Tus Poj Vajntxwv Uas Kav Hauv Senpas Tebchaws Tuaj Saib Xalaumoos

(2 Vaj Keeb Kwm 9:1-12)

1 Thaum tus poj vajntxwv uas kav Senpas tebchaws tau hnov txog Xalaumoos lub meej mom uas ntsig txog (יחוח)Yahweh lub npe, nws txawm tuaj nug Xalaumoos txog ntau yam uas ceeblaj teb tau.  

2 Nws coj ib pab tub teg tub taws coob coob nrog nws tuaj rau hauv Yeluxalees, thiab muaj ntxhuav thauj tej txuj lom thiab kub ntau kawg thiab tej qe zeb hlaws muaj nqis. Thaum nws tuaj cuag Xalaumoos lawd, nws thiaj piav txhua yam uas nyob hauv nws lub siab huvsi rau Xalaumoos.

3 Mas Xalaumoos teb txhua yam uas nws nug tau huvsi tsis muaj ib yam uas vajntxwv yuav tsis paub thiab piav tsis tau rau nws li.

4 Thaum tus poj vajntxwv hauv Senpas pom Xalaumoos lub tswvyim huvsi thiab pom lub tsev uas nws tau ua,

5 thiab pom tej zaub mov saum nws lub rooj thiab cov nom tswv uas nrog nws nyob thiab nws cov tub teg tub taws uas tu nws thiab tej ris tsho uas lawv hnav, thiab cov uas thiab cawv txiv hmab, thiab pom tej uas nws muab ua kevcai hlawv xyeem ntawm (יחוח)Yahweh lub tuam tsev, mas tus poj vajntxwv ntawd tsis pom qab xav li lawm.

6 Mas nws thiaj hais rau vaj ntxwv tias, tej xov uas kuv nyob hauv kuv lub tebchaws hnov hais txog koj tej haujlwm

thiab koj lub tswvyim yeej los muaj tseeb tiag.

7 Tiamsis kuv tsis ntseeg tej lus ntawd mus txog thaum kuv tau tuaj cuag thiab kuv lub qhov muag tau pom lawm.  Saib maj, tej uas lawv hais rau kuv ntawd twb muaj tsis txog ib nrab. Koj lub tswvyim thiab koj tej kev vam meej ntawd tseem muaj ntau dua tej uas kuv tau hnov lawd.

8 Koj cov tibneeg tau hmoov zoo lauj! Koj cov tub teg tub taws uas ua haujlwm ntawm koj xub ntiag ib txwm thiab hnov koj tej tswvyim plab plaws mas tau hmoov zoo lauj!

9 Qhuas (יחוח)Yahweh uas yog koj Tus Tswv uas txaus siab rau koj thiab tau tsa koj nyob saum cov Ixayees lub zwm txwv. Vim (יחוח)Yahweh hlub cov Ixayees mus ib txhis, nws thiaj tsa koj ua vajntxwv kav lawv kom koj thiaj txiav txim ncaj thiab ua ncaj ncees.

10 Mas nws txawm muab kub nyhav ib puas nees nkaum talas thiab tej txuj lom ntau kawg thiab tej qe zeb hlaws muaj nqis rau vajntxwv. Tsis muaj dua txuj lom ntau npaum li tej txuj lom uas tus poj vaj ntxwv hauv Senpas muab rau vajntxwv Xalaumoos no li.

11 Dua li ntawd Hilas tej nkoj uas thauj kub hauv Aufis tuaj kuj thauj ntoo liab txiv khau tawv thiab tej qe zeb hlaws muaj nqis ntau kawg ntawm Aufis tuaj.  

12 Mas vajntxwv thiaj muab cov ntoo liab txiv khau tawv ua ncej rau (יחוח)Yahweh lub tuam tsev thiab rau vajntxwv lub tsev, thiab ua cov nkauj nog ncas me thiab cov nkauj nog ncas loj rau cov hu nkauj. Yeej tsis tau muaj dua tej ntoo liab txiv khau tawv ntau li no coj tuaj rau ntawm no li thiab tsis muaj leejtwg pom dua li no txij thaum ntawd los li lawm.

13 Vajntxwv Xalaumoos pub txhua yam rau tus poj vajntxwv hauv Senpas raws li uas nws xav yuav thiab pub txhua yam uas nws thov thiab nws tseem pub tej uas nws muaj nplua mias ntxiv rau. Mas tus poj vajntxwv thiab nws cov tub teg tub taws txawm rov qab mus rau nws lub tebchaws lawm.

