Xalaumoos Coj (יחוח)Yahweh Lub Phil Xab Los Rau Hauv Lub Tuam Tsev

(2 Vaj Keeb Kwm 5:2-6:2)

1 Mas Xalaumoos hu Ixayees cov kev txwj laug, yog txhua tus uas ua hlob hauv txhua xeem thiab txhua cum tus thawj tuaj txoos ua ke rau hauv Yeluxalees ntawm vajntxwv Xalaumoos lub xub ntiag es yuav mus coj (יחוח)Yahweh lub phij xab sib cog lus tawm hauv Daviv lub nroog uas yog lub roob Xi‑oo los.

2 Mas tag nrho Ixayees cov txivneej tuaj txoos ua ke ntawm vajntxwv Xalaumoos lub xub ntiag rau lub sijhawm uas ua kevcai npaj noj haus rau lub hli Ethanis uas yog lub xya hli.

3 Cov Ixayees tej kev txwj laug sawv daws tuaj txhij mas cov pov thawj txawm nqa lub phij xab.

4 Lawv coj (יחוח)Yahweh lub phij xab thiab lub tsev ntaub sib ntsib thiab tej twj siv dawb huv huvsi uas nyob hauv lub tsev ntaub mus.  Tej no cov pov thawj thiab cov Levis yog cov uas coj los.

5 Vajntxwv Xalaumoos thiab ib tsoom Ixayees sawvdaws uas tuaj txoos ua ke rau ntawm nws xub ntiag kuj nrog nws nyob ntawm lub phij xab thiab muab yaj muab nyuj coob kawg los tua xyeem suav tsis txheeb li.

6 Cov pov thawj thiaj coj (יחוח)Yahweh lub phij xab sib cog lus mus rau ntawm lub chaw uas npaj cia hauv lub tuam tsev chav sab hauv uas yog chav dawb huv kawg nkaus, mas muab tso rau hauv ob tug Khelunpees qab phab kooj tis.

7 Ob tug Khelunpees ntawd nthuav kooj tis rau saum lub chaw uas txawb lub phij xab mas thiaj roos lub phij xab thiab ob tug las kwv.

8 Ob tug las ntawd ntev heev, mas yog nyob hauv chav dawb huv mas pom ob tug tw las tshwm hauv chav sab hauv tuaj, tiamsis yog nyob sab nraud mas tsis pom. Mas ob tug las ntawd tseem nyob qhov ntawd txog niaj hnub nimno.

9 Tsis muaj abtsi nyob hauv lub phij xab li tsuas yog muaj ob daim txhib zeb uas Mauxes muab tso rau hauv ntawm lub roob Haules uas yog lub chaw uas ()Yahweh nrog cov Ixayees sib cog lus tseg rau thaum lawv tawm hauv Iziv tebchaws los.

10 Thaum cov pov thawj tawm hauv chav dawb huv los, ib tauv huab txawm los puv nkaus (יחוח)Yahweh lub tuam tsev.  

11 Mas cov pov thawj thiaj sawv ntsug ua haujlwm tsis tau vim tauv huab ntawd, rau qhov (יחוח)Yahweh lub hwjchim ci ntsa iab puv nkaus (יחוח)Yahweh lub tuam tsev.

​

Xalaumoos Xyeem Pub Lub Tuam Tsev Rau ()Yahweh

(2 Vaj Keeb Kwm 6:3-11)

12 Ces Xalaumoos txawm hais tias, (יחוח)Yahweh tau hais tias nws yuav nyob hauv qhov tsaus ntuj nti.

13 Kuv tau ua lub tuam tsev zoo heev rau koj, yog lub chaw rau koj nyob mus ib txhis li.

14 Mas vajntxwv tig los foom koob hmoov rau ib tsoom Ixayees sawvdaws rau thaum lawv sawvdaws tseem sawv ntsug.

15 Nws hais tias, cia li qhuas (יחוח)Yahweh uas yog cov Ixayees Tus Tswv uas txhais tes ua tau tiav raws li tej lus uas cog tseg rau kuv txiv Daviv lawd, hais tias,

16 txij hnub uas kuv coj kuv haiv neeg Ixayees tawm hauv Iziv tebchaws los, kuv tsis tau xaiv ib lub moos twg hauv cov xeem Ixayees sawvdaws cia ua lub tuam tsev rau kuv lub npe nyob, tiamsis kuv tau xaiv Daviv ua tus kav kuv haiv neeg Ixayees.

