Daviv Qhia Kom Xalaumoos Ua (יחוח)Yahweh Lub Tuam Tsev

1 Daviv hu Ixayees cov nom tswv huvsi tuaj txoos ua ke rau hauv Yeluxalees, yog cov thawj hauv txhua xeem thiab cov thawj uas kav tej pab uas ua vajntxwv tej haujlwm, cov thawj kav ib txhiab leej thiab cov thawj kav ib puas leej, thiab cov nom tswv uas saib xyuas txhua yam uas yog vajntxwv li, thiab saib xyuas vajntxwv thiab vajntxwv cov tub tej pab tsiaj, thiab cov nom tswv uas ua haujlwm hauv vajntxwv lub tsev, thiab cov tub rog thiab cov tub rog uas tau ua rog lawd huvsi.

2 Mas vajntxwv Daviv sawv ntsug thiab hais tias, kuv cov kwvtij thiab kuv cov pejxeem, cia li mloog kuv hais.  Kuv twb xav hauv siab tias yuav ua ib lub tuam tsev rau (יחוח)Yahweh lub phij xab sib cog lus nyob thiab ua lub tiag taw rau peb Tus Tswv. Mas kuv twb npaj qhov txhia chaw uas yuav ua cia lawm.

3 Tiamsis (יחוח)Yahweh hais rau kuv tias, koj tsis txhob ua lub tuam tsev rau kuv lub npe nyob, rau qhov koj yog ib tug tub rog thiab tau tua tibneeg ua rau ntshav los.

4 Txawm yog li ntawd los (יחוח)Yahweh uas yog Ixayees Tus Tswv tseem xaiv kuv ntawm kuv txiv tsev neeg huvsi los ua vajntxwv kav cov Ixayees mus ib txhis. Rau qhov (יחוח)Yahweh xaiv Yahdah ua tus thawj thiab hauv xeem Yahdah, xaiv kuv txiv tsev neeg, thiab hauv kuv txiv cov tub, (יחוח)Yahweh txaus siab rau kuv mas tsa kuv ua vajntxwv kav cov Ixayees huvsi.

5 Thiab hauv kuv cov tub sawvdaws uas (יחוח)Yahweh twb pub rau kuv muaj ntau leej, mas nws xaiv kuv tus tub Xalaumoos kom nyob saum lub zwm txwv kav Ixayees uas yog (יחוח)Yahweh lub teb chaws.

6 (יחוח)Yahweh hais rau kuv tias, koj tus tub Xalaumoos yuav ua tus uas ua kuv lub tuam tsev thiab kuv tej tshav puam, rau qhov kuv xaiv nws ua kuv tus tub thiab kuv yuav ua nws txiv.

7 Yog tias nws muab siab rau tuav rawv kuv tej lus cob qhia thiab kuv tej kevcai ib yam li niaj hnub no mas kuv yuav tsa nws ua vajntxwv kav ruaj khov mus ib txhis.

8 Yog li ntawd tab meeg cov Ixayees sawvdaws, uas yog (יחוח)Yahweh haiv neeg, thiab tab meeg peb Tus Tswv, cia li tshawb nrhiav thiab ua raws li (יחוח)Yahweh uas yog koj Tus Tswv tej lus cob qhia huvsi, xwv nej thiaj tau lub tebchaws uas zoo no ua nej tug thiab khaws cia ua qub txeeg qub teg rau nej cov tub ki yav tom ntej mus ib txhiab ib txhis.

9 Kuv tus tub Xalaumoos es, koj cia li lees yuav koj Tus Tswv thiab cia li ua koom tu nws kawg siab kawg ntsws thiab txaus siab hlo, rau qhov (יחוח)Yahweh saib hauv txhua tus lub siab huvsi thiab nkag siab txhua yam uas yus npaj yuav ua thiab tej uas yus xav huvsi. Yog koj nrhiav nws, koj yuav ntsib nws. Tiamsis yog koj tso nws tseg, ces nws yuav muab koj laim pov tseg mus ib txhis.