​

Xalaumoos Nplua Nuj Muaj Koob Meej

(2 Vaj Keeb Kwm 9:13-28)

14 Ib xyoos twg mas Xalaumoos tau kub nyhav rau pua rau caum rau talas,

15 tsis xam tej kub uas sau ntawm cov tub lag tub luam thiab tsis xam tej uas sau ntawm tej vajntxwv hauv Alanpias tebchaws sawvdaws thiab ntawm tej nom tswv uas kav hauv lub teb chaws.

16 Vajntxwv Xalaumoos muab kub ntaus ua ob puas daim phiaj loj thaiv, ib daim phiaj mas siv kub nyhav rau pua sekhees ua.

17 Nws muab kub ntaus ua dua peb puas daim phiaj thaiv, ib daim phiaj siv kub nyhav peb minas. Vajntxwv muab cov phiaj kub ntawd khaws cia rau hauv lub tsev Hav Zoov Lenpanoos.

18 Vajntxwv muab kaus ntxhw ua ib lub zwm txwv loj kawg li thiab muab cov tseem kub uas zoo kawg los luam.

19 Lub zwm txwv ntawd muaj rau theem ntaiv, lub zwm txwv sab nrob qaum kheej koov loo. Ob sab ntawm lub zwm txwv muaj ob lub chaw tso tes mas muaj ob tug tsov ntxhuav sawv ze ntawm ob lub chaw tso tes ntawd,

20 thiab muaj kaum ob tug tsov ntxhuav txawb rau saum rau theem ntaiv ntawd ob sab huvsi, ib theem ntaiv ib tug.  Lub zwm txwv zoo li no mas tsis tau ua dua rau lwm lub tebchaws li.

21 Tej khob uas vajntxwv Xalaumoos siv haus dej mas puav leej xuas kub ua xwb, thiab tej twj siv hauv lub tsev Hav Zoov Lenpanoos huvsi puav leej yog xuas tseem kub ua xwb, tsis muaj ib yam uas xuas nyiaj ua li. Ncua sijhawm uas Xalaumoos nyob ntawd mas saib nyiaj yam li tsis muaj nqis li.

22 Rau qhov vaj ntxwv muaj ib co nkoj txwg hauv lub moos Thasis nrog Hilas cov nkoj hla hiavtxwv ua ke. Peb xyoos mas Thasis cov nkoj yuav thauj kub, thauj nyiaj, thauj kaus ntxhw, thauj liab, thauj noog yaj yuam tuaj ib zaug.

23 Yog li no mas vajntxwv Xalaumoos thiaj li nplua nuj thiab muaj laj lim tswvyim plab plaws ntau dua txhua tus vajntxwv uas nyob hauv ntiajteb no.

24 Tej tibneeg thoob ntiajteb xav tuaj cuag Xalaumoos, xav hnov tej tswvyim plab plaws uas (יחוח)Yahweh pub rau nws.

25 Txhua tus kuj coj tshav ntuj tuaj pub yog tej uas xuas nyiaj xuas kub ua, tej tsoos tsho, tej cuab yeej ua rog, tej txuj lom, nees thiab luj txwv tuaj, niaj xyoo muaj li no.

26 Xalaumoos sau tau tej tsheb nees ua rog thiab cov tub rog caij nees. Nws muaj tsheb nees ua rog ib txhiab plaub puas lub thiab muaj cov tub rog uas caij nees kaum ob txhiab leej, uas nws kom ib txhia nyob rau hauv tej moos uas nws npaj rau tej tsheb nees ua rog thiab ib txhia nrog vajntxwv nyob hauv lub nroog Yeluxalees.  

27 Vajntxwv ua rau tej nyiaj uas nyob hauv lub nroog Yeluxalees muaj nqis ib yam li tej pob zeb xwb, thiab ua rau ntoo ciab muaj ntau yam nkaus li tej ntoo txiv cev hauv tej pov roob Sefelas.

28 Xalaumoos yuav nees hauv Iziv tebchaws thiab hauv Kheves tebchaws los. Vajntxwv cov tub luam mus yuav hauv Kheves tebchaws raws li tus nqi.

29 Ib lub tsheb nees ua rog hauv Iziv tebchaws mas yuav rau pua sekhees nyiaj, ib tug nees hauv Iziv mas yuav ib puas tsib caug sekhees. Mas vajntxwv cov tub luam yuav xa tej no mus muag rau cov Hithais tej vajntxwv sawvdaws thiab cov Alas tej vajntxwv.