Xalaumoos Thov (יחוח)Yahweh Pub Tswvyim

(2 Vaj Keeb Kwm 1:3-13)

1 Xalaumoos nrog Falaus uas yog Iziv tus vajntxwv cog lus sib raug zoo, nws thiaj li yuav Falaus tus ntxhais los ua pojniam. Nws thiaj coj Falaus tus ntxhais los nyob rau hauv Daviv lub nroog mus txog thaum ua nws lub tsev thiab ua (יחוח)Yahweh lub tuam tsev tiav thiab txhim lub ntsa loog xov lub nroog Yeluxalees tag huvsi.  

2 Cov pejxeem tseem tua tsiaj xyeem rau saum tej chaw siab, vim yog tsis tau ua lub tuam tsev rau (יחוח)Yahweh lub npe.

3 Xalaumoos hlub (יחוח)Yahweh thiab nws ua lub neej raws li nws txiv Daviv tej kab ke, tsuas yog nws tua tsiaj thiab hlawv hmoov tshuaj tsw qab xyeem rau saum tej chaw siab.

4 Vajntxwv mus tua tsiaj xyeem rau ntawm lub moos Kinpe‑oos rau qhov lub chaw siab uas tseem ceeb nyob qhov ntawd. Xalaumoos tua ib txhiab tus tsiaj ua kevcai hlawv xyeem rau saum lub thaj ntawd.

5 Hmo ntuj (יחוח)Yahweh los tshwm hauv yog toog rau Xalaumoos pom ntawm lub moos Kinpe‑oos. (יחוח)Yahweh hais tias, koj xav kom kuv pub abtsi rau koj, cia li thov.

6 Mas Xalaumoos hais tias, koj ua koj txoj kev hlub ruaj khov uas loj kawg tshwm rau kuv txiv Daviv uas yog koj tus tub qhe, rau qhov nws ua lub neej xib rau koj thiab ua ncaj ua ncees tab meeg koj thiab ua lub siab ncaj rau koj.  Koj tuav rawv txojkev hlub ruaj khov uas loj kawg no rau nws thiab pub nws muaj ib tug tub nyob saum nws lub zwm txwv rau hnub no.  

7 Au (יחוח)Yahweh uas yog kuv Tus Tswv, kuv txawm yog menyuam yaus los nimno koj pub kuv uas yog koj tus tub qhe sawv ua vajntxwv nyob kuv txiv Daviv chaw.  Kuv tsis paub tias kuv yuav coj li cas.

8 Thiab koj tus tub qhe nyob rau hauv koj haiv neeg uas koj tau xaiv cia lawd, yog haiv neeg uas muaj zog thiab coob kawg suav tsis txheeb.  

9 Thov koj pub kev nkag siab rau kuv uas yog koj tus tub qhe kom kuv thiaj kav tau koj cov tibneeg thiab paub qhov zoo qhov phem, rau qhov leejtwg yuav kav tau koj haiv neeg uas coob heev no?

10 Xalaumoos thov li no mas kuj txaus (יחוח)Yahweh lub siab.

11 Mas (יחוח)Yahweh hais rau nws tias, vim yog koj thov tej no koj tsis tau thov kom koj muaj txojsia nyob ntev thiab tsis thov kev nplua nuj rau koj thiab tsis thov kom koj cov yeeb ncuab txojsia tu, tiamsis koj thov kev nkag siab kom thiaj paub tias qhov twg yog qhov raug cai,

12 vim li no kuv yuav ua raws li koj tej lus thov. Kuv yeej yuav pub lajlim tswvyim plab plaws thiab kev nkag siab rau koj, xwv thiaj tsis muaj leejtwg uas nyob ua koj ntej zoo cuag li koj thiab tsis muaj leejtwg uas tshwm los tom qab yuav zoo cuag li koj.

13 Kuv tseem yuav pub tej uas koj tsis tau thov rau koj, yog kev nplua nuj thiab meej mom, mas tag koj sim neej thiaj yuav tsis muaj lwm tus vajntxwv piv tau rau koj.

14 Thiab yog koj ua lub neej raws nraim kuv txojkev thiab tuav rawv kuv tej kab ke thiab kuv tej lus cob qhia ib yam li koj txiv Daviv tau ua lawd, kuv yuav pub koj lub hnub nyoog ntev mus.

