Ua Vajntxwv Xalaumoos Lub Tsev

1 Xalaumoos ua nws lub tsev tau kaum peb xyoos thiaj ua tau lub vaj lub tsev tiav txhua yam.

2 Nws ua lub tsev Hav Zoov Lenpanoos, ntev ib puas tshim, dav tsib caug tshim, thiab siab peb caug tshim, thiab xuas ntoo ciab ua plaub leej ncej, thiab xuas ntoo ciab ua cov puab saum cov hau ncej.

3 Txheej saud mas xuas ntoo ciab vov, yog vov saum plaub caug tsib chav uas nyob txheej saum cov hau ncej ib leej muaj kaum tsib chav.

4 Muaj peb leej qhov rais, peb leej qhov rais ntawd nyob sib ncaj.

5 Qhov rooj qhov rais huvsi ua dav xwm fab xwm meem, thiab cov qhov rais kuj nyob peb leej nyob sib ncaj.

6 Nws ua lub tsev ncej txhais nrho, ntev tsib caug tshim, dav peb caug tshim. Muaj ib chav muaj ncej nyob sab nraum qhov rooj uas muaj leej qab khav.

7 Nws ua lub tsev uas muaj lub zwm txwv uas nws tu plaub, yog lub tsev tu plaub.  Nws xuas ntoo ciab xov txij ntawm taw ntsa tsev mus nto plaws rau tej las.

8 Nws ua lub tsev rau nws nyob rau hauv lub tshav puam npuas nkaus lub tsev tu plaub sab nrad, ua zoo ib yam nkaus li tej. Xalaumoos kuj ua ib lub tsev zoo yam nkaus li no rau Falaus tus ntxhais uas yuav los ua pojniam.

9 Muab tej pob zeb muaj nqis heev uas txua raws li ntsuas cia thiab xuas kaw kaw sab nraud thiab sab hauv los ua, txij ntawm hauv taw mus nto plaws ntsa, thiab txij ntawm (יחוח)Yahweh lub tuam tsev mus txog lub tshav puam loj huvsi.

10 Muab tej pob zeb loj uas muaj nqis tiag hauv taw, tej txhib zeb loj loj dav yim tshim thiab kaum tshim.

11 Txheej saud mas muab tej pob zeb muaj nqis uas txua los raws li ntsuas cia, thiab muab ntoo ciab ua.

12 Lub tshav puam loj muab cov pob zeb uas txua xov peb tshooj mas xov ib tshooj ntoo ciab. Lub tshav puam sab hauv uas xov (יחוח)Yahweh lub tuam tsev thiab leej qab khav kuj zoo ib yam nkaus.

​

Tej Haulwm Uas Hilas Ua Rau Hauv Lub Tuam Tsev

(2 Vaj Keeb Kwm. 3:15-17,4:2-5,4:11-5:1)

13 Vajntxwv Xalaumoos txib tibneeg mus coj Hilas hauv lub nroog Thailab tuaj.

14 Hilas yog ib tug poj ntsuam uas yog xeem Nathalis tus tub. Nws txiv yog ib tug nyob hauv lub nroog Thailab, nws yog Kws ntaus tooj liab. Hilas muaj lajlim tswvyim plab plaws thiab txawj muab tooj liab ua txhua yam.  Nws tuaj cuag vajntxwv Xalaumoos thiab ua vajntxwv tej haujlwm huvsi.

15 Nws muab tooj liab nchuav ua ob tug ncej.  Ib tug siab kaum yim tshim, ntsuas puag ncig muaj kaum ob tshim. Tus ncej uas ob kuj zoo ib yam nkaus.

16 Nws muab tooj liab nchuav ua ob lub hau ncej uas yuav muab txawb rau saum ob tug ncej. Ob lub hau ncej puav leej siab tsib tshim.

17 Muab saw tooj liab qhaib ua qhov muag ntxaij rau saum cov hau ncej, ua xya lub rau ib lub hau ncej, ua dua xya lub rau ib lub hau ncej.  

18 Nws ua txiv ntsiav kws ob leej puag ncig daim ntxais qhov muag thiaj vij tau ib lub hau ncej uas muab txawb rau saum cov ncej.  Lub hau ncej uas ob, nws kuj ua zoo ib yam nkaus.

