Daviv Txeeb Lub Nroog Lanpas

(2 Xamuyees 11:1,12:26-31)

1 Thaum txog lub caij ntuj nag uas yog lub caij uas tej vajntxwv pheej tawm mus ua rog, Yahas coj tub rog mus ntaus yeej cov Asmoos lub tebchaws, thiab vij lub nroog Lanpas cia. Tiamsis Daviv nyob hauv Yeluxalees xwb. Mas Yahas ntaus tau lub nroog Lanpas thiab muab lub nroog ntawd ua puam tsuaj tag.

2 Daviv hle lub mom kub ntawm lawv tus vajntxwv lub taubhau los. Daviv muab luj mas muaj kub nyhav ib talas thiab muaj ib lub qe zeb hlaws muaj nqis nyob rau hauv. Lawv muab lub mom kub ntawd rau Daviv ntoo. Daviv sau tej qhov txhia chaw uas txeeb tau hauv lub nroog ntawd ntau kawg li coj mus.

3 Nws kuav cov tibneeg hauv lub nroog ntawd tawm los thiab yuam kom lawv xuas kaw, xuas hlau, xuas taus ua haujlwm. Daviv ua ib yam li no rau cov Asmoos txhua lub moos huvsi. Ces Daviv thiab cov tub rog sawvdaws rov mus rau hauv Yeluxalees lawm.

​

Ua Rog Rau Cov Filixatees

(2 Xamuyees 21:15-22)

4 Dhau ntawd rov qab ua rog rau cov Fili-xatees ntawm lub moos Kexaws. Zaum ntawd Xinpekhais uas yog Husas cum tua tau Xiphais uas yog cov tibneeg loj loj siab siab cov noob.  Mas cov Filixatees thiaj swb lawm.

5 Thiab rov qab ua rog rau cov Filixatees. Mas zaum ntawd Ya‑is tus tub Eehanas tau tua Lamis uas yog Kaulias uas yog tibneeg Nkas tus kwv lawm. Lamis rab hmuv tus ko luaj li rab nqos ntos ntaub.

6 Thiab rov qab ua rog ntawm lub moos Nkas, yog lub moos uas muaj ib tug txivneej loj kawg li, muaj rau tus ntiv tes thiab rau tus ntiv taw, huvsi muaj nees nkaum plaub tug ntiv tes ntiv taw.  Nws yog cov tibneeg loj loj siab siab cov noob.  

7 Thaum nws twv ntxhias cov Ixayees mas Daviv tus tijlaug Sime‑is tus tub Yahnathas kuj muab nws tua kiag.

8 Cov tibneeg no yog cov tibneeg loj loj siab siab hauv lub moos Nkas cov noob. Lawv tuag tag rau Daviv tes thiab tuag rau Daviv cov tub teg tub taws tes.