Xalaumoos Cov Nom Tswv Thiab Cov Tub Teg Tub Taws

1 Vajntxwv Xalaumoos ua vajntxwv kav tag nrho cov Ixayees huvsi.

2 Cov tibneeg no yog vajntxwv cov nom tswv uas ua hlob huvsi.  Xadaus tus tub Axaliyah ua pov thawj.

3 Sisas tus tub Elihaulej thiab tus tub Ahiyah ua ob tug tub sau ntawv.  Ahilus tus tub Yahsafas ua tus uas sau ntawv keeb kwm.  

4 Yahyadas tus tub Npenayah ua thawj kav tub rog.  Xadaus thiab Anpiyathas ua pov thawj.

5 Nathas tus tub Axaliyah ua tus thawj saib cov nom tswv. Nathas tus tub Xanpus ua pov thawj thiab yog vajntxwv phooj ywg.  

6 Ahisas ua tus uas saib vajntxwv lub vaj lub tsev.  Anpadas tus tub Adaunilas ua tus uas kav cov tub zog uas raug quab yuam ua hauj lwm.

7 Xalaumoos muaj kaum ob tug nom tswv uas kav cov Ixayees huvsi thiab npaj zaub mov noj rau vajntxwv thiab vajntxwv tsev neeg.  Ib xyoos ib tug nom npaj zaub mov noj ib lub hlis.

8 No yog lawv cov npe, Npees Hawj kav pem toj siab Efa‑is tebchaws.

9 Npees Dekhaws kav lub moos Makhas thiab Sa‑anpis thiab Npesemes thiab Eloos Npehanas.

10 Npees Hexes kav Alunpaus, (Xaukhaus thiab Hefaws lub tebchaws huvsi kuj zwm rau nws.)

11 Npees Anpinadas kav Nafadaus huvsi, nws tau yuav Xalaumoos tus ntxhais Thafas ua pojniam.

12 Ahilus tus tub Npa‑anas kav Tha‑anas thiab Mekidaus thiab Npesas huvsi uas nyob ib sab ntawm Xalethas uas nyob ntawm Yile‑ees sab nrad, thiab txij ntua Npesas mus txog Anpees Mehaulas thiab dhau plaws lub moos Yaune‑as. 13 Npees Kenpaws kav Lamaus Kile‑as, uas yog tej zej zog uas yog Manaxes tus tub Ya‑is tej zej zog uas nyob hauv Kile‑as, thiab kav tag nrho lub xeev Akaus uas nyob hauv Npasas tebchaws, huvsi muaj rau caum lub moos loj uas muaj ntsa loog thiab muaj tej las rooj loog tooj liab.

14 Idaus tus tub Ahinadas kav Mahana‑is tebchaws.

15 Ahima‑as kav Nathalis tebchaws, nws tau yuav Xalaumoos tus ntxhais Npaxemas ua pojniam.  

16 Husais tus tub Npa‑anas kav Asaws tebchaws thiab lub moos Npe‑alaus.  

17 Palu‑as tus tub Yahsafas kav Ixakhas tebchaws.

18 Elas tus tub Sime‑is kav Npeeyamees tebchaws.

19 Ulis tus tub Kenpaws kav Kile‑as tebchaws, yog lub tebchaws uas thaum cov Amaulais tus vajntxwv Xihoos thiab Npasas tus vajntxwv Aus kav. Muaj tib tug nom tswv kav lub tebchaws no xwb.

​

Xalaumoos Nplua Nuj Thiab Muaj Tswvyim

20 Cov Ixayees thiab cov Yahdah muaj coob kawg cuag nkaus li tej xuab zeb ntawm ntug hiavtxwv. Lawv muaj noj muaj haus tau zoo nyob zoo siab luag ntxhwb ntxhi.   

21 Xalaumoos kav tag nrho tej tebchaws txij ntua tus dej Yufetis mus txog ntua cov Filixatees lub tebchaws thiab mus txog ntua Iziv ciam teb. Lawv sawvdaws coj qhov txhia chaw tuaj them se rau Xalaumoos thiab zwm rau nws tag sim neej uas nws tseem muaj txojsia nyob.

22 Xalaumoos tej zaub mov mas ib hnub yog cov hmoov mog zoo zoo peb caug khuas, cov hmoov mog ntxhib rau caum khuas,

23 kaum tus nyuj rog rog heev hauv nkuaj, nees nkaum tus nyuj tom tshav zaub, ib puas tus yaj.  Dua li ntawd muaj mos lwj, kauv seb, kauv liab thiab qaib rog rog,

24 rau qhov nws kav tag nrho tej tebchaws mus txog tus dej Yufetis sab hnub poob, txij ntua lub moos Thixas mus txog lub moos Kaxas, thiab nws kav tag nrho tej vajntxwv uas nyob dej Yufetis sab hnub poob huvsi. Vajntxwv nyob siab tus yees rau txhua txhia qhov.

25 Cov Yahdah thiab cov Ixayees nyob tso siab plhuav txij ntua lub moos Daj mus txog ntua lub moos Npe‑awsenpas, txhua tus nyias nyob nraim ntxoov ntxoo hauv nyias tej qab txiv hmab txiv cev tag Xalaumoos sim neej.

26 Xalaumoos muaj plaub caug txhiab lub nkuaj kaw cov nees cab tsheb ua rog. Thiab nws muaj cov tub rog caij nees kaum ob txhiab leej.

27 Cov nom tswv ntawd npaj zaub mov xa mus rau Xalaumoos thiab rau txhua tus uas los koom Xalaumoos lub rooj mov, nyias xa raws li nyias lub hli.  Lawv tsis tseev ib yam abtsi tu ncua li.

28 Lawv xa qeb xa quav nyab tuaj rau tej nees cab tsheb thiab tej nees caij, lawv coj tuaj rau txhua lub chaw uas teem cia npaum li uas hais cia rau lawv lawd.

29 ()Yahweh pub lajlim tswvyim plab plaws kev txawj ntse rau Xalaumoos ntau kawg li thiab pub nws muaj lub siab zoo thiab kev paub npaum nkaus li tej xuab zeb ntawm ntug hiavtxwv.

30 Xalaumoos tej tswvyim plab plaws ntau dua cov tibneeg sab hnub tuaj tej tswvyim thiab ntau dua cov Iziv tej tswvyim huvsi.

31 Nws muaj tswvyim thiab txawj ntse dua luag lwm tus huvsi, ntse dua Ethas uas yog cum Exalas, thiab Hemas thiab Khakhaus thiab Dadas uas yog Mahoos cov tub. Nws lub moo nrov nto moo lug mus thoob plaws txhua lub tebchaws uas nyob ib ncig.

32 Nws hais peb txhiab nqe paj lug thiab ib txhiab tsib txoj nkauj.

33 Nws hais txog tej xyoob ntoo tag nrho tej ntoo ciab hauv Lenpanoos mus txog tej zaub txig theem uas tuaj ntawm tej ntsa loog. Nws kuj hais txog tej tsiaj qus tej nas noog thiab tej tsiaj uas nkag thiab tej ntses.

34 Muaj tibneeg tuaj hauv txhua haiv neeg tuaj mloog Xalaumoos tej tswvyim, thiab tuaj ntawm txhua tus vajntxwv hauv ntiajteb no uas tau hnov moo txog Xalaumoos tej tswvyim.