Xalaumoos Ua (יחוח)Yahweh Lub Tuam Tsev

(2 Vaj Keeb Kwm 3:1-14)

1 Xyoo uas plaub puas yim caum, yog suav txij thaum cov Ixayees tawm hauv Iziv tebchaws los, yog xyoo plaub uas Xalaumoos ua vajntxwv kav cov Ixayees, lub hli Xiv uas yog lub ob hlis, Xalaumoos pib ua (יחוח)Yahweh lub tuam tsev.

2 Lub tuam tsev uas Xalaumoos ua rau (יחוח)Yahweh ntawd ntev rau caum tshim, dav nees nkaum tshim thiab siab peb caug tshim.

3 Leej qab khav uas yuav nkag rau hauv lub tuam tsev ntev nees nkaum tshim npaum li lub tuam tsev qhov uas dav thiab dav kaum tshim rau sab nraud.  

4 Nws kuj ua lub tuam tsev tej qhov rais nqaim zuj zus sab hauv rau sab nraud.

5 Nws ua tej chav npuas nkaus tej phab ntsa thoob plaws lub tuam tsev, yog thoob plaws chav dawb huv thiab chav uas dawb huv kawg nkaus huvsi.

6 Chav uas nyob hauv qab kawg, dav tsib tshim, chav uas nyob txheej nruab nrab, dav rau tshim, chav uas nyob txheej peb, dav xya tshim.  Nws ua tej theem puag ncig lub tuam tsev txawb tej las xwv thiaj tsis tau muab ntxig rau hauv phab ntsa tuam tsev.  

7 Thaum tab tom ua lub tuam tsev ntawd, lawv siv tej pob zeb uas twb txua ntawm lub chaw txaug pob zeb lawd, kom thiaj tsis hnov tej suab rauj suab taus lossis suab cuab yeej hlau nrov rau hauv lub tuam tsev rau thaum ua lub tuam tsev.

8 Lub qhov rooj uas nkag rau hauv txheej hauv qab nyob ntawm lub tuam tsev sab nrad, thiab muaj ntaiv nce mus rau txheej ob thiab nce ntawm txheej ob mus rau txheej peb.

9 Nws thiaj ua lub tuam tsev tiav li no, thiab nws muab ntoo ciab ua las ua daim ntoo vov.

10 Nws txuas tej chav puag ncig lub tuam tsev ib txheej siab tsib tshim, thiab tej las uas txuas ntawm lub tuam tsev yog ntoo ciab.

11 (יחוח)Yahweh hais lus tuaj rau Xalau-moos tias,

12 hais txog lub tuam tsev uas koj ua no, yog koj ua koj lub neej raws nraim kuv tej kab ke thiab mloog kuv tej kevcai thiab tuav rawv kuv tej lus cob qhia huvsi thiab ua raws li, mas kuv yeej yuav ua raws li kuv tej lus uas kuv hais txog koj uas kuv twb hais rau koj txiv Daviv lawd.

13 Thiab kuv yuav nyob hauv nruab nrab cov Ixayees thiab kuv yuav tsis tso kuv haiv neeg Ixayees tseg.

14 Xalaumoos thiaj ua lub tuam tsev thiab ua kom tiav li no.

15 Tej phab ntsa tuam tsev sab hauv lub nrog nws muab daim ntoo ciab xov. Txij ntua hauv taw mus nto plaws tej las uas vov, nws muab ntoo xov sab nruab nrog huvsi. Thiab nws muab daim ntoo ciab nplooj suab pua thoob plaws lub tuam tsev.  

16 Nws muab ntoo ciab kem nees nkaum tshim ua ib chav npuas rau sab qaum tsev xov hauv taw mus nto plaws tej las vov, thiab nws ua chav no ua chaw pe hawm (יחוח)Yahweh rau sab hauv, yog chav uas dawb huv kawg nkaus.

17 Lub tuam tsev chav uas npuas lub chaw sab hauv uas pe hawm (יחוח)Yahweh ntev plaub caug tshim.

18 Cov ntoo ciab uas xov hauv lub nrog tuam tsev muab sais zoo li tej lub taub iab thiab zoo li tej paj ntoo uas tawg nta lawm, puavleej yog ntoo ciab tsis pom tej phab ntsa pob zeb kiag li.

19 Nws npaj chav sab hauv uas pe hawm (יחוח)Yahweh ntawd npuas rau sab qaum tsev kom thiaj tso tau (יחוח)Yahweh lub phij xab sib cog lus rau hauv.

