1 Thaum Daviv muaj hnub nyoog ntau thiab laus heev lawm, nws tsa nws tus tub Xalaumoos ua vajntxwv kav Ixayees.

​

Cov Levis Tej Haujlwm

2 Daviv hu Ixayees cov thawj sawvdaws thiab cov pov thawj thiab cov Levis tuaj txoos ua ke.

3 Cov Levis uas hnub nyoog muaj peb caug xyoo rov saud mas suav tau muaj peb caug yim txhiab leej.  

4 Daviv hais tias, cov Levis no mas nees nkaum plaub txhiab leej yuav saib xyuas tej haujlwm hauv (יחוח)Yahweh lub tuam tsev thiab rau txhiab leej yuav ua cov nom tswv thiab cov tu plaub.

5 Thiab plaub txhiab leej yuav ua cov zov tej rooj loog, thiab plaub txhiab leej yuav hu nkauj qhuas (יחוח)Yahweh thiab siv tej cuab yeej phim nkauj uas kuv twb npaj tau cia qhuas (יחוח)Yahweh.

6 Mas Daviv muab lawv faib ua peb pab raws li Levis peb tug tub, yog Kawsoos, Khauhas thiab Melalis.

7 Kawsoos cov tub yog Ladas thiab Sime‑is.

8 Ladas muaj peb tug tub, yog Yehi‑ees uas ua tus thawj, thiab Xethas thiab Yahees.

9 Sime‑is muaj peb tug tub, yog Selaumaus, Haxi‑ees thiab Halas.  No yog cov ua thawj hauv cum Ladas tej yim.  

10 Sime‑is cov tub yog Yahas, Xinas, Ye‑us thiab Npeliyas. Cov no yog Sime‑is plaub tug tub.

11 Yahas ua tus thawj, Xinas ua tus ob. Tiamsis Ye‑us thiab Npeliyas tsis muaj tub coob, yog li ntawd thiaj suav lawv ua ib yig xwb.

12 Khauhas muaj plaub tug tub, yog Alav, Ixahas, Henploos thiab Uxi‑ees. 13 Alav cov tub yog Aloos thiab Mauxes, Aloos raug tsa ua tus uas muab tej qhov txhia chaw dawb huv kawg nkaus cais pub rau (יחוח)Yahweh, nws thiab nws cov tub yuav hlawv cov hmoov tshuaj tsw qab rau ntawm (יחוח)Yahweh xub ntiag thiab ua koom tu nws thiab tuav nws lub npe foom koob hmoov mus ib txhis tsis kawg.  

14 Mauxes uas yog (יחוח)Yahweh tus tibneeg cov tub muab suav rau hauv xeem Levis.  

15 Mauxes ob tug tub yog Kawsoos thiab Eliyexaws.

16 Kawsoos cov tub yog Senpu‑ees uas ua tus thawj.

17 Eliyexaws tus tub yog Lekhanpiyah uas ua tus thawj. Eliyexaws tsis muaj dua lwm tus tub lawm, tiamsis Lekhanpiyah muaj tub coob heev li.

18 Ixahas tus tub yog Selaumis uas ua tus thawj.

19 Henploos cov tub yog Yeliyah uas ua tus thawj, Amaliyah ua tus ob, Yahaxi‑ees ua tus peb thiab Yekhame‑as ua tus plaub.  

20 Uxi‑ees cov tub yog Mikhayah uas ua tus thawj thiab Yesiyah ua tus ob.

21 Melalis cov tub yog Malis thiab Musis. Malis cov tub yog Ele‑axas thiab Khij.

22 Ele‑axas tuag lawm tsis muaj tub tiamsis muaj ntxhais xwb. Khij cov tub yuav cov ntxhais ntawd uas yog lawv cov muam.

23 Musis muaj peb tug tub, yog Malis, Edaws thiab Yelemaus.

24 Cov no yog Levis cov tub raws li lawv tej cum, thiab yog cov thawj hauv tej yim raws li lawv tau nce npe cia, yog cov uas tau txheeb npe thiab hnub nyoog muaj nees nkaum xyoo rov saud es yuav ua hauj lwm hauv (יחוח)Yahweh lub tuam tsev.

25 Rau qhov Daviv hais tias, (יחוח)Yahweh uas yog cov Ixayees Tus Tswv tau pub kom nws haiv neeg nyob tso siab plhuav, thiab nws nyob hauv Yeluxalees mus ib txhis.

26 Mas cov Levis tsis txog kwv lub tsev ntaub thiab tej twj uas siv ua haujlwm rau hauv li lawm.

27 Raws li Daviv tau hais thaum kawg cov Levis uas hnub nyoog nees nkaum xyoo rov saud, raug txheeb npe xwb.

28 Tej haujlwm uas lawv yuav tau ua yog pab Aloos cov tub ua tej haujlwm hauv (יחוח)Yahweh lub tuam tsev, thiab saib tej tshav puam thiab tej chav tsev, thiab tu tej twj siv dawb huv kom txhob qias tsis huv, thiab txhua yam haujlwm uas ua rau (יחוח)Yahweh lub tuam tsev.

29 Thiab lawv yuav pab npaj cov ncuav uas xyeem txawb rau ntawm (יחוח)Yahweh xub ntiag, thiab cov hmoov mog uas ua kevcai xyeem qoob loo, thiab tej daim ncuav tsis xyaw keeb nyias nyias, thiab tej daim ncuav ci, thiab cov roj ntse qhov txhia chaw xyeem, thiab txhua yam uas siv ntsuas thiab luj.

30 Txhua txhua tagkis mas lawv yuav sawv ua tsaug thiab qhuas (יחוח)Yahweh, thiab thaum yuav tsaus ntuj kuj ua ib yam nkaus li,

31 thiab ua rau lub sijhawm uas ua kevcai hlawv huvsi xyeem rau (יחוח)Yahweh rau hnub Sabbath thiab hnub hli xiab thiab hnub uas ua kevcai npaj noj npaj haus raws li txhua lub sijhawm uas teem cia, mas lawv yuav ua rau ntawm (יחוח)Yahweh xub ntiag mus ib txhis li.

32 Ua li ntawd mas lawv yuav saib thiab tu lub tsev ntaub sib ntsib thiab lub chaw pe hawm (יחוח)Yahweh thiab pab Aloos cov tub uas yog lawv cov kwvtij ua tej haujlwm hauv (יחוח)Yahweh lub tuam tsev.