10 Ua li no koj cia li ceev faj mloog, rau qhov (יחוח)Yahweh tau xaiv koj ua lub tuam tsev ua lub chaw pe hawm nws. Cia li ua khov kho thiab nqis tes ua.

11 Mas Daviv thiaj muab tus qauv lub tuam tsev rau nws tus tub Xalaumoos, yog qauv leej qab khav thiab qauv tej chav tsev thiab tej txhab nyiaj thiab tej chav txheej saud thiab tej chav sab hauv thiab lub chav uas rau lub phij xab uas roos kev txhaum.

12 Thiab Daviv muab tus qauv txhua yam uas Daviv xav cia hauv nws lub siab, yog hais txog (יחוח)Yahweh lub tuam tsev tej tshav puam thiab tej chav puag ncig tej tshav puam, thiab (יחוח)Yahweh lub tuam tsev tej txhab nyiaj thiab tej txhab uas rau txhua yam uas muab xyeem pub rau (יחוח)Yahweh,

13 thiab qhia txog qhov uas muab cov pov thawj thiab cov Levis faib ua tej pab thiab tej haujlwm uas yuav tau ua huvsi hauv (יחוח)Yahweh lub tuam tsev, thiab tej twj uas siv ua haujlwm hauv (יחוח)Yahweh lub tuam tsev.

14 Thiab Daviv qhia tias yuav tau siv kub npaum li cas ua txhua yam twj kub uas siv rau txhua yam haujlwm, thiab siv nyiaj npaum li cas ua tej twj nyiaj uas siv rau txhua yam haujlwm,

15 siv kub nyhav npaum li cas ua tej ncej txawb teeb thiab tej teeb, siv kub nyhav npaum li cas ua tej kav teeb thiab tej teeb, siv nyiaj nyhav npaum li cas ua ib tug ncej txawb teeb thiab tej lub teeb uas txawb saum tus ncej ntawd, raws li uas yuav siv tej ncej txawb teeb ua haujlwm,

16 thiab yuav siv kub npaum li cas ua txhua lub rooj uas rau cov ncuav uas xyeem txawb rau ntawm (יחוח)Yahweh xub ntiag, thiab siv nyiaj nyhav npaum li cas ua tej rooj nyiaj,

17 thiab siv cov tseem kub npaum li cas ua tej hmuv chob nqaij, tej phaj, tej tais, thiab yuav siv nyiaj thiab kub npaum li cas ua tej phaj nyiaj phaj kub,

18 thiab siv cov tseem kub npaum li cas ua lub thaj hlawv hmoov tshuaj tsw qab, thiab qhia tus qauv ua lub tsheb nees kub rau ob tug Khelunpees uas nthuav kooj tis roos (יחוח)Yahweh lub phij xab sib cog lus.

19 Daviv hais tias, txhua yam no yog (יחוח)Yahweh qhia meej kom kuv sau hais txog txhua yam uas yuav tau ua raws li tus qauv no.

20 Mas Daviv hais rau nws tus tub Xalaumoos tias, cia li ua khov kho thiab ua siab tuab thiab nqis tes ua.  Tsis txhob ntshai, tsis txhob poob siab, rau qhov (יחוח)Yahweh uas yog kuv Tus Tswv nrog nraim koj. Nws yuav tsis ncaim koj thiab yuav tsis tso koj tseg mus txog thaum ua txhua yam haujlwm hauv (יחוח)Yahweh lub tuam tsev tiav tag lawm.

21 Twb muaj tej pab pov thawj thiab cov Levis ua tej haujlwm txhua yam hauv (יחוח)Yahweh lub tuam tsev huvsi. Txhua tus uas txawj ua tej haujlwm txhua yam yuav zoo siab pab koj ua. Thiab tej nom tswv thiab tej pejxeem sawvdaws yuav ua raws li txhua yam uas koj txib lawv ua huvsi.