1 VAJNTXWV 2

Daviv Tej Lus Cob Qhia Xalaumoos

1 Thaum ze lub sijhawm uas Daviv yuav tag sim neej mas nws hais rau nws tus tub Xalaumoos tias,

2 kuv tab tom yuav dua mus ib yam li ib tsoom tibneeg ntiajteb. Koj cia li ua khov kho yam li ib tug txivneej yawg,

3 thiab tuav rawv tej lus uas (יחוח)Yahweh uas yog koj Tus Tswv hais, ua lub neej raws li nws txojkev, thiab tuav rawv nws tej kab ke thiab nws tej lus cob qhia thiab nws tej kevcai thiab nws tej lus qhia raws li uas twb muab sau cia rau hauv Mauxes phau kevcai, xwv koj thiaj li vam meej rau txhua yam hauj lwm uas koj ua thiab rau txhua qhov uas koj mus.

4 Mas (יחוח)Yahweh thiaj ua raws li nws tej lus uas nws hais ntsig txog kuv tias, yog koj tej tub ki ceev faj rau txhua txojkev uas lawv ua thiab ua lawv lub neej xib rau ntawm kuv lub xubntiag kawg siab kawg ntsws, mas koj caj ces yuav tsis tu ncua tus txivneej uas nyob saum cov Ixayees lub zwm txwv.

5 Dua ib qho koj yeej paub tias Xeluyah tus tub Yahas tau ua li cas rau kuv lawm. Koj paub tias nws ua li cas rau ob tug thawj uas kav Ixayees cov tub rog, yog ua rau Naws tus tub Anaws thiab ua rau Yethaws tus tub Amaxas uas nws cia li muab tua rau thaum lub tebchaws tus lawd, ua pauj tej ntshav uas los rau thaum uas tseem ua rog.  Nws muab tej ntshav uas tsis txhaum ntawd ua tso rau saum nws txoj siv ntawm duav thiab tso rau saum nws txhais khau ntawm nws kotaw.

6 Vim li no cia li ua raws li koj lub tswv yim pom zoo, tsis txhob cia nws tus dawb hau mus ua siab tus yees rau hauv tub tuag teb.

7 Cia li ua zoo rau Npaxilais uas yog tibneeg Kile‑as cov tub, kheev lawv nrog koj koom rooj noj mov ua ke, rau qhov thaum uas kuv khiav koj tus tijlaug Axaloos mus lawv tau ua zoo kawg rau kuv ib yam li ntawd.

8 Muaj Kelas tus tub Sime‑is uas yog xeem Npeeyamees uas nyob hauv lub moos Npahulis kuj nrog koj nyob ua ke no.  Hnub uas kuv mus rau lub moos Mahana‑is mas nws cem foom kuv tsis zoo heev kawg li, tiamsis thaum nws tuaj tos kuv ntawm ntug dej Yaladees, mas kuv tuav (יחוח)Yahweh lub npe cog lus twv rau nws tias, kuv yuav tsis xuas ntaj tua nws.

9 Vim li ntawd koj tsis txhob suav tias nws tsis txhaum. Koj twb muaj tswv yim, koj kuj paub tias tsim nyog koj yuav ua li cas rau nws. Koj cia li coj nws lub taubhau dawb paug nrog nws cov ntshav nqis rau hauv tub tuag teb.

​

Daviv Tuag

10 Ces Daviv txawm tuag mus nrog nws tej poj koob yawm txwv nyob mas lawv muab nws faus rau hauv Daviv lub nroog.

11 Lub sij hawm uas Daviv kav cov Ixayees yog plaub caug xyoo.  Nws nyob hauv Henploos kav tau xya xyoo, nyob hauv Yeluxalees kav tau peb caug peb xyoo.

12 Xalaumoos thiaj sawv nyob nws txiv Daviv lub zwm txwv, mas nws kav tau tebchaws ruaj khov.

​

Xalaumoos Tswj Hwm Tau Nws Lub Tebchaws

13 Hakis tus tub Adauniyah tuaj cuag Npase-npas uas yog Xalaumoos niam. Mas Npasenpas nug nws tias, koj tuaj ua zoo lov? Adauniyah teb tias, kuv tuaj ua zoo xwb.

14 Kuv muaj ib lo lus yuav hais rau koj. Npasenpas hais tias, cia li hais maj.

15 Nws thiaj hais tias, koj yeej paub tias kuv thiaj yog tus uas yuav kav lub tebchaws, thiab tag nrho cov Ixayees sawvdaws yeej npaj siab tias kuv yuav tau kav. Txawm li cas los xij lub tebchaws poob los rau kuv tus kwv lawm, vim yog (יחוח)Yahweh pub rau nws kav.