17 Kuv txiv Daviv tau npaj siab cia tias yuav ua lub tuam tsev rau (יחוח)Yahweh uas yog Ixayees Tus Tswv lub npe nyob.

18 Tiamsis (יחוח)Yahweh hais rau kuv txiv Daviv tias, qhov uas koj npaj siab yuav ua lub tuam tsev rau kuv lub npe nyob ntawd koj twb ua zoo lawm.

19 Tiamsis koj tsis yog tus uas yuav ua lub tuam tsev. Koj tus tub uas yuav yug los yog tus uas yuav ua lub tuam tsev rau kuv lub npe nyob.

20 Nimno (יחוח)Yahweh twb ua rau tej lus uas nws cog tseg ntawd tiav lawm.  Rau qhov kuv tau sawv los nyob kuv txiv Daviv chaw thiab nyob saum cov Ixayees lub zwm txwv raws li (יחוח)Yahweh tau cog lus tseg thiab kuv tau ua lub tuam tsev rau (יחוח)Yahweh uas yog cov Ixayees Tus Tswv lub npe nyob.

21 Thiab qhov ntawd kuv tau npaj chaw txawb lub phij xab uas ntim (יחוח)Yahweh tej lus cog tseg uas nws cog rau peb tej poj koob yawm txwv rau thaum nws coj lawv tawm hauv Iziv tebchaws los.

​

Xalaumoos Tej Lus Thov

(2 Vaj Keeb Kwm 6:12-42)

22 Mas Xalaumoos sawv ntsug ntawm (יחוח)Yahweh lub thaj xyeem sab xub ntiag tab meeg ib tsoom Ixayees sawvdaws, thiab nws tsa kiag nws ob txhais tes rau saum ntuj,

23 mas hais tias, Au (יחוח)Yahweh uas yog Ixayees Tus Tswv, yeej tsis muaj ib tug timtswv twg zoo cuag li koj, tsis hais saum qaum ntuj thiab hauv ntiajteb. Koj ua raws li koj cog lus tseg thiab koj ua txojkev hlub uas ruaj khov tshwm rau koj cov qhev uas ua lawv lub neej raws li koj txojkev kawg siab kawg ntsws.

24 Koj tau ua rau kuv txiv Daviv uas yog koj tus tub qhe raws li tej lus uas koj twb cog tseg rau nws lawd. Koj lub qhov ncauj tau hais thiab koj txhais tes ua tiav rau hnub no.  

25 Au (יחוח)Yahweh uas yog Ixayees Tus Tswv, yog li ntawd nimno thov koj ua raws li tej lus uas koj tau cog tseg rau kuv txiv Daviv uas yog koj tus tub qhe hais tias, yog koj tej tub ki ceev faj rau txhua txojkev uas lawv ua thiab ua lawv lub neej raws li kuv txojkev ib yam li koj, mas tsis muaj ib hnub twg uas koj caj ces yuav tu ncua tus txivneej uas nyob saum cov Ixayees lub zwm txwv tab meeg kuv.

26 Au Ixayees Tus Tswv, tej lus uas koj tau hais tseg rau kuv txiv Daviv uas yog koj tus tub qhe mas thov koj ua kom tiav.

27 Mas (יחוח)Yahweh yuav nyob hauv lub ntiajteb lov? Saib maj, txawm yog saum nruab ntug thiab nruab ntug uas siab kawg nkaus los twb tsis txaus rau koj nyob. Mas lub tuam tsev uas kuv ua no yim huab tsis txaus rau koj nyob.  

