Xalaumoos Npaj Ua Lub Tuam Tsev

(2 Vaj Keeb Kwm 2:1-18)

1 Thaum Hilas uas ua vajntxwv hauv lub nroog Thailab hnov tias lawv tau tsa Xalaumoos ua vajntxwv nyob leej txiv chaw, ces nws thiaj tso nws cov tub teg tub taws mus cuag Xalaumoos, rau qhov Hilas pheej nrog Daviv ua phooj ywg.

2 Mas Xalaumoos xa xov rau Hilas tias,

3 koj yeej paub tias kuv txiv Daviv ua tsis tau lub tuam tsev rau (יחוח)Yahweh uas yog nws Tus Tswv lub npe, rau qhov muaj yeeb ncuab ua rog rau nws vij ib ncig nws, mus txog thaum (יחוח)Yahweh muab nws cov yeeb ncuab tso rau hauv nws qab xib taws.

4 Nimno (יחוח)Yahweh uas yog kuv Tus Tswv pub kuv tau so tsis ua rog rau txhua fab, tsis muaj yeeb ncuab thiab tsis muaj xwm txheej phem lawm.

5 Yog li no kuv txiav txim siab yuav ua lub tuam tsev rau kuv Tus Tswv lub npe, raws li (יחוח)Yahweh tau hais rau kuv txiv Daviv tias, koj tus tub uas kuv yuav muab tsa nyob koj chaw saum koj lub zwm txwv yuav ua lub tuam tsev rau kuv lub npe.  

6 Yog li no thov koj txib tibneeg mus txiav cov ntoo ciab hauv Lenpanoos rau kuv, thiab kuv cov tub teg tub taws yuav nrog koj cov tub teg tub taws ua haujlwm, thiab kuv yuav muab nqi zog rau koj cov tub teg tub taws raws li koj hais cia. Koj yeej paub tias hauv peb cov no tsis muaj leejtwg txawj txiav ntoo yam li cov tibneeg Xaidoos.  

7 Thaum Hilas hnov Xalaumoos tej lus, nws kuj zoo siab xyiv fab kawg thiab nws hais tias, hnub no qhuas (יחוח)Yahweh uas tau pub Daviv muaj ib tug tub txawj ntse ua tus uas kav cov tibneeg coob no.

8 Thiab Hilas xa xov rov rau Xalaumoos hais tias, kuv twb tau hnov tej lus uas koj xa tuaj rau kuv lawm. Hais txog cov ntoo ciab thiab cov ntoo ciab nplooj suab mas kuv npaj txhij ua txhua yam uas koj xav kom kuv ua.

9 Kuv cov tub teg tub taws yuav coj tej ntoo ntawd saum lub roob Lenpanoos los txog dej hiavtxwv. Kuv yuav muab ua phuaj xa hauv dej hiavtxwv mus txog qhov chaw uas koj teem cia, kuv li muab daws rau qhov ntawd, mas koj cia li tuaj coj mus. Thiab koj cia li npaj zaub mov xa tuaj rau kuv tsev neeg npaum li uas kuv xav yuav.

10 Hilas thiaj xa cov ntoo ciab thiab cov ntoo ciab nplooj suab rau Xalaumoos raws li nws xav tau,

11 mas Xalaumoos muab nees nkaum txhiab khuas mog ua zaub mov rau Hilas tsev neeg thiab nees nkaum txhiab khuas roj aulib uas tsuam lim zoo zoo. Xalaumoos niaj xyoo pub npaum li no rau Hilas.

12 Thiab (יחוח)Yahweh pub tswvyim rau Xalaumoos raws li nws cog lus cia. Mas Hilas thiab Xalaumoos kuj sib haum xeeb thiab nkawv cog lus sib raug zoo.

13 Vajntxwv Xalaumoos sau cov txivneej hauv cov Ixayees sawvdaws tau peb caug txhiab leej, npaj yuav yuam kom lawv ua haujlwm.

14 Nws txib lawv mus rau hauv Lenpanoos, kaum txhiab leej ua ib pab txhua lub hli, sib hloov ua haujlwm. Ib pab yuav nyob hauv Lenpanoos ib lub hlis ces rov los nyob hauv tsev ob lub hlis. Adaunilas yog tus uas coj cov tub zog.

15 Xalaumoos kuj muaj xya caum txhiab leej ua cov uas kwv qhov txhia chaw, thiab yim caum txhiab leej ua cov uas txaug pob zeb pem roob.

16 Dua li no nws tseem muaj peb txhiab peb puas leej ua thawj uas saib xyuas tej haujlwm thiab kav cov tibneeg ua haujlwm.

17 Lawv txaug tej pob zeb loj uas muaj nqis coj los txhim pua tiag lub tuam tsev, raws li vajntxwv hais.

18 Yog li no Xalaumoos cov Kws ua tsev thiab Hilas cov Kws ua tsev thiab cov tibneeg Kenpas thiaj li txaug pob zeb thiab npaj tej ntoo thiab tej pob zeb uas ua lub tuam tsev.