Cov Tebchaws Uas Daviv Kov Yeej

(2 Xamuyees 8:1-14)

1 Dhau ntawd Daviv ntaus yeej cov Filixatees thiab tswjhwm lawv.  Daviv txeeb tau lub moos Nkas thiab tej zej zog ib ncig lub moos ntawm cov Filixatees txhais tes.

2 Nws ntaus yeej cov Mau‑as mas cov Mau‑as kuj zwm rau Daviv thiab coj qhov txhia chaw tuaj them se rau nws.

3 Daviv kuj ntaus yeej Hadadexaws uas ua vajntxwv hauv lub moos Xaunpas ncaj mus txog lub moos Hamas, yog lub sijhawm uas Hadadexaws mus tsa cov tub rog zov ntawm tus dej Yufetis.

4 Daviv txeeb tau cov tsheb ua rog ntawm Hadadexaws ib txhiab lub thiab cov tub rog caij nees xya txhiab leej thiab cov tub rog mus kotaw nees nkaum txhiab leej, thiab Daviv txiav cov nees uas cab tsheb ua rog leeg raws huvsi, tseg kom txaus cab ib puas lub tsheb ua rog xwb.

5 Thaum cov tibneeg Alas uas nyob hauv lub nroog Damaxakas tuaj pab Xaunpas tus vajntxwv Hadadexaws, mas Daviv tua cov Alas nees nkaum ob txhiab leej.

6 Daviv tsa ib co tub rog zov kav cov Alas hauv lub nroog Damaxakas. Cov Alas zwm rau Daviv thiab coj qhov txhia chaw tuaj them se rau nws. (יחוח)Yahweh pub Daviv kov yeej rau txhua qhov uas nws mus.  

7 Thiab Daviv txeeb tau daim phiaj kub uas thaiv hauv siab uas Hadadexaws cov tub teg tub taws coj, thiab coj mus rau lub nroog

Yeluxalees.

8 Thiab Daviv txeeb tau tooj liab ntau heev ntawm lub moos Thihas thiab lub moos Khuj uas yog Hadadexaws tej moos. Mas Xalaumoos muab cov tooj liab ntawd ua lub rhawv dej tooj liab thiab cov ncej thiab tej twj siv uas yog tooj liab. 9 Thaum vajntxwv Thus hauv lub moos Hamas hnov tias Daviv tau ntaus yeej lub moos Xaunpas tus vajntxwv Hadadexaws cov tub rog huvsi lawm.

10 Thus txawm txib nws tus tub Hadaulas mus cuag vajntxwv Daviv, mus hais ib lo lus tshav ntuj zoo siab rau nws, rau qhov uas Daviv tau ua rog thiab kov yeej Hadadexaws lawm, rau qhov Hadadexaws pheej ua rog rau Thus. Mas Thus xa ntau yam uas xuas nyiaj, xuas kub, xuas tooj liab ua tuaj pub rau Daviv. 

11 Vajntxwv Daviv muab txhua yam no xyeem pub rau (יחוח)Yahweh, thiab muab tej nyiaj kub uas nws muab tau ntawm txhua haiv neeg uas nws kov yeej xyeem pub rau (יחוח)Yahweh, yog tej uas nws txeeb tau ntawm cov Edoos, cov Mau‑as, cov Asmoos, cov Filixatees thiab cov Amalej.

12 Xeluyah tus tub Anpisais mus tua cov Edoos tuag kaum yim txhiab leej hauv lub hav Ntsev.

13 Thiab nws tso tub rog zov kav tebchaws Edoos. Cov tibneeg Edoos sawvdaws thiaj zwm rau Daviv. (יחוח)Yahweh pub Daviv kov yeej rau txhua qhov uas nws mus.

​

Cov Uas Ua Daviv Li Haujlwm

(2 Xamuyees 8:15-18)

14 Mas Daviv kav tag nrho cov Ixayees huvsi.  Daviv ua ncaj ua ncees thiab ua zoo rau nws cov pejxeem sawvdaws.

15 Xeluyah tus tub Yahas ua thawj kav tub rog.  Ahilus tus tub Yahsafas ua tus uas sau ntawv keeb kwm.

16 Ahithus tus tub Xadaus thiab Anpiyathas tus tub Ahimelej ua pov thawj. Sasas ua tus tub sau ntawv.

17 Yahyadas tus tub Npenayah kav cov Khelethis thiab cov Pelethis. Thiab Daviv cov tub ua cov nom tswv loj uas ua vajntxwv tej haujlwm.