28 Thov koj saib rau koj tus tub qhe tej lus taij lus thov no. Au (יחוח)Yahweh uas yog kuv Tus Tswv, thov koj mloog kuv lub suab thiab tej lus taij thov uas hnub no koj tus tub qhe thov ntawm koj xub ntiag no,

29 xwv koj lub qhov muag thiaj saib ntsoov lub tuam tsev no nruab hnub hmo ntuj, yog lub chaw uas koj hais tias, kuv lub npe yuav nyob qhov ntawd, koj thiaj li mloog tej lus thov uas koj tus tub qhe tig xub ntiag rau lub chaw no thov.  

30 Thiab thov koj mloog koj tus tub qhe thiab koj haiv neeg Ixayees tej lus taij thov rau thaum lawv tig xub ntiag rau lub chaw no thov. Koj nyob saum lub zwm txwv uas yog koj lub chaw nyob mas thov koj mloog. Thaum koj hnov lawd thov koj zam txim.  

31 Yog leejtwg tau ua txhaum rau nws kwvtij zej zog es yuav tau twv tsawm, thiab nws tuaj twv tsawm ntawm koj lub thaj xyeem hauv lub tuam tsev no,

32 ces thov koj nyob saum ntuj mloog thiab thov koj tu. Thov koj txiav txim rau koj cov qhev ob tog, rau txim rau tus uas ua txhaum thiab coj tej uas nws ua ntawd rov poob rau saum nws taubhau. Thiab tus uas tsis txhaum mas thov koj tsa kom nws muaj cai pauj qhov uas nws ua ncaj ncees.

33 Thaum koj haiv neeg Ixayees swb lawv cov yeeb ncuab rau qhov lawv tau ua txhaum rau koj, mas yog lawv tig rov los cuag koj thiab lees yuav koj lub npe thiab taij thov koj hauv lub tuam tsev no,

34 ces thov koj nyob saum ntuj mloog thiab zam koj haiv neeg Ixayees lub txim thiab coj lawv rov los rau hauv lub tebchaws uas koj tau pub rau lawv tej poj koob yawm txwv no.

35 Thaum rooj ntug kaw thiab tsis muaj nag los vim yog lawv tau ua txhaum rau koj, mas yog lawv tig xub ntiag rau lub chaw no thov thiab lees yuav koj lub npe thiab tig ntawm lawv tej kev txhaum rau thaum koj tsim txom lawv,

36 ces thov koj nyob saum ntuj mloog thiab thov koj zam koj cov qhev uas yog koj haiv neeg Ixayees lub txim. Thov koj qhia txojkev zoo uas tsim nyog lawv taug rau lawv, thiab thov koj pub nag los rau hauv koj lub tebchaws uas koj tau pub ua qub txeeg qub teg rau koj haiv neeg.  

37 Yog lub tebchaws raug kev tshaib nqhis, yog muaj mob kis lossis qoob loo nce hmob lossis tuaj pwm lossis muaj kooj muaj kab ntsig, lossis lawv cov yeeb ncuab tuaj vij lawv hauv lub moos twg, mas txawm yog muaj kev mob phem yam twg los kev mob kev nkeeg yam twg tshwm tuaj,

38 thiab txawm yog ib tug twg lossis koj haiv neeg Ixayees huvsi taij li cas thiab thov li cas vim qhov uas nyias paub nyias kev txom nyem thiab nyias tej kev nyuaj siab es tsa tes ncaj rau lub tuam tsev no,

39 ces thov koj nyob saum ntuj uas yog koj lub chaw nyob mloog thiab zam txim thiab tu rau lawv thiab ua rau txhua tus uas koj twb paub hauv lawv lub siab, raws li lawv tau ua huvsi, rau qhov tsuas yog koj tib leeg xwb thiaj paub hauv tibneeg lub siab huvsi,

40 kom lawv thiaj hwm thiab paub ntshai koj txhua hnub txhua lub sijhawm uas lawv nyob hauv lub tebchaws uas koj tau pub rau peb tej poj koob yawm txwv.

