1 VAJ KEEB KWM 16

1 Lawv coj (יחוח)Yahweh lub phij xab los txawb rau hauv lub tsev ntaub uas Daviv twb tsa cia lawd.  Lawv tua tsiaj ua kevcai hlawv xyeem thiab ua kevcai xyeem sib raug zoo rau ntawm (יחוח)Yahweh xub ntiag.

2 Thaum Daviv ua kevcai hlawv xyeem thiab ua kevcai xyeem sib raug zoo tag lawd, nws txawm tuav (יחוח)Yahweh lub npe foom koob hmoov rau cov pejxeem. 3 Thiab nws muab ib leeg ib lub ncuav, ib leeg ib daim nqaij thiab ib lub ncuav txiv hmab qhuav pub rau ib tsoom Ixayees sawvdaws, tsis hais pojniam txivneej. 4 Thiab Daviv tsa cov Levis qee leej ua haujlwm rau ntawm (יחוח)Yahweh lub phij xab, kom lawv thov thiab ua tsaug thiab qhuas (יחוח)Yahweh uas yog cov Ixayees Tus Tswv.   

5 Axas ua tus thawj, tus ob yog Xekhaliyah, thiab muaj Ye‑i‑ees, Semilamaus, Yehi‑ees, Mattithyah, Elias, Npenayah, Aunpes Edoos thiab Ye‑i‑ees ua cov ntaus nkauj nog ncas loj thiab nkauj nog ncas me. Axas yog tus uas npuaj nruas tooj liab,

6 Npenayah thiab Yahaxi‑ees uas ua pov thawj, ua tus tshuab raj xyu ntawm ()- Yahweh lub phij xab sib cog lus txhua txhua zaum mus li.

​

Daviv Txoj Nkauj Uas Qhuas ()Yahweh

(Ntawv Nkauj. 105:1-15,96:1-13, 106:1,47-48)

7 Hnub ntawd yog thawj zaug uas Daviv hais kom Axas thiab nws cov kwvtij hu nkauj ua tsaug rau (יחוח)Yahweh hais tias,

8cia li ua (יחוח)Yahweh tsaug, cia li thov hu nws lub npe, cia li qhia nws tes haujlwm rau txhua haiv neeg.

9 Cia li hu nkauj rau nws, hu nkauj qhuas nws, cia li qhia txog txhua yam hauj lwm tseem ceeb uas nws ua.

10 Cia li qhuas txog nws lub npe uas dawb huv, cia cov uas nrhiav (יחוח)Yahweh zoo siab xyiv fab.

11 Cia li nrhiav (יחוח)Yahweh thiab nrhiav nws lub zog.  Nrhiav nws lub xub ntiag tsis tu li.

12 Cia li nco ntsoov txog tej hauj lwm uas zoo kawg nkaus uas (יחוח)Yahweh tau ua, thiab nws tej txujci tseem ceeb, thiab tej lus uas nws txiav txim. 

13 Ixayees uas yog (יחוח)Yahweh tus tub qhe tej caj ces es, thiab Yakhauj cov tub ki uas (יחוח)Yahweh xaiv es,

14 nws yog (יחוח)Yahweh, yog peb Tus Tswv.  Nws tej lus txiav txim muaj nyob thoob plaws hauv ntiajteb.

15 Nws yeej nco ntsoov nws tej lus cog tseg mus ib txhis, yog tej lus uas nws qhia mus rau ib txhiab tiam tibneeg,

16 yog tej lus uas nws cog tseg rau Anplaham, thiab yog tej uas nws yeem lus cog twv rau Ixaj,

17 yog tej uas (יחוח)Yahweh cog lus ruaj khov cia rau Yakhauj ua kab ke, yog cog rau Ixayees ua lus cog tseg mus ib txhis,

18 hais tias, kuv yuav pub lub tebchaws Khana‑as rau koj, ua nej qub txeeg qub teg mus li.

19 Thaum lawv tseem tsis tau muaj tibneeg coob, thiab lawv tseem muaj tsawg tsawg leej xwb, lawv tsuas yog los ua qhua nyob rau hauv Khana-as teb chaws.

20 Lawv ua lub neej taug kev uas tsuas yog nyob ib lub tebchaws dhau ib lub teb chaws thiab nyob ib lub zos dhau ib lub zos xwb.

21 (יחוח)Yahweh  tsis kheev leejtwg quab yuam lawv, vim saib rau lawv, nws thiaj txwv tej vajntxwv,

22 hais tias, tsis txhob kov tej uas kuv hliv roj tsa lawd thiab tsis txhob ua li cas rau kuv cov xibhwb cev kuv lus.