20 Chav sab hauv uas pe hawm (יחוח)Yahweh ntawd ntev nees nkaum tshim, dav nees nkaum tshim, siab nees nkaum tshim. Nws muab cov tseem kub luam thoob plaws.  Nws muab daim ntoo ciab ntsia ib txheej rau lub thaj xyeem.  

21 Xalaumoos muab cov tseem kub luam lub nrog tuam tsev thiab dai tej txoj saw kub loj rau ntawm phab ntsa uas kem chav sab hauv uas pe hawm ()Yahweh, thiab muab kub luam lub nrog chav sab hauv thoob plaws. 

22 Nws muab kub luam thoob plaws lub nrog tuam tsev huvsi, thiaj ua lub tuam tsev ntawd tiav huvsi. Lub thaj xyeem uas yog chav hauv, nws muab kub luam huvsi thiab.

23 Nws muab ntoo aulib ua ob tug Khelunpees rau chav sab hauv uas pe hawm (יחוח)Yahweh, ib tug siab kaum tshim.

24 Ob tug Khelunpees ntawd li kooj tis mas ib sab ntev tsib tshim, sib txig zos.  Ib sab ntsis kooj tis mus txog ntua ib sab li ntsis kooj tis muaj kaum tshim.

25 Dua ib tug Khelunpees muaj kaum tshim thiab, ob tug Khelunpees sib luag ib yam nkaus thiab zoo ib yam.

26 Ob tug Khelunpees ntawd puavleej siab kaum tshim ib yam nkaus.

27 Nws muab ob tug Khelunpees ntawd txawb rau chav sab hauv uas npuas rau sab qaum tsev. Ob tug Khelunpees nthuav tis ib yam nkaus, ib tug li ntsis kooj tis nthuav mus ti nkaus ib sab phab ntsa, dua ib tug li ntsis kooj tis kuj nthuav mus ti nkaus dua rau ib sab phab ntsa. Ob sab ntsis tis nruab nrab tuaj sib cuag rau hauv nruab nrab lub tuam tsev.

28 Nws muab kub luam ob tug Khelunpees huvsi.

29 Vajntxwv muab tej phab ntsa tsev sab hauv lub nrog, sais ua duab Khelunpees thiab ua tej tsob toov laj thiab tej paj ntoo uas tawg nra rau chav hauv thiab chav nraud huvsi.

30 Nws muab kub luam lub plag tse thoob plaws chav hauv thiab chav nraud huvsi.

31 Nws xuas ntoo aulib ua ob txhib qhov rooj uas nkag rau lub chaw pe hawm (יחוח)Yahweh chav hauv, thiab ua ob tug npuab rooj ob sab thiab sab saud ua puam leej ua tsib fab.

32 Nws muab ob txhib qhov rooj uas xuas ntoo aulib ua ntawd sais ua tej duab Khelunpees thiab ua tej tsob toov laj thiab ua tej paj ntoo uas tawg nra. Thiab muab kub luam ob txhib qhov rooj thiab luam tej duab Khelunpees thiab tej tsob toov laj ntawd huvsi.

33 Nws xuas ntoo aulib ua ob tug npuab rooj ua plaub fab rau lub qhov rooj chav nraud.

34 Nws muab cov ntoo ciab nplooj suab ua ob txhib qhov rooj, ib txhib qhov rooj mas muaj ob daim ntoo txuas ua ke quav tau, ib txhib qhov rooj muaj ob daim ntoo.

35 Nws kuj sais tej duab Khelunpees thiab tej tsob toov laj thiab tej paj ntoo uas tawg nra rau cov txhib qhov rooj ntawd, thiab muab kub luam tej uas sais ntawd zoo ib yam nkaus.

36 Nws xuas cov pob zeb uas txua tib ua peb tshooj xov lub loog tshav puam sab hauv thiab tseem xov ib tshooj ntoo ciab rau saud.

37 Xyoo uas plaub, nws pib ua (יחוח)Yahweh lub tuam tsev rau lub hli Xiv.

38 Thiab xyoo uas kaum ib, lub hli Npus uas yog lub yim hli, mas ua lub tuam tsev tiav tag txhua yam huvsi thiab ua tiav raws li uas hom cia lawd huvsi. Vajntxwv ua xya xyoo li tau lub tuam tsev ntawd.