41 Ib yam nkaus li ntawd, thaum lwm haiv neeg ib tug twg uas tsis yog koj haiv neeg Ixayees tuaj lwm lub tebchaws deb tuaj, vim yog hnov txog koj lub npe,

42 vim yog lawv hnov txog koj lub npe uas loj kawg thiab koj txhais tes uas muaj hwjchim thiab koj txhais npab uas tsa hlo, mas thaum lawv tuaj tig xub ntiag rau lub tuam tsev no thov,

43 ces thov koj nyob saum ntuj uas yog koj lub chaw nyob mloog thiab thov koj ua raws li txhua yam uas lwm haiv neeg tau thov rau koj, xwv txhua haiv neeg hauv ntiajteb thiaj paub koj lub npe thiab ntshai thiab hwm koj yam nkaus li koj haiv neeg Ixayees, thiab lawv thiaj paub tias lub tuam tsev uas kuv ua no, lawv hu raws li koj lub npe.

44 Yog koj haiv neeg tawm mus ua rog rau lawv cov yeeb ncuab rau txojkev twg uas koj txib lawv mus, es lawv tig xub ntiag thov ncaj rau lub nroog no uas koj tau xaiv cia thiab tig xub ntiag thov ncaj rau lub tuam tsev uas kuv tau ua rau koj lub npe nyob,

45 mas thov koj nyob saum ntuj mloog lawv tej lus taij lus thov thiab tuav lawv txojcai.

46 Yog lawv ua txhaum rau koj, vim tsis muaj ib tug twg uas tsis ua txhaum, es koj npau taws rau lawv, thiab muab lawv cob rau yeeb ncuab, lawv thiaj raug ntes coj mus rau yeeb ncuab lub tebchaws tsis hais deb los ze,

47 yog lawv lub siab xam pom lawv tej kev txhaum rau hauv lub tebchaws uas lawv raug ntes coj mus ntawd thiab ntxeev dua siab thiab taij thov koj hauv lub tebchaws uas lawv nyob ntawd hais tias, peb tau ua txhaum thiab ua tsis ncaj thiab ua phem kawg li,

48 yog lawv ntxeev dua siab kawg siab kawg ntsws kawg tswvyim plab plaws hauv lub tebchaws uas lawv raug yeeb ncuab ntes coj mus nyob ntawd, thiab yog lawv tig xub ntiag rau lawv lub tebchaws uas koj pub rau lawv tej poj koob yawm txwv thov koj thiab tig xub ntiag rau lub nroog uas koj tau xaiv cia thiab lub tuam tsev uas kuv ua rau koj lub npe nyob no,

49 mas thov koj nyob saum ntuj uas yog koj lub chaw nyob mloog lawv tej lus taij lus thov thiab tuav lawv txojcai.

50 Thiab zam koj haiv neeg lub txim uas lawv tau ua txhaum rau koj, thiab zam lawv tej kev ntxeev siab uas lawv tau tawm tsam koj, thiab pub cov uas ntes lawv coj mus ntawd hlub lawv, thiab ua zoo rau lawv kom lawv thiaj tau txais kev hlub.

51 Lawv yog koj haiv neeg thiab yog koj li qub txeeg qub teg uas koj coj tawm hauv Iziv tebchaws los, yog tawm hauv cub thee hlawv hlau los.

52 Thov tsa koj lub qhov muag saib rau koj tus tub qhe tej lus taij thov thiab saib rau koj haiv neeg Ixayees tej lus taij thov, es tig ntsej mloog rau thaum lawv hu thov koj.

53 Au (יחוח)Yahweh, koj cais lawv tawm hauv ib tsoom tibneeg hauv ntiajteb los ua koj li qub txeeg qub teg raws li koj hais rau koj tus tub qhe Mauxes rau thaum koj coj peb tej poj koob yawm txwv tawm hauv Iziv teb chaws los.

54 Thaum Xalaumoos thov thiab hais tej lus taij no huvsi rau (יחוח)Yahweh tag lawd, nws txawm sawv tsees ntawm (יחוח)Yahweh lub thaj xyeem uas nws tau txhos caug thiab tsa tes thov rau saum ntuj.