15 Ces Xalaumoos txawm tsim los, ua ciav yog ua yog toog.  Ces nws txawm los rau hauv lub nroog Yeluxalees thiab sawv ntsug ntawm (יחוח)Yahweh lub phij xab sib cog lus, thiab tua tsiaj ua kevcai hlawv xyeem thiab ua kevcai xyeem sib raug zoo, thiab npaj ib rooj mov rau nws cov tub teg tub taws sawvdaws noj haus.

​

Xalaumoos Muaj Tswvyim Tu Plaub

16 Muaj ob tug poj muag cev tuaj cuag vaj ntxwv sawv ntsug ntawm vajntxwv xubntiag.

17 Ib tug pojniam hais tias, Au kuv tus vajntxwv, kuv thiab tus pojniam no nyob ua ke hauv ib lub tsev. Kuv yug tau ib tug menyuam rau thaum tus pojniam no tseem nyob hauv tsev thiab.

18 Thaum kuv yug menyuam tau peb hnub lawd, tus pojniam no txawm yug menyuam thiab.  Mas wb ob leeg nyob ua ke, tsis muaj lwm tus nrog wb nyob tsuas yog wb ob leeg nyob hauv lub tsev ntawd xwb.

19 Thaum hmo ntuj tus pojniam no tus menyuam txawm tuag vim nws muab tsuam tuag.

20 Mas thaum ib tag hmo, kuv uas yog koj tus nkauj qhe tseem tsaug zog, nws txawm sawv los muab kuv tus tub ntawm kuv ib sab coj mus tso rau hauv nws xub ntiag thiab muab nws tus tub uas tuag lawd tso rau hauv kuv xub ntiag.  

21 Thaum sawv ntxov kuv sawv los yuav muab mis rau kuv tus menyuam noj, ua ciav twb tuag lawm. Tagkis ntawd thaum kuv muab ua tib zoo saib, ua ciav tsis yog tus menyuam uas kuv yug.  

22 Tiamsis tus pojniam uas nyob ntawd hais tias, tsis yog. Tus menyuam uas ciaj yog kuv li, tus menyuam uas tuag yog koj li. Thawj tug pojniam hais tias, tsis yog.  Tus menyuam uas tuag yog koj li, tus uas ciaj yog kuv li.  Nkawv ob leeg hais li no rau ntawm vajntxwv xub ntiag.

23 Ces vajntxwv txawm hais tias, ib tug hais tias, tus menyuam uas ciaj no yog kuv li, koj tus yog tus uas tuag lawd, dua ib tug kuj hais tias, tsis yog, koj tus menyuam tuag lawm, kuv tus yog tus uas ciaj.

24 Thiab vajntxwv hais tias, cia li muab ib rab ntaj los rau kuv.  Lawv thiaj coj rab ntaj los tso rau ntawm vajntxwv xub ntiag.

25 Ces vajntxwv txawm hais tias, cia li muab tus menyuam uas ciaj ntawd phua ua ob sab, muab faib rau ob tug pojniam ntawd ib leeg ib sab.

26 Vim tus pojniam uas nws tus menyuam tseem ciaj ntawd mob siab nws tus tub, nws txawm hais rau vajntxwv tias, Au kuv tus vajntxwv, cia li muab tus menyuam uas ciaj no rau tus pojniam ntawd. Txawm li cas los xij tsis txhob muab tus menyuam tua. Tiamsis tus pojniam ntawd hais tias, tus menyuam ntawd tsis ua kuv li tsis ua koj li, cia li muab faib.

27 Ces vajntxwv txawm teb nkawv tias, cia li muab tus menyuam uas ciaj ntawd rau thawj tug pojniam, tsis txhob muab tua kiag li, nws yeej yog tus menyuam ntawd niam.

28 Cov Ixayees sawvdaws hnov txog qhov uas vajntxwv tu plaub ntawd.  Lawv ntshai thiab hwm vajntxwv heev rau qhov lawv pom tias (יחוח)Yahweh lub tswvyim nyob hauv nws, nws thiaj tu tau plaub ncaj.