muab lawv rau hauv kuv txhais tes los tsis muab? (יחוח)Yahweh teb Daviv tias, cia li mus, kuv yeej yuav muab lawv rau hauv koj txhais tes.

11 Daviv thiaj mus rau ntawm lub moos Npa‑as Pelaxis mas Daviv kov yeej lawv qhov ntawd, thiab Daviv hais tias, (יחוח)Yahweh siv kuv txhais tes txeem plaws rau kuv cov yeeb ncuab yam li dej txeem plaws mus nyab.  Vim li ntawd lub chaw ntawd thiaj hu ua Npa‑as Pelaxis.

12Lawv thiaj muab lawv tej dab mlom tso tseg rau qhov ntawd mas Daviv hais kom muab tej dab mlom ntawd hlawv huvsi.

13 Cov Filixatees rov qab tuaj lwg hauv lub hav ntawd dua thiab.

14 Thaum Daviv rov qab ua nug rau (יחוח)Yahweh dua ib zaug, (יחוח)Yahweh hais rau nws tias, koj tsis txhob ncaj mus, cia li lug mus ntaus lawv ncaj ntawm cov ntoo zaub kab.

15 Thaum koj hnov suab nrov saum cov ntsis ntoo zaub kab yam li suab uas tub rog mus kev, koj cia li tawm mus ua rog, vim (יחוח)Yahweh tau ua koj ntej tawm mus ntaus Filixatees cov tub rog lawm.  

16 Daviv ua raws li (יחוח)Yahweh hais rau nws, mas ntaus cov Filixatees txij ntua lub moos Kinpe‑oos mus txog ntua lub moos Kexaws.  

17 Daviv lub moo nrov nto moo mus thoob txhua lub tebchaws, thiab (יחוח)Yahweh ua rau txhua haiv neeg ntshai Daviv.