55 Nws sawv ntsug thiab foom koob hmoov rau ib tsoom Ixayees sawvdaws nrov nrov hais tias,

56 qhuas (יחוח)Yahweh uas pub nws haiv neeg Ixayees tau so raws li nws cog lus cia txhua yam. Nws tej lus cog tseg zoo txhua lo uas nws kom nws tus tub qhe Mauxes hais ntawd tsis poob ib los li.

57 Thov peb Leej Txiv (יחוח)Yahweh nrog nraim peb ib yam li nws nrog nraim peb tej poj koob yawm txwv. Thov nws tsis txhob ncaim peb thiab tso peb tseg kiag li.

58 Thov nws ua kom peb lub siab tig los cuag nws, peb thiaj ua peb lub neej raws li nws txojkev thiab tuav rawv nws tej lus cob qhia thiab nws tej kab ke thiab nws tej kevcai uas nws hais cia rau peb tej poj koob yawm txwv.

59 Thov cia kuv tej lus uas kuv taij thov ntawm (יחוח)Yahweh lub xub ntiag no nyob ze peb Leej Txiv (יחוח)Yahweh nruab hnub hmo ntuj. Thiab thov nws tuav kuv uas yog nws tus tub qhe txojcai thiab nws haiv neeg Ixayees txojcai kom ruaj khov, raws li niaj hnub muaj los,

60 xwv ib tsoom tibneeg hauv ntiajteb thiaj paub tias (יחוח)Yahweh yog Tus Tswv, tsis muaj dua lwm tus li lawm.   

61 Yog li no nej lub siab cia li xib kiag rau (יחוח)Yahweh uas yog peb Tus Tswv, es ua nej lub neej raws li nws tej kab ke thiab tuav rawv nws tej lus cob qhia ib yam li niaj hnub nimno nej ua.

​

Muab Lub Tuam Tsev Xyeem Rau ()Yahweh

(2 Vaj Keeb Kwm 7:4-10)

62 Mas vajntxwv thiab cov Ixayees sawv daws uas nrog nws ua ke tua tsiaj xyeem rau ntawm (יחוח)Yahweh lub xub ntiag.

63 Xalaumoos muab nyuj 22,000 tus thiab yaj 120,000 tus tua xyeem ua kevcai sib raug zoo rau (יחוח)Yahweh. Vajntxwv thiab cov pejxeem thiaj muab lub tuam tsev xyeem pub rau (יחוח)Yahweh li no.

64 Tib hnub ntawd vajntxwv ua kevcai tu lub plawv tshav puam uas ncaj ntawm lub qhov rooj tuam tsev kom dawb huv. Mas nws muab tsiaj ua kevcai hlawv huvsi xyeem thiab muab tej uas ua kevcai xyeem qoob loo thiab muab cov hlab hluas roj ua kevcai xyeem sib raug zoo rau qhov ntawd, vim lub thaj tooj liab uas nyob ntawm (יחוח)Yahweh lub xub ntiag tsis txaus tso tej uas ua kevcai hlawv huvsi xyeem thiab tej uas ua kevcai xyeem qoob loo thiab tej hlab hluas roj uas ua kevcai xyeem sib raug zoo.

65 Zaum ntawd Xalaumoos thiab ib tsoom Ixayees sawvdaws ua kevcai npaj noj haus xya hnub. Muaj tibneeg coob heev tuaj txoos ua ke txij ntua ntawm txojkev uas mus rau lub moos Hamas mus txog ntua tus dej Iziv.  

66 Hnub uas yim nws tso cov pejxeem rov mus. Lawv foom koob hmoov rau vajntxwv thiab rov qab mus tsev. Lawv zoo siab heev thiab luag ntxhwb ntxhi, vim yog tej kev zoo uas (יחוח)Yahweh ua tshwm los rau nws tus tub qhe Daviv thiab rau (יחוח)Yahweh haiv neeg Ixayees.