1 VAJ KEEB KWM 19

Daviv Kov Yeej Cov Asmoos  Thiab Cov Alas

(2 Xamuyees 10:1-19)

1 Dhau ntawd los cov Asmoos tus vajntxwv Nahas txawm tuag mas nws tus tub ua vajntxwv nyob nws chaw.

2 Daviv txawm hais tias, kuv yuav ua ncaj ua zoo rau Nahas tus tub Hanus rau qhov nws txiv tau ua ncaj ua zoo rau kuv. Daviv thiaj tso cov tub xa xov mus nplij Hanus siab, vim nws txiv tuag lawm. Mas Daviv cov tub teg tub taws thiaj mus cuag Hanus hauv cov Asmoos tebchaws es yuav mus nplij nws siab.

3 Tiamsis cov Asmoos cov thawj hais rau Hanus tias, koj xav hais tias Daviv xa tibneeg tuaj nplij koj ces yog nws hwm koj txiv no lov? Sub tsis yog nws cov tub teg tub taws tuaj cuag koj es yuav saib thiab tshuaj saib thiab rhuav peb lub tebchaws os?

4 Hanus txawm ntes Daviv cov tub teg tub taws thiab muab lawv hwj txwv chais thiab muab lawv lub tsho txiav txij ntawm lub ntsag rau yav hauv pov tseg, thiab muab lawv tso mus,

5 ces lawv txawm rov qab los.  Thaum muaj tibneeg mus hais rau Daviv paub txog cov tibneeg no mas nws thiaj txib tibneeg mus tos lawv, rau qhov lawv raug kev txaj muag heev.  Vajntxwv thiaj hais tias, nej cia li so ntawm lub moos Yelikhaus mus txog thaum nej cov hwj txwv tuaj tso mam li los.

6 Thaum cov Asmoos paub tias lawv ua rau Daviv ntxub lawv lawm, Hanus thiab cov Asmoos txawm xa ib txhiab talas mus ntiav cov tsheb ua rog thiab cov tub rog caij nees ntawm Alas Nahala‑is tebchaws thiab ntawm lub moos Alama‑akhas thiab lub moos Xaunpas.  

7 Lawv ntiav peb caug ob txhiab lub tsheb ua rog thiab ntiav tus vajntxwv hauv lub moos Ma‑akhas thiab nws cov tub rog, mas lawv tuaj ua yeej ze rau ntawm lub moos Mede-npas. Thiab cov Asmoos txhij tub rog ntawm lawv tej moos tuaj ua ke es tuaj ua rog.  

8 Thaum Daviv hnov tej no lawd nws txawm txib Yahas thiab cov tub rog siab tuab huvsi mus.

9 Cov Asmoos kuj tawm tuaj npaj tub rog rau ntawm txojkev uas nkag rau hauv lub moos, thiab cov vajntxwv uas tuaj mas lawv nyob dua ib cag tom hav nroj.

10 Thaum Yahas pom tias luag npaj tub rog rau tom nws hauv ntej thiab npaj tub rog rau tom nws qub qab, nws txawm xaiv pab tub rog Ixayees uas txawj tshaj plaws qee leej thiab tso lawv mus tiv cov Alas.

11 Dua li cov, nws muab cob rau nws tus kwv Anpisais kav mas cov no npaj mus tiv cov Asmoos.

12 Yahas hais tias, yog cov Alas muaj zog heev dua kuv, koj cia li tuaj pab kuv, hos yog cov Asmoos muaj zog heev dua koj mas kuv yuav tuaj pab koj.

13 Cia li ua siab tuab, peb cia li ua siab loj yam li txivneej yawg pab peb haiv neeg thiab pab peb Txiv (יחוח)Yahweh tej moos. Thov (יחוח)Yahweh ua raws li nws pom zoo.

14 Ua li ntawd mas Yahas thiab cov tub rog uas nrog nws thiaj li txeem mus ze ua rog rau cov Alas, mas cov Alas thiaj khiav thim zuj zus tom nws hauv ntej.  

15 Thaum cov Asmoos pom cov Alas khiav lawm ces lawv txawm khiav ntawm Yahas tus kwv Anpisais hauv ntej ib yam nkaus thiab nkag mus rau hauv lub moos. Ces Yahas txawm rov qab los rau Yeluxalees.  

16 Thaum cov Alas pom tias lawv swb cov Ixayees lawm, lawv txawm txib tib neeg mus coj cov tibneeg Alas uas nyob sab dej Yufetis hnub tuaj tawm tuaj. Hadadexaws tus thawj rog Saufas coj lawv kev.

17 Thaum muaj tibneeg hais rau Daviv paub mas nws sau zog cov Ixayees sawvdaws tuaj ua ke hla tus dej Yaladees mus cuag lawv thiab npaj tub rog tiv lawv. Thaum Daviv npaj tub rog tiv cov Alas mas lawv kuj ua rog rau nws.  

18 Cov Alas kuj thim khiav cov Ixayees mas Daviv tua tau Alas cov tub rog hauv tsheb ua rog tuag xya txhiab leej thiab tua tau cov tub rog mus kotaw tuag plaub caug txhiab leej thiab tua tau lawv tus thawj rog Saufas tuag thiab.

19 Mas thaum Hadadexaws cov tub teg tub taws pom tias lawv swb cov Ixayees lawm, lawv kuj nrog Daviv sib raug zoo thiab zwm rau nws. Vim li no cov Alas thiaj tsis kam pab cov Asmoos dua li lawm.