Cov Uas Zov Qhov Rooj

1 Tej pab uas zov tej rooj loog yog li no.  Khaulas caj ces yog Khaules tus tub Meselemiyah uas yog Axas cum.

2 Meselemiyah muaj tub, tus hlob yog Xekhaliyah, tus ob yog Yediya‑ees, tus peb yog Xenpadiyah, tus plaub yog Yani‑ees,

3 tus tsib yog Elas, tus rau yog Yahkanas, tus xya yog Eeyahenais.

4 Thiab Aunpes Edoos muaj tub, tus hlob yog Semayah, tus ob yog Yaxanpas, tus peb yog Yahav, tus plaub yog Xakhas, tus tsib yog Nethanees,

5 tus rau yog Ami‑ees, tus xya yog Ixakhas, tus yim yog Pe‑ulethais, rau qhov (יחוח)Yahweh foom koob hmoov rau nws.

6 Thiab nws tus tub Semayah kuj muaj tub uas ua thawj hauv tej yim, rau qhov lawv yog cov uas muaj peev xwm heev.

7 Semayah cov tub yog Aunis, Lefa‑ees, Aunpes thiab Eexanpas, thiab lawv cov kwvtij uas muaj peev xwm yog Elihus thiab Xemakhiyah.

8 Cov no huvsi yog Aunpes Edoos cov tub ki xeeb ntxwv thiab nws cov kwvtij, yog cov uas muaj peev xwm txaus ua tau (יחוח)Yahweh tes haujlwm.

Aunpes Edoos cov no huvsi muaj rau caum ob leeg.

9 Meselemiyah muaj tub thiab kwvtij uas muaj peev xwm huvsi kaum yim leej.

10 Hauxas uas yog Melalis caj ces muaj tub, yog Silis uas ua tus thawj. Txawm yog nws tsis yog tus tub hlob los nws txiv tsa nws ua tus thawj.

11 Hikhiyah yog tus ob, Thenpa-liyah yog tus peb, Xekhaliyah yog tus plaub. Hauxas cov tub thiab cov kwvtij huvsi muaj kaum peb leeg.

12 Cov uas zov tej rooj loog no muab faib ua tej pab raws li lawv cov thawj coj mas muaj haujlwm uas lawv yuav tau ua koom hauv (יחוח)Yahweh lub tuam tsev ib yam li lawv cov kwvtij.

13 Lawv rho ntawv raws li lawv tej yim saib yim twg yuav nyob lub rooj loog twg, txawm yog yim muaj coob muaj tsawg los ib yam nkaus.

14 Rho daim ntawv zov lub rooj loog sab hnub tuaj mas tau Selemiyah. Lawv rho ntawv rau nws tus tub Xekhaliyah uas muaj tswvyim thiab txawj ntse heev. Lawv rho tau rau nws zov sab ped.

15 Aunpes Edoos rho tau daim ntawv zov lub rooj loog sab nrad mas nws cov tub rho tau daim ntawv zov lub txhab uas khaws qhov txhia chaw.

16 Supis thiab Hauxas rho tau daim ntawv zov sab hnub poob ntawm lub Rooj Loog Salekhes ntawm txojkev uas nce toj.  Lawv faib ua tej pab sib hloov zov raws li uas teem cia.

17 Sab hnub tuaj muaj rau leej zov txhua hnub, sab ped muaj plaub leeg zov txhua hnub, sab nrad muaj plaub leeg zov txhua hnub, thiab ob khub zov lub txhab khaws qhov txhia chaw.

18 Ntawm qab khav sab hnub poob mas muaj plaub leeg zov ntawm txojkev thiab ob leeg zov ntawm qab khav.

19 Cov no yog tej pab uas zov tej rooj loog uas yog Khaulas caj ces thiab Melalis caj ces.

​

Cov Uas Ua Lwm Yam Haujlwm Hauv (יחוח)Yahweh Lub Tuam Tsev

20 Cov Levis mas Ahiyah ua tus uas saib xyuas tej txhab nyiaj hauv (יחוח)Yahweh lub tuam tsev thiab tej txhab rau qhov txhia chaw uas luag xyeem pub rau (יחוח)Yahweh.

21 Kawsoos caj ces uas yog Ladas cum mas cov thawj hauv tej cum yog Yehi‑elis,

22 thiab Yehi‑elis cov tub uas yog Xethas thiab Xethas tus kwv Yahees, lawv yog cov uas saib xyuas tej txhab nyiaj hauv (יחוח)Yahweh lub tuam tsev.

23 Alav cum, Ixahas cum, Henploos cum thiab cum Uxi‑ees, 

24 muaj Senpu‑ees uas yog Mauxes tus tub Kawsoos li caj ces, nws ua tus thawj saib xyuas tej txhab nyiaj.

25 Thiab nws cov kwvtij yog li no, Eliyexaws caj ces yog Eliyexaws tus tub Lekhanpiyah, Lekhanpiyah tus tub Yesayah, Yesayah tus tub Yahlas, Yahlas tus tub Xikhis, thiab Xikhis tus tub Selaumaus.

26 Tus Selaumaus no thiab nws cov kwvtij yog cov uas saib xyuas tej txhab nyiaj rau tej qhov txhia chaw uas xyeem pub rau (יחוח)Yahweh huvsi uas vajntxwv Daviv thiab cov thawj hauv tej cum thiab cov thawj kav ib txhiab leej, cov thawj kav ib puas leej thiab cov thawj kav cov tub rog tau xyeem pub rau (יחוח)Yahweh.  

27 Tej qhov txhia chaw uas thaum lawv mus ua rog es txeeb tau los, lawv tau muab ib txhia pub tseg cia siv kho (יחוח)Yahweh lub tuam tsev.

28 Thiab txhua yam uas Xamuyees uas hais pom tom hauv ntej thiab Khij tus tub Sha-ul thiab Naws tus tub Anaws thiab Xeluyah tus tub Yahas tau xyeem pub rau (יחוח)Yahweh mas Selaumaus thiab nws cov kwvtij ua cov uas saib xyuas huvsi.

29 Ntawm Ixahas cum mas Khenaniyah thiab nws cov tub raug tsa ua haujlwm sab nraum (יחוח)Yahweh lub tuam tsev rau cov Ixayees.  Lawv ua cov nom tswv thiab cov tu plaub.

30 Henploos cum mas Hasanpiyah thiab nws cov kwvtij muaj ib txhiab xya pua leej uas muaj peev xwm ua cov uas saib thiab tu (יחוח)Yahweh tej haujlwm huvsi thiab saib xyuas vajntxwv tej haujlwm hauv Ixayees tebchaws, txij ntua tus dej Yaladees mus rau sab hnub poob.

31 Henploos cum mas muaj Yeliyah uas yog Henploos cum tus thawj raws li lawv keeb kwm caj ces uas sau cia. Xyoo plaub caug uas Daviv ua vajntxwv kav, lawv tau tshuaj nrhiav mas ntsib cov txivneej Henploos uas muaj peev xwm heev hauv lub moos Yaxaws hauv tebchaws Kile‑as.

32 Vajntxwv Daviv tau tsa Yeliyah thiab nws cov kwvtij ob txhiab xya puas leej uas muaj peev xwm thiab ua cov thawj hauv tej yim ua cov uas saib xyuas xeem Lunpees thiab xeem Nkas thiab ib nrab xeem Manaxes, txog txhua yam uas ntsig txog (יחוח)Yahweh thiab saib xyuas vajntxwv tej haujlwm.