Cov Uas Ua Thawj Kav Tub Rog

1 No yog cov Ixayees tej npe, yog cov thawj hauv tej cum, cov thawj kav ib txhiab leej, cov thawj kav ib puas leej thiab tej nom tswv uas pab vajntxwv tu haujlwm uas ntsig txog tej pab tub rog uas sib hloov zov tebchaws. Txhua txhua lub hli hauv ib xyoos mas ib lub hlis ib pab uas mus ua haujlwm muaj 24,000 leej.

2 Pab ib zov lub ib hlis mas yog Xadi‑ees tus tub Yasaunpe‑as ua tus uas kav.  Nws pab muaj 24,000 leej.

3 Nws yog Peles caj ces thiab ua tus thawj kav cov thawj tub rog huvsi rau lub ib hlis.  

4 Daudais uas yog cum Ahau‑as ua tus uas kav pab uas zov lub ob hlis.  Nws pab muaj 24,000 leej. 

5 Tus thawj uas kav pab peb rau lub peb hlis yog pov thawj Yahyadas tus tub Npenayah. Nws ua tus thawj thiab nws pab muaj 24,000 leej.

6 Tus Npenayah no yog ib tug hauv pab peb caug tus tub rog thiab nws yog tus thawj kav pab peb caug leej ntawd. Nws tus tub Amixanpas yog tus uas saib xyuas nws pab tub rog.

7 Yahas tus kwv Axahees ua tus kav pab plaub rau lub plaub hlis. Thaum dua nws lawd, nws tus tub Xenpadiyah sawv nws chaw kav lawv.  Nws pab muaj 24,000 leej.

8 Tus thawj kav pab tsib rau lub tsib hlis yog Sahus uas yog Ixahas cum.  Nws pab muaj 24,000 leej.

9 Tus thawj kav pab rau rau lub rau hli yog Ilas uas yog Ikhes hauv moos Thekhau‑as tus tub.  Nws pab muaj 24,000 leej.

10 Tus thawj kav pab xya rau lub xya hli yog Helexis uas yog tibneeg hauv moos Pelaus yog xeem Efa‑is. Nws pab muaj 24,000 leej.

11 Tus thawj kav pab yim rau lub yim hli yog Xinpekhais uas yog Husas cum hauv Xelag caj ces. Nws pab muaj 24,000 leej.

12 Tus thawj kav pab cuaj rau lub cuaj hlis yog Anpiyexaws hauv lub moos Anathaus yog xeem Npeeyamees. Nws pab muaj 24,000 leej.

13 Tus thawj kav pab kaum rau lub kaum hli yog Mahalais hauv lub moos Nethaufas yog Xelag caj ces.  Nws pab muaj 24,000 leej.

14 Tus thawj kav pab kaum ib rau lub kaum ib hlis yog Npenayah hauv lub moos Pilathoos xeem Efa‑is.  Nws pab muaj 24,000 leej.

15 Tus thawj kav pab kaum ob rau lub kaum ob hlis yog Heedais hauv lub moos Nethaufas yog Auni‑ees caj ces. Nws pab muaj 24,000 leej.

​

Cov Thawj Hauv Txhua Xeem

16 Cov thawj uas kav cov Ixayees txhua xeem yog li no.  Xeem Lunpees yog Xikhis tus tub Eliyexaws ua tus thawj. Xeem Xime‑oos yog Ma‑akhas tus tub Sefathiyah.

17 Xeem Levis yog Khemu‑ees tus tub Hasanpiyah. Aloos caj ces yog Xadaus.  

18 Xeem Yahdah yog Elihus uas yog Daviv ib tug tijlaug.  Xeem Ixakhas yog Mikha‑ees tus tub Oolis.

19 Xeem Xenpuloos yog Obad-yah tus tub Isamayah. Xeem Nathalis yog Axali‑ees tus tub Yelemaus.

20 Xeem Efa‑is yog Axaxiyah tus tub Hause‑as. Ib nrab xeem Manaxes yog Pedayah tus tub Yahees.

21 Ib nrab xeem Manaxes uas nyob hauv Kile‑as tebchaws yog Xekhaliyah tus tub Idaus.  Xeem Npeeyamees yog Anaws tus tub Ya‑axi‑ees.  

22 Xeem Daj yog Yelauhas tus tub Axalees.  Cov no yog Ixayees txhua xeem cov thawj.

23 Cov uas hnub nyoog tsis tau txog nees nkaum xyoo mas Daviv tsis txheeb npe, rau qhov (יחוח)Yahweh tau cog lus tseg hais tias, yuav ua kom cov Ixayees muaj coob yam li cov hnub qub saum nruab ntug.  

24 Xeluyah tus tub Yahas pib suav uas suav tsis tau tag. Mas kev npau taws kuj poob rau saum cov Ixayees, vim qhov uas lawv suav ntawd, ces txawm tsis sau muaj npaum li cas cia rau hauv phau ntawv uas sau vajntxwv Daviv li keeb kwm.

 

Daviv Cov Nom Tswv

25 Adi‑ees tus tub Amaves ua tus uas saib xyuas vajntxwv tej txhab nyiaj. Uxiyah tus tub Yahnathas ua tus saib xyuas tej txhab ntim qhov txhia chaws tseem ceeb hauv tej moos thiab hauv tej zej zog thiab hauv tej chaw zov khuav thoob tebchaws.

26 Khelus tus tub Exalis ua tus uas saib xyuas cov uas ua liaj ua teb.

27 Sime‑is hauv lub moos Lamas ua tus uas saib xyuas tej vaj txiv hmab.  Xadis hauv lub moos Sefas ua tus uas saib xyuas tej vaj txiv hmab uas ua cawv txiv hmab uas yuav khaws cia.

28 Npa‑as Hanas hauv lub moos Kedaws ua tus uas saib xyuas cov ntoo txiv aulib thiab cov ntoo txiv cev uas nyob ntawm tej pov roob Sefelas. Yahas ua tus uas saib xyuas tej chaw khaws roj.

29 Silais uas nyob hauv tebchaws Saloos ua tus uas saib xyuas tej pab nyuj uas nrhiav noj hauv Saloos.  Alais tus tub Safas ua tus saib xyuas tej pab nyuj hauv tej nras tiaj.

30 Aunpis uas yog tibneeg Isama‑ees ua tus uas saib xyuas cov ntxhuav. Yedeyah hauv lub moos Melaunaus ua tus uas saib xyuas cov nees luav. Yaxis uas yog tibneeg Hakas ua tus saib xyuas tej pab yaj pab tshis.

31 Cov no puav leej yog cov nom tswv uas saib xyuas txhua yam uas yog vajntxwv Daviv li.

32 Yahnathas uas yog Daviv tus yawg laus ua lub chaw sablaj, yog ib tug tuav xam uas muaj tswvyim zoo txawj ntse thiab yog tus tub sau ntawv. Nws thiab Hamaunis tus tub Yehi‑ees ua cov uas tu vajntxwv cov tub.

33 Ahithaufees ua vajntxwv lub chaw sablaj.  Husais uas yog Akhis cum ua vajntxwv tus phooj ywg.

34 Thaum dhau Ahithaufees mas Npenayah tus tub Yahyadas thiab Anpiyathas nkawv sawv nws chaw ua haujlwm. Yahas ua tus thawj kav vajntxwv cov tub rog huvsi.