19 Tiamsis tej hau ncej uas nyob saum cov ncej hauv leej qab khav, ua paj zoo li paj qos dej rau, yog siab plaub tshim.

20 Tej hau ncej muab txawb saum ob tug ncej rau saum lub ntxheb uas nyob ntawm daim ntxais qhov muag, thiab muaj ob puas lub txiv ntsiav kws nyob ua ob leej puag ncig cov hau ncej. Tus ncej uas ob kuj ib yam nkaus.

21 Nws txhos ob tug ncej rau ntawm qab khav lub tuam tsev, ib tug rau sab nrad hu ua Yakhis, ib tug rau

sab ped hu ua Npau‑as.

22 Saum tej hau ncej mas muaj paj zoo li paj qos dej.  Ob tug ncej thiaj ua tau tiav li no.

23 Nws nchuav lub rhawv dej kheej kheej, ntsuas lub nrog saum ncauj dav kaum tshim, siab tsib tshim, thiab ntsuas puag ncig muaj peb caug tshim.

24 Ntawm lub ncauj rhawv dej hauv qab, muaj ib co taub iab puag ncig tag nrho peb caug tshim. Cov taub iab ntawd nyob ua ob leej nchuav xeeb keeb nkaus rau lub rhawv dej.

25 Lub rhawv dej txawb rau saum kaum ob tug nyuj, peb tug tig xub ntiag rau sab ped, peb tug tig xub ntiag rau sab hnub poob, peb tug tig xub ntiag rau sab nrad thiab peb tug tig xub ntiag rau sab hnub tuaj. Lawv muab lub rhawv dej txawb saum cov nyuj. Cov nyuj tig pobtw huvsi rau hauv nruab nrab.

26 Lub rhawv dej ntawd tuab ib dos, ua lub npoo rhawv dej zoo li lub npoo tais, thiab ua zoo li lub paj qos dej, ntim dej tau ob txhiab npas dej.

27 Nws muab tooj liab ua kaum lub nyuag tsheb thawb dej, ib lub ntev plaub tshim, dav plaub tshim, siab peb tshim.

28 Nws ua lub tsheb li no, nws muab tooj liab ua daim ntoo xov lub tsheb thiab ua ib pluaj puag ncig daim ntoo ntawd lub ntug.

29 Ib daim ntoo uas muaj ntug ntawd mas nws sais duab tsov ntxhuav thiab nyuj thiab duab Khelunpees rau hauv.  Thiab xuas rauj txaug sais sab npoo saum cov duab tsov ntxhuav thiab nyuj ntawd thiab sais sab npoo hauv ua txaij nraug zees.

30 Ib lub tsheb muaj plaub lub faus tsheb tooj liab thiab ib tug las tooj liab. Plaub lub kaum tsheb mas muaj plaub tug ncej tiag lub phaj dej. Cov ncej ntawd puav leej muab nchuav ua txaij nraug zees ntswj pes lees.  

31 Lub tais uas tiag lub phaj dej nyob siab saum lub tsheb ib tshim. Lub tais ntawd kheej kheej yam li ua lub qab txawb tais thiab tob ib tshim txhais. Lub ncauj tais ntawd ua tau txaij nraug zees.  Daim ntoo xov mas dav plaub fab xwm yeem tsis kheej.

32 Plaub lub faus tsheb nyob hauv daim qab ntoo. Ob tug las tooj liab xeeb keeb nkaus rau faus tsheb. Txhua lub faus tsheb siab ib tshim ib dos.

33 Cov faus tsheb ntawd ua zoo nkaus li faus tsheb ua rog, tej las thiab tej ntug kauj thiab tej tab thiab tej plov puav leej yog nchuav los.

34 Ib lub tsheb muaj plaub tug ncej tiag lub phaj dej rau ntawm plaub lub kaum tsheb, tus ncej uas tiag ntawd xeeb keeb nkaus rau lub tsheb.

35 Saum lub npoo tsheb muaj ib tug caj ntswm siab ib dos. Tus caj ntswm saum lub npoo tsheb thiab cov ncej tiag lub phaj dej thiab cov daim ntoo mas lo xeeb keeb nkaus ua ke.

