(יחוח)Yahweh Tshwm Rau Xalaumoos Zaum Ob

(2 Vaj Keeb Kwm 7:11-22)

1 Thaum Xalaumoos ua tau (יחוח)Yahweh lub tuam tsev thiab nws lub tsev thiab txhua yam uas nws xav ua tiav tag huvsi lawd,

2 (יחוח)Yahweh los tshwm rau Xalaumoos zaum ob ib yam li (יחוח)Yahweh tau tshwm rau nws ntawm Kinpe‑oos.

3 Mas (יחוח)Yahweh hais rau nws tias, kuv twb hnov tej lus uas koj thov koj taij kuv lawm. Kuv twb tu lub tsev uas koj ua no kom dawb huv lawm, thiab kuv yuav cia kuv lub npe nyob hauv mus ib txhiab ib txhis. Kuv lub qhov muag thiab kuv lub siab yuav nrog nraim lub chaw no mus ib txhis.

4 Hais txog koj, yog koj ua koj lub neej ncaj thiab ua ncaj ncees tab meeg kuv ib yam nkaus li koj txiv Daviv ua thiab ua txhua yam raws li uas kuv hais kom koj ua, thiab tuav rawv kuv tej kab ke thiab kuv tej kevcai,

5 mas kuv yuav tsa koj lub zwm txwv rau saum cov Ixayees nyob ruaj mus ib txhiab ib txhis, ib yam li kuv tau cog lus tseg rau koj txiv Daviv lawm hais tias, tsis muaj ib hnub twg uas koj caj ces yuav tu ncua tus txivneej uas nyob saum cov Ixayees lub zwm txwv.

6 Tiamsis yog nej tsis ua raws li kuv hais, tsis hais nej lossis nej cov tub ki tsis tuav rawv kuv tej lus cob qhia thiab tej kab ke uas kuv twb qhia rau nej, es nej mus ua koom tu thiab pe luag tej dab,

7 mas kuv yuav muab cov Ixayees rhuav tshem kom tawm hauv lub tebchaws uas kuv muab pub rau lawv mus, thiab kuv yuav muab lub tuam tsev uas kuv tu kom dawb huv rau kuv lub npe nyob lawd laim pov tseg kom ploj ntawm kuv lub qhov muag.  Mas txhua haiv neeg yuav muab cov Ixayees ua paj lug hais thiab yuav tiag luag ncauj luag lo.

8 Lub tuam tsev no yuav pob ua tej niag pawg cia.  Txhua leej txhua tus uas taug kev yuav xav tsis thoob thiab lawv yuav thuam hais tias, ua cas (יחוח)Yahweh ua li ntawd rau lub tebchaws no thiab lub tuam tsev no?

9 Ces luag yuav teb tias, vim yog lawv muab (יחוח)Yahweh uas yog lawv Tus Tswv uas coj lawv tej poj koob yawm txwv tawm hauv Iziv tebchaws los tso pov tseg es mus tsawv nkaus luag tej dab los pe thiab ua koom tu.  Vim li no (יחוח)Yahweh thiaj tso tej xwm txheej phem no huvsi los raug lawv.

​

Xalaumoos Tej Haujlwm

(2 Vaj Keeb Kwm 8:1-18)

10 Ncua sijhawm nees nkaum xyoo, Xalaumoos ua tau ob lub tsev, yog (יחוח)Yahweh lub tuam tsev thiab vajntxwv lub tsev.

11 Hilas uas ua vajntxwv hauv lub nroog Thailab xa ntoo ciab thiab ntoo ciab nplooj suab thiab kub tuaj rau Xalaumoos npaum li uas Xalaumoos lub siab xav, mas vajntxwv Xalaumoos thiaj li muab nees nkaum lub moos hauv tebchaws Khalilais rau Hilas.

12 Tiamsis thaum Hilas tawm hauv lub nroog Thailab mus saib tej moos uas Xalaumoos muab pub rau nws mas Hilas tsis txaus siab rau tej moos ntawd.  