16 Mas nimno kuv tsuas thov ib yam ntawm koj xwb, thov koj muab rau kuv. Npasenpas hais rau nws tias, cia li hais maj.  

17 Adauniyah thiaj hais tias, thov koj mus thov vajntxwv, nyaj nws yuav tsis tawv dhau koj, yog thov nws muab Anpisas uas yog tibneeg hauv lub moos Sunees rau kuv yuav ua pojniam.

18 Npasenpas hais tias, zoo kawg, kuv yuav mus pab koj hais rau vajntxwv.  

19 Npasenpas txawm mus cuag vajntxwv Xalaumoos pab Adauniyah hais rau vaj ntxwv.  Mas vajntxwv sawv tsees fim nws thiab nyo hau rau nws. Ces txawm rov zaum saum lub zwm txwv mas hais kom muab rooj rau vajntxwv niam zaum. Leej niam thiaj los nyob ntawm nws sab xis,

20 mas hais tias, kuv yuav thov ib yam me me ntawm koj, thov koj teb rau kuv. Ces vajntxwv txawm hais tias, niam, thov maj, kuv yuav teb rau koj.

21 Leej niam thiaj hais tias, thov muab Anpisas uas yog tibneeg hauv Sunees rau koj tus tijlaug Adauniyah yuav ua pojniam.

22 Vajntxwv Xalaumoos teb nws niam tias, ua cas koj yuav thov Anpisas uas yog tibneeg hauv Sunees rau Adauniyah yuav? Cia li thov kiag lub tebchaws rau nws thiab los maj, rau qhov nws twb yog kuv tus tijlaug thiab nws twb muaj tus pov thawj Anpiyathas thiab Xeluyah tus tub Yahas tuaj nws tog.

23 Vajntxwv Xalaumoos txawm tuav (יחוח)Yahweh lub npe cog lus twv hais tias, yog tej lus no tsis ua rau Adauniyah txojsia tu mas cia (יחוח)Yahweh rau txim rau kuv nyhav dua li ntawd thiab.

24 Vim li no, muaj (יחוח)Yahweh muaj txoj sia nyob pom, (יחוח)Yahweh uas yog tus tsa kuv kom nyob ruaj khov thiab muab kuv txawb rau saum kuv txiv Daviv lub zwm txwv, thiab pub kuv caj ces kav mus li, raws li (יחוח)Yahweh tau cog lus cia, mas Adauniyah yeej yuav raug muab tua hnub no ntag.

25 Yog li ntawd vajntxwv Xalaumoos thiaj txib Yahyadas tus tub Npenayah mus muab Adauniyah tua, nws thiaj tuag lawm.

26 Vajntxwv hais rau tus pov thawj Anpiyathas tias, cia li mus rau lub moos Anathaus mus nyob hauv koj daim teb, rau qhov koj mas tsim nyog tuag lawm. Tiamsis lub sijhawm no kuv tsis tua koj, vim yog koj tau kwv (יחוח)Yahweh lub phij xab ua kuv txiv Daviv ntej, thiab vim koj tau nrog kuv txiv raug txhua yam kev txom nyem ua ke.

27 Xalaumoos thiaj muab Anpiyathas rho tawm qhov uas ua (יחוח)Yahweh li pov thawj, thiaj tiav raws li (יחוח)Yahweh tej lus uas hais txog Elis caj ces hauv lub moos Silaus.

28 Thaum tej xov no nrov mus txog Yahas, txawm yog Yahas tsis tuaj Axaloos tog los nws tuaj Adauniyah tog, mas Yahas thiaj khiav mus rau (יחוח)Yahweh lub tsev ntaub thiab mus tuav rawv cov kub ntawm lub thaj xyeem.

29 Thaum uas muaj tibneeg mus hais rau vajntxwv Xalaumoos tias, Yahas twb khiav mus rau ntawm (יחוח)Yahweh lub tsev ntaub lawm thiab nws nyob ntawm lub thaj xyeem ib sab, mas Xalaumoos thiaj txib Yahyadas tus tub Npenayah mus, hais tias, cia li mus muab nws tua pov tseg.

30 Npenayah thiaj mus rau ntawm (יחוח)Yahweh lub tsev ntaub mas hais rau Yahas tias, vajntxwv kom koj cia li tawm los. Yahas teb tias, kuv tsis tawm li, kuv yeem tuag ntawm no. Ces Npenayah kuj coj xov mus hais rau vajntxwv tias, Yahas hais li ntawd ntag, nws teb kuv li no ntag.

