Tej Qhov Txhia Chaw Uas Pub Ua (יחוח)Yahweh Lub Tuam Tsev

1 Vajntxwv Daviv hais rau cov uas tuaj txoos ua ke ntawd tias, kuv tus tub Xalaumoos yog tib tug uas (יחוח)Yahweh tau xaiv cia. Nws tseem hluas thiab tsis tshua txawj ua thiab tej haujlwm no mas loj heev, rau qhov lub tuam tsev no tsis yog ua rau tibneeg tiamsis yog ua rau (יחוח)Yahweh.

2 Yog li ntawd kuv tau npaj tseg cia ua kuv Tus Tswv lub tuam tsev raws li kuv muaj peev xwm npaj tau, yog kub rau tej uas xuas kub ua, nyiaj rau tej uas xuas nyiaj ua, tooj liab rau tej uas xuas tooj liab ua, hlau rau tej uas xuas hlau ua thiab ntoo rau tej uas xuas ntoo ua. Dhau ntawd mas tseem muaj tej qe zeb iav txho ci lam lug ntau heev li thiab tej qe zeb hlaws uas yuav ua khawm, tej qe zeb hlaws dub txho txaij, tej qe zeb muaj nqis zoo nkauj txhua yam thiab pob zeb mos ntau heev.  

3 Tsis tag li ntawd, tshaj tej uas kuv twb npaj cia rau lub tuam tsev dawb huv lawd, kuv tseem muaj kub thiab nyiaj ua kuv tug, mas kuv pub kiag rau kuv Tus Tswv lub tuam tsev rau qhov kuv kub siab lug rau (יחוח)Yahweh lub tuam tsev ntawd.  

4 Tej uas kuv pub yog kub nyhav 3,000 talas, yog cov kub hauv lub tebchaws Aufis, thiab cov nyiaj uas twb nchuav tau lawm nyhav 7,000 talas uas yuav luam tej phab ntsa hauv lub tuam tsev,

5 thiab kub rau tej uas yuav xuas kub ua thiab nyiaj rau tej uas yuav xuas nyiaj ua, rau tej haujlwm huvsi uas cov Kws txawj yuav ua. Yog li ntawd, leejtwg zoo siab pub qhov txhia chaw thiab pub kiag nws tus kheej rau (יחוח)Yahweh hnub no?

6 Mas cov thawj hauv tej cum thiab cov thawj hauv txhua xeem thiab cov thawj kav ib txhiab leej thiab cov thawj kav ib puas leej thiab cov nom tswv uas saib xyuas vajntxwv tej haujlwm zoo siab hlo pub rau (יחוח)Yahweh.

7 Lawv pub ua tej hauj lwm rau hauv (יחוח)Yahweh lub tuam tsev li no, yog kub nyhav 5,000 talas thiab 10,000 dalias, nyiaj nyhav 10,000 talas, tooj liab 18,000 talas thiab hlau 100,000 talas.

8 Leejtwg muaj tej qe zeb hlaws muaj nqis mas muab pub rau hauv (יחוח)Yahweh lub tuam tsev lub txhab nyiaj, uas Yehi‑ees cum Kawsoos ua tus saib xyuas.

9 Mas cov pejxeem zoo siab xyiv fab rau qhov lawv zoo siab hlo pub txhua yam no thiab lawv tau zoo siab pub ua lub siab dawb paug rau (יחוח)Yahweh. Vajntxwv Daviv kuj zoo siab xyiv fab kawg li.

​

Daviv Qhuas (יחוח)Yahweh

10 Ua li ntawd mas Daviv thiaj qhuas (יחוח)Yahweh tab meeg cov uas tuaj txoos ua ke ntawd thiab hais tias, Au (יחוח)Yahweh uas yog peb yawg koob Ixayees Tus Tswv, thov qhuas koj mus ib txhiab ib txhis tsis kawg li.  

11 Au (יחוח)Yahweh, koj yog tus loj kawg, koj muaj zog muaj hwjchim ci ntsa iab, koj yog tus kov yeej thiab muaj hwjchim meej mom. Rau qhov ib puas tsav yam uas nyob nruab ntug thiab nyob hauv ntiajteb yog koj tug.  Au (יחוח)Yahweh, koj ua vajntxwv kav, thiab koj raug muab txhawb nqa ua ib puas tsav yam tus thawj.

12 Kev nplua nuj thiab meej mom yog los ntawm koj los, koj yog tus kav txhua yam huvsi. Lub zog thiab hwjchim loj kawg nkaus nyob hauv koj txhais tes, thiab nyob ntawm koj txhais tes xis uas yuav tsa ua loj thiab pub zog rau sawvdaws.

13 Peb Tus Tswv, nimno peb ua koj tsaug thiab qhuas koj lub npe uas muaj hwjchim ci ntsa iab.

14 Tiamsis kuv yog leejtwg thiab kuv cov tibneeg yog leejtwg uas peb yuav muaj peev xwm pub tau rau koj ua lub siab dawb paug li no? Rau qhov txhua yam puav leej yog los ntawm koj los mas peb tau pub yam uas yog koj li rov rau koj xwb.