13 Hilas thiaj hais tias, tus kwv es, tej moos uas koj muab pub rau kuv ntawd zoo li no xwb lov? Luag thiaj hu cov moos ntawd tias tebchaws Khanpus los txog niaj hnub nimno.  

14 Hilas tau xa kub nyhav ib puas nees

nkaum talas tuaj rau vajntxwv Xalaumoos.  

15 No mus yog hais txog tej tub zog uas vajntxwv Xalaumoos yuam kom ua (יחוח)Yahweh lub tuam tsev thiab ua vajntxwv lub tsev thiab ua lub loog Milaus thiab ua lub ntsa loog Yeluxalees thiab muab lub moos Haxaus thiab Mekidaus thiab Kexaws ua dua tshiab.

16 (Yav thaum ub Falaus uas yog cov Iziv tus vajntxwv twb nce tuaj txeeb tau lub moos Kexaws thiab muab hlawv kub nyhiab tag thiab muab cov Khana‑as uas nyob hauv tua tuag tag ces nws txawm muab lub moos ntawd phij cuam rau nws tus ntxhais uas mus yuav Xalaumoos.

17 Mas Xalaumoos thiaj muab Kexaws ua dua tshiab), thiab nws kho lub moos Npes Hauloos nram tiaj nrag,

18 thiab ua lub moos Npa‑alab thiab lub moos Thamas rau hauv tebchaws moj sab qhua hauv Yahdah tebchaws,

19 thiab ua txhua lub moos uas Xalaumoos khaws cuab txhiaj cuab tam cia rau hauv, thiab ua tej moos uas nws khaws tej tsheb nees ua rog rau hauv, thiab ua tej moos uas nws cov tub rog caij nees nyob, thiab ua txhua yam uas Xalaumoos xav kom ua rau hauv lub nroog Yeluxalees thiab hauv tebchaws Lenpanoos thiab thoob plaws tej tebchaws uas Xalaumoos kav.  

20 Cov Amaulais, cov Hithais, cov Pelixais, cov Hivais thiab cov Yenpus uas tseem tshuav nyob, uas tsis yog tibneeg Ixayees,

21 mas cov tibneeg no cov noob uas tshuav nyob hauv lub tebchaws uas cov Ixayees tsis muaj peev xwm muab ua puam tsuaj tag ces Xalaumoos yuam ua qhev los txog niaj hnub nimno.

22 Tiamsis cov tibneeg Ixayees mas Xalaumoos tsis yuam ua qhev.  Lawv ua vajntxwv cov tub rog thiab ua nws cov nom tswv thiab ua thawj kav tub rog huvsi thiab ua cov thawj rog thiab ua thawj kav cov tsheb nees ua rog thiab kav cov tub rog caij nees.

23 Cov no yog cov nom tswv uas ua hlob saib xyuas Xalaumoos tej haujlwm, huvsi muaj tsib puas tsib caug leej ua cov uas saib cov tibneeg uas ua vajntxwv tej haujlwm no.

24 Mas Falaus tus ntxhais tawm hauv Daviv lub nroog mus nyob ntawm lub tsev uas Xalaumoos ua rau nws. Mas Xalaumoos thiaj ua lub loog Milaus.  

25 Ib xyoos Xalaumoos ua kevcai hlawv huvsi xyeem thiab ua kevcai xyeem sib raug zoo saum lub thaj uas nws ua rau (יחוח)Yahweh peb zaug, thiab hlawv hmoov tshuaj tsw qab rau ntawm (יחוח)Yahweh xub ntiag.  Nws ua (יחוח)Yahweh lub tuam tsev tiav log li uas hais no.

26 Vajntxwv Xalaumoos kuj ua ib co nkoj txwg rau ntawm Exi‑oos Kenpaws uas nyob ze Elaus ntawm ntug dej Hiavtxwv Liab hauv tebchaws Edoos.

27 Hilas xa ib pab tib neeg uas txawj tsav nkoj mus hauv hiavtxwv tuaj nrog Xalaumoos cov tub nkoj ua ke.   

28 Lawv mus txog lub moos Aufis mus thauj tau kub nyhav plaub puas nees nkaum talas qhov ntawd los rau vajntxwv Xalaumoos.