31 Vajntxwv teb nws tias, cia li ua raws li nws hais rau nws.  Cia li muab nws tua thiab muab faus tseg. Ua li no xwv thiaj ntxuav tau lub txim uas Yahas tua tej tibneeg tsis txhaum tawm ntawm kuv thiab kuv txiv caj ces mus.

32 (יחוח)Yahweh yuav coj qhov uas nws tua lwm tus los ntshav ntawd rov los poob rau saum nws taubhau, rau qhov nws tau xuas ntaj tua ob tug txivneej uas ncaj ncees dua thiab zoo dua nws, uas kuv txiv Daviv kuj tsis paub li, yog Naws tus tub Anaws uas ua thawj kav cov tub rog Ixayees thiab Yethaws tus tub Amaxas uas ua thawj kav cov tub rog Yahdah.

33 Mas ob tug tuag no cov ntshav yuav poob rau saum Yahas thiab nws caj ces taubhau ib txhiab ib txhis, tiamsis Daviv thiab nws tej tub ki thiab nws caj ces thiab nws lub zwm txwv, (יחוח)Yahweh yuav pub kom nyob tus yees ib txhiab ib txhis.

34 Yahyadas tus tub Npenayah txawm mus tua Yahas tuag mas muab nws faus rau ntawm nws lub tsev hauv tebchaws moj sab qhua.

35 Vajntxwv Xalaumoos tsa Yahyadas tus tub Npenayah ua thawj kav tub rog nyob Yahas chaw, thiab vajntxwv tsa Xadaus ua pov thawj nyob Anpi-

yathas chaw.

36 Vajntxwv txib tibneeg mus hu Sime‑is tuaj mas hais rau nws tias, koj cia li ua tsev rau hauv Yeluxalees thiab nyob twjywm qhov ntawd, tsis txhob tawm mus qhov twg li.

37 Yog hnub twg koj tawm hla lub hav Khiloos ntawd mus, mas koj cia li paub tseeb tias koj yuav tuag. Qhov uas koj tuag ntawd koj yuav ris koj xwb.

38 Mas Sime‑is hais rau vajntxwv tias, qhov uas vajntxwv hais li no kuj zoo kawg. Vajntxwv uas yog kuv tus tswv hais li cas los kuv uas yog koj tus tub qhe yuav ua li ntawd.  Sime‑is thiaj li nyob hauv Yeluxalees tau ntev.

39 Nyob tau peb xyoos mas Sime‑is ob tug tub qhe khiav mus cuag Ma‑akhas tus tub Akhij uas ua vajntxwv hauv lub moos Nkas. Mas thaum muaj tibneeg hais rau Sime‑is tias, koj ob tug tub qhe nyob hauv lub moos Nkas,

40 Sime‑is txawm sawv tsees nog eeb rau saum nees luav mus cuag Akhij hauv lub moos Nkas, mus nrhiav nws ob tug tub qhe. Sime‑is mus coj tau nws ob tug tub qhe ntawm lub moos Nkas rov los.

41 Thaum muaj tibneeg hais rau Xalaumoos tias, Sime‑is twb tawm hauv Yeluxalees mus txog lub moos Nkas thiab rov qab los lawm.

42 vajntxwv txawm txib tibneeg mus hu Sime‑is tuaj mas hais rau nws tias, kuv twb kom koj tuav (יחוח)Yahweh lub npe cog lus twv tseg thiab kuv twb hais rau koj tias, koj cia li paub tseeb tias hnub twg koj tawm mus tsis hais koj mus rau qhov twg, koj yuav tuag xwb. Mas koj twb teb kuv tias, tej lus uas koj hais no zoo kawg li, kuv yuav mloog koj lus.

43 Ua li cas koj tsis ceev cov lus uas koj cog rau (יחוח)Yahweh lawm thiab tsis ceev tej lus uas kuv hais kom koj ua?  

44 Vajntxwv rov hais dua rau Sime‑is tias, koj yeej paub tej kev phem uas koj ua rau kuv txiv Daviv huvsi hauv koj lub siab lawm.  Vim li no (יחוח)Yahweh yuav muab tej kev phem rov los pauj rau saum koj lub taubhau.

45 Tiamsis vajntxwv Xalaumoos yuav tau hmoov zoo thiab Daviv lub zwm txwv yuav nyob ruaj khov rau ntawm (יחוח)Yahweh xub ntiag mus ib txhis.

46 Mas vajntxwv txawm hais rau Yahyadas tus tub Npenayah mas nws tawm mus muab Sime‑is tua pov tseg, Sime‑is thiaj li tuag. Ua li no lub tebchaws thiaj nyob ruaj khov rau hauv Xalaumoos txhais tes.