15 Rau qhov ntawm koj xub ntiag ces peb yog tibneeg lwm teb lwm chaw thiab yog tibneeg tuaj ua qhua nyob xwb, ib yam nkaus li peb tej poj koob yawm txwv sawvdaws.  Peb lub hnub nyoog nyob hauv ntiajteb no, zoo yam li tus duab xwb thiab tsis muaj abtsi nyob ruaj khov mus li.

16 Au (יחוח)Yahweh uas yog peb Tus Tswv, tej qhov txhia chaw ntau heev no uas peb tau npaj cia ua lub tuam tsev rau koj lub npe dawb huv nyob mas puav leej yog los ntawm koj txhais tes los thiab yog koj tug huvsi.  

17 Kuv Tus Tswv, kuv paub tseeb tias koj sim lub siab thiab koj txaus siab rau txojkev ncaj ncees. Mas kuv lub siab ncaj ncees thiab kuv pub tej yam no ua siab dawb paug rau koj, mas lub sijhawm no kuv kuj pom koj haiv neeg uas nyob ntawm no zoo siab hlo pub ua lub siab dawb paug rau koj.  

18 Au (יחוח)Yahweh uas yog peb yawg koob Anplaham, Ixaj thiab Ixayees tus tswv, thov koj pab kom koj haiv neeg lub siab ntshaw thiab xav ua li no mus ib txhis li, thiab thov koj ua rau lawv lub siab xib rau koj.

19 Thov koj pab kuv tus tub Xalaumoos kom tuav rawv koj tej lus cob qhia thiab koj tej lus sam hwm thiab koj tej kab ke kawg siab kawg ntsws, thiab ua raws li txhua yam huvsi mas nws thiaj ua tau lub tuam tsev uas kuv twb npaj tseg lawm. 

20 Mas Daviv hais rau cov uas tuaj txoos ua ke tias, cia li qhuas (יחוח)Yahweh uas yog nej Tus Tswv. Mas cov tibneeg sawvdaws qhuas (יחוח)Yahweh uas yog lawv tej poj koob yawm txwv Tus Tswv, thiab lawv nyo hau pe hawm (יחוח)Yahweh thiab khoov ntshis pe hawm vajntxwv.

21 Hnub tom qab lawv tua tsiaj xyeem rau (יחוח)Yahweh, thiab ua kevcai hlawv huvsi xyeem rau (יחוח)Yahweh. Lawv xyeem ib txhiab tus txiv nyuj, ib txhiab tus txiv yaj, ib txhiab tus menyuam yaj nrog cov cawv txiv hmab uas hliv xyeem, thiab ua kevcai xyeem ntau heev ua cov Ixayees sawv daws li feem.

22 Mas hnub ntawd lawv noj thiab haus zoo siab hlo rau ntawm (יחוח)Yahweh xub ntiag.

​

Tsa Xalaumoos Ua Vajntxwv

Mas lawv rov qab ua kevcai zaum ob tsa Daviv tus tub Xalaumoos ua vajntxwv, lawv hliv roj tsa nws ua tus thawj rau ntawm (יחוח)Yahweh xubntiag, thiab tsa Xadaus ua pov thawj.

23 Mas Xalaumoos zaum saum lub zwm txwv uas yog (יחוח)Yahweh tsa ua vajntxwv nyob nws txiv Daviv chaw. Mas nws vam meej tuaj thiab cov Ixayees sawv

daws kuj mloog nws lus.

24 Tag nrho cov thawj thiab cov tub rog siab loj siab tuab thiab vajntxwv Daviv cov tub sawvdaws yeem lus tias yuav zwm rau vajntxwv Xalaumoos.

25 Mas (יחוח)Yahweh pub kom Xalaumoos muaj koob meej nto moo lug tab meeg cov Ixayees sawvdaws thiab pub kom nws ua vajntxwv muaj hwjchim meej mom ntau dua tej vajntxwv uas kav cov Ixayees ua nws ntej.

​

Daviv Tuag

(1Vajntxwv 2:10-12)

26 Yisais tus tub Daviv ua vajntxwv kav cov Ixayees sawvdaws.

27 Nws ua vajntxwv kav cov Ixayees tau plaub caug xyoo.  Nws nyob hauv lub moos Henploos kav tau xya xyoo thiab nyob hauv Yeluxalees kav tau peb caug

peb xyoos.

28 Mas nws thiaj tuag rau thaum laus heev thiab hnub nyoog nchav, nws nplua nuj heev thiab muaj meej mom.  Mas nws tus tub Xalaumoos sawv nws chaw ua vajntxwv kav.

29 Tej haujlwm uas vajntxwv Daviv ua txij thaum pib mus txog thaum kawg mas twb muab sau cia rau hauv phau ntawv keeb kwm uas Xamuyees tus uas hais pom tom hauv ntej tau sau thiab nyob hauv phau ntawv keeb kwm uas Nathas uas yog xibhwb cev lus tau sau thiab hauv phau ntawv keeb kwm uas Nkas tus uas hais pom tom hauv ntej tau sau lawm.

30 Puav leej hais txog txhua yam uas Daviv kav thiab nws tus peev xwm thiab tej xwm uas tshwm rau nws thiab rau cov Ixayees thiab tshwm rau txhua lub tebchaws hauv ntiajteb.