36 Nws sais duab Khelunpees thiab tsov ntxhuav thiab tej tsob toov laj rau tej ncej tiag thiab rau tej daim ntoo rau tej chaw seem thiab txhua yam sais ntswj ua txaij nraug zees.

37 Nws ua kaum lub tsheb zoo ib yam li no. Nws nchuav txhua lub ib yam nkaus thiab loj sib luag zos thiab zoo ib yam nkaus.

38 Nws muab tooj liab ua kaum lub phaj dej, ib lub phaj ntim tau plaub caug npas, ib lub phaj dav plaub tshim, ib lub tsheb muaj ib lub phaj dej.

39 Nws muab cov tsheb txawb rau hauv lub tuam tsev, tsib lub rau sab nrad, tsib lub rau sab ped.  Nws muab lub rhawv dej loj txawb rau ntawm lub tuam tsev sab hnub tuaj uas npuas rau sab nrad.   

40 Hilas kuj ua tej lauj kaub tej duav phuaj thiab tej phaj.  Hilas thiaj ua tau txhua yam tiav uas nws ua rau hauv (יחוח)Yahweh lub tuam tsev rau vajntxwv Xalaumoos, yog tej no,

41 ob tug ncej thiab ob lub tais uas txawb saum hau ncej saum cov ncej, thiab ob daim ntxais qhov muag uas kauv ob lub tais uas txawb saum hau ncej saum ob tug ncej,

42 thiab plaub puas lub txiv ntsiav kws lo rau ob daim ntxais qhov muag ntawd. Ib daim ntxais qhov muag mas dai ob leej txiv ntsiav kws xwv thiaj li nyob puag ncig ob lub tais hau ncej saum ob tug ncej,

43 thiab kaum lub tsheb thawb dej thiab kaum lub phaj dej uas nyob saum cov tsheb,

44 thiab ib lub rhawv dej thiab kaum ob tug nyuj uas txawb lub rhawv dej,

45 thiab tej lauj kaub thiab tej duav phuaj thiab tej phaj. Tej no huvsi uas Hilas tau ua rau vajntxwv Xalaumoos siv rau hauv (יחוח)Yahweh lub tuam tsev mas puav leej yog xuas tooj liab uas txhuam ci nplas lawm ua.  

46 Vajntxwv nchuav cov no ntawm lub hav Yaladees ntawm qhov av nplaum uas nyob lub moos Xukhaus thiab lub moos Xalethas ntu nruab nrab.  

47 Xalaumoos twb tsis luj tej no, rau qhov muaj ntau dhau hwv lawm, thiaj tsis paub tias tooj liab nyhav npaum li cas.

48 Xalaumoos ua tau txhua yam twj uas siv rau hauv (יחוח)Yahweh lub tuam tsev, yog tej no, lub thaj kub thiab lub rooj kub uas txawb ncuav rau ntawm (יחוח)Yahweh xub ntiag,

49 thiab cov ncej txawb teeb uas xuas tseem kub ua, muaj tsib tug nyob sab nrad, tsib tug nyob sab ped, nyob npuas chav uas dawb huv kawg nkaus, thiab cov paj ntoo thiab cov teeb thiab cov ciaj uas xuas kub ua,

50 thiab cov tais thiab cov tais khwb teeb xeeb thiab cov phaj thiab cov tais uas rau cov hmoov tshuaj tsw qab thiab tej duav hlau yawm ncaig taws uas muab tseem kub ua, thiab cov ntsej kub uas tuav txhib qhov rooj kaw chav hauv uas yog chav dawb huv kawg nkaus thiab tuav txhib qhov rooj chav dawb huv ntawm lub tuam tsev.

51 Txhua yam haujlwm uas vajntxwv Xalaumoos ua (יחוח)Yahweh lub tuam tsev thiaj tiav tag li no. Thiab Xalaumoos coj tej nyiaj tej kub thiab tej twj siv uas nws txiv Daviv twb muab xyeem pub rau (יחוח)Yahweh lawd, los muab khaws cia rau hauv tej txhab hauv (יחוח)Yahweh lub tuam tsev.