23 Tag nrho thoob qab ntuj cia li hu nkauj rau (יחוח)Yahweh, cia li qhia nws txojkev cawm dim ib hnub dhau ib hnub.

24 Cia li qhia txog nws lub hwjchim ci ntsa iab rau hauv ib tsoom tebchaws, qhia txog nws tej haujlwm tseem ceeb rau hauv ib tsoom tibneeg sawvdaws.

25 Rau qhov (יחוח)Yahweh yog tus loj kawg thiab tsim nyog qhuas heev, nws txaus ntshai heev dua tej timtswv huvsi.

26 Tibneeg tej timtswv huvsi puav leej yog dab mlom xwb, tiamsis (יחוח)Yahweh yog tus tsim lub ntuj.

27 Koob meej thiab hwjchim meej mom nyob ntawm nws xub ntiag, lub zog thiab kev zoo siab nyob hauv nws lub chaw nyob.

28 Txhua haiv neeg, txhua xeem es, cia li qhuas (יחוח)Yahweh, cia li qhuas tias, (יחוח)Yahweh muaj hwjchim ci ntsa iab thiab muaj zog.

29 Cia li qhuas tias, (יחוח)Yahweh lub npe muaj hwjchim ci ntsa iab uas tsim nyog qhuas kawg li, cia li coj tej uas xyeem tuaj rau ntawm nws xub ntiag, cia li hnav tej tsoos uas dawb huv pe hawm (יחוח)Yahweh.  

30 Tag nrho lub ntiajteb, cia li tshee nyho rau ntawm nws xub ntiag.  Lub ntiajteb yeej nyob ruaj khov yuav tsis ua zog kiag li.

31 Lub ntuj cia li zoo siab, lub ntiajteb cia li lom zem. Cia li hais rau hauv ib tsoom teb chaws tias, (יחוח)Yahweh ua vajntxwv kav.

32 Dej hiavtxwv thiab txhua yam uas nyob hauv cia li qw nrov ntsoog qees.  Tej teb thiab txhua yam uas nyob hauv cia li qw zoo siab.

33 Tej xyoob ntoo hauv hav zoov yuav hu nkauj zoo siab rau ntawm (יחוח)Yahweh xub ntiag, vim yog nws yuav los txiav txim rau ntiajteb.  

34 Cia li ua (יחוח)Yahweh tsaug, vim nws zoo kawg.  Nws txojkev hlub ruaj khov nyob mus ib txhis.

35 Thiab nej cia li hais tias, Au (יחוח)Yahweh uas cawm peb dim, thov koj tso peb dim, thov qaws peb thiab cawm peb dim hauv txhua lub tebchaws rov los es peb yuav ua tsaug rau koj lub npe uas dawb huv thiab qhuas qhov uas peb qhuas koj.

36 Cia li qhuas (יחוח)Yahweh uas yog Ixayees Tus Tswv ib txwm thaum ub los mus ib txhis.  Mas cov pejxeem huvsi hais tias, Amees thiab qhuas (יחוח)Yahweh.

​

Tsa Cov Levis Ua Haujlwm Ntawm Lub Phij Xab

37 Daviv txawm cia Axas thiab nws cov kwvtij nyob ntawm (יחוח)Yahweh lub phij xab sib cog lus es ua haujlwm qhov ntawd mus raws li uas niaj hnub yuav tau ua, 38 thiab Aunpes Edoos thiab nws cov kwvtij rau caum yim leej kuj nyob ntawd. Yeduthus tus tub Aunpes Edoos thiab Hauxas ua cov zov tej rooj loog.

39 Daviv kom pov thawj Xadaus thiab nws cov kwvtij uas ua pov thawj nyob ntawm (יחוח)Yahweh lub tsev ntaub uas nyob ntawm lub chaw siab pe (יחוח)Yahweh hauv lub moos Kinpe‑oos,

40 es lawv yuav ua kevcai hlawv huvsi xyeem rau (יחוח)Yahweh saum lub thaj uas hlawv xyeem thaum sawv ntxov thiab thaum yuav tsaus ntuj mus li, raws li uas twb sau cia huvsi rau hauv (יחוח)Yahweh tej kevcai uas tau hais rau cov Ixayees lawm.  

41 Hemas thiab Yeduthus thiab cov uas raug xaiv npe nrog lawv nyob ntawd, yog cov uas yuav ua (יחוח)Yahweh tsaug, rau qhov nws txojkev hlub ruaj khov nyob mus ib txhis tsis kawg.

42 Hemas thiab Yeduthus muaj raj xyu thiab nruas npuaj tooj liab uas yuav ntaus, thiab muaj cuab yeej uas ntaus phim nkauj qhuas (יחוח)Yahweh.  Yeduthus cov tub raug tsa ua cov zov tej rooj loog.

43 Cov pejxeem sawvdaws txawm nyias rov mus rau nyias tsev lawm, mas Daviv kuj rov qab mus tsev thiab foom koob hmoov rau nws tsev neeg.