Xalaumoos Tso (יחוח)Yahweh Tseg

1 Vajntxwv Xalaumoos nyiam lwm haiv neeg tej ntxhais ntau leej. Dhau Falaus tus ntxhais lawm tseem muaj cov Mau‑as, cov Asmoos, cov Edoos, cov Xaidoos thiab cov Hithais tej ntxhais,

2 yog tej haiv neeg uas (יחוח)Yahweh tau hais rau cov Ixa-yees tias, nej tsis txhob mus yuav lawv tej ntxhais thiab tsis txhob cia lawv yuav nej tej ntxhais, rau qhov lawv yuav haub ntxias nej lub siab mus ua koom tu lawv tej dab.

Xalaumoos nyiam lawv thiaj tsis tso lawv tseg.

3 Nws yuav xya pua tus niam yau uas yog cov thawj cov ntxhais thiab coj peb puas tus hluas nkauj los kav.  Nws cov pojniam ntawd thiaj haub tau nws lub siab lawm.

4 Thaum Xalaumoos laus lawd nws cov pojniam ntawd haub nws mus ua koom tu luag tej dab, thiab nws lub siab tsis xib rau (יחוח)Yahweh uas yog nws Tus Tswv, tsis thooj li nws txiv Daviv lub siab lawm.

5 Rau qhov Xalaumoos ua koom tu tus poj dab Athaules uas yog cov Xaidoos tus dab, thiab ua koom tu Mikhoos uas yog cov Asmoos tus dab qias vuab tsuab.

6 Xalaumoos thiaj ua tej uas (יחוח)Yahweh pom tias phem kawg li tsis ua koom tu (יחוח)Yahweh kawg siab kawg ntsws yam li nws txiv Daviv lawm.

7 Xalaumoos ua tej chaw siab teev dab Khemauj uas yog cov Mau‑as tus dab qias vuab tsuab, thiab teev dab Maulej uas yog cov Asmoos tus dab qias vuab tsuab, rau saum lub roob uas nyob ntawm Yeluxalees sab hnub tuaj.

8 Nws ua tej chaw teev dab rau nws cov pojniam uas yog lwm haiv neeg txhua tus, mas lawv hlawv xyab thiab tua tsiaj xyeem rau lawv tej dab.

9 Ces (יחוח)Yahweh chim rau Xalaumoos, vim nws lub siab tig hlo ntawm (יחוח)Yahweh uas yog cov Ixayees Tus Tswv uas twb tshwm rau nws ob zaug lawm,

10 thiab qhia rau nws txog tej no kom nws tsis txhob mus raws kua luag tej dab. Tiamsis Xalaumoos tsis ua raws li tej uas (יחוח)Yahweh qhia.

11 Vim li no (יחוח)Yahweh thiaj hais rau Xalaumoos tias, vim koj lub siab xav li kod thiab koj tsis tuav rawv kuv tej lus cog tseg thiab kuv tej kab ke uas kuv hais cia rau koj, mas kuv yeej yuav muab lub tebchaws dua rhe ntawm koj thiab muab cob rau koj ib tug tub teg tub taws kav.

12 Txawm li ntawd los vim yog saib rau koj txiv Daviv, kuv yuav tsis ua li ntawd rau thaum koj tseem ciaj sia nyob, kuv yuav dua rhe lub tebchaws ntawm koj tus tub txhais tes.  

13 Tiamsis kuv yuav tsis dua tag nrho lub tebchaws, kuv yuav tseg ib lub xeem pub rau koj tus tub, vim yog saib rau kuv tus tub qhe Daviv thiab saib rau lub nroog Yeluxalees uas kuv xaiv cia lawd.

​

Xalaumoos Cov Yeeb Ncuab

14 (יחוח)Yahweh ua rau Hadas uas yog tibneeg Edoos, yog cov Edoos tej vajntxwv caj ces sawv tawm tsam Xalaumoos.

15 Thaum Daviv nyob hauv Edoos tebchaws mas Yahas uas ua thawj kav tub rog tau mus faus cov uas raug tua tuag, nws txawm muab txhua tus txivneej hauv Edoos tua pov tseg.

16 Yahas thiab cov Ixayees sawvdaws nyob hauv Edoos tau rau lub hli mus txog thaum muab cov txivneej hauv Edoos tua tag huvsi.

17 Thaum ntawd Hadas tseem yau mas nws nrog cov tibneeg Edoos qee leej uas yog nws txiv cov tub teg tub taws khiav mus rau hauv Iziv tebchaws.  

18 Lawv khiav tawm ntawm Midees los rau Palas mas coj ib txhia tibneeg hauv lub moos Palas nrog lawv khiav mus rau Iziv tebchaws, mus cuag cov Iziv tus vajntxwv Falaus, mas vajntxwv pub ib lub tsev rau nws nyob thiab niaj hnub pub mov rau nws noj thiab pub teb rau nws.

19 Hadas ua tau haum Falaus siab kawg li mas Falaus thiaj muab nws tus poj niam Thapenes tus niam hluas rau Hadas yuav, yog Thapenes uas ua poj vajntxwv tus niam hluas ntag.

20 Thapenes tus niam hluas kuj yug tau ib tug tub hu ua Kenunpas rau Hadas, mas poj vajntxwv Thapenes coj los tu hlob rau hauv Falaus lub tsev mas Kenunpas thiaj nrog vajntxwv tej tub nyob hauv Falaus lub tsev ua ke.

21 Thaum Hadas nyob hauv Iziv tebchaws hnov tias Daviv tuag mus nrog nws tej poj koob yawm txwv nyob lawm thiab hnov tias Yahas uas ua thawj kav tub rog kuj tuag lawm mas Hadas txawm hais rau Falaus tias, thov koj cia kuv rov qab mus rau kuv teb kuv chaw.

22 Falaus hais rau nws tias, koj nrog kuv nyob koj tu ncua ib yam abtsi es nimno koj yuav nrhiav kev rov qab mus rau koj lub tebchaws? Mas Hadas teb rau nws tias, thov cia kuv mus xwb.

23 (יחוח)Yahweh ua rau Eliyadas tus tub Lexoos sawv twv Xalaumoos thiab.  Lexoos yog vajntxwv Hadadexaws uas kav hauv lub moos Xaunpas ib tug tub qhe uas khiav lawm.

24 Thaum Daviv mus tua cov tibneeg hauv Xaunpas tag mas Lexoos cia li sau tau ib co tibneeg nrog nws thiab nws ua thawj coj lawv mus huab lwg luag. Lawv mus txog lub nroog Damaxakas thiab nyob qhov ntawd mas lawv tsa nws ua vajntxwv kav lub nroog Damaxakas.

25 Nws ua yeeb ncuab rau cov Ixayees tag Xalaumoos sim neej, nws ua phem rau cov Ixayees ib yam nkaus li Hadas ua. Nws ntxub cov Ixayees, nws ua vajntxwv kav kiag Alas tebchaws.

​

()Yahweh Cog Lus Rau Yelaunpau‑as

26 Yelaunpau‑as uas yog Nenpas tus tub yog xeem Efa‑is uas nyob hauv lub moos Xeledas, kuj tsa tes tawm tsam vajntxwv thiab. Nws yog Xalaumoos ib tug tub teg tub taws, nws niam hu ua Xelu‑as yog ib tug poj ntsuam.

27 Qhov uas nws tsa tes tawm tsam vajntxwv yog vim li uas hais no. Xalaumoos ua lub loog Milaus thiab txhaws lub qhov ntsa loog ntawm nws txiv Daviv lub nroog.

28 Yelaunpau‑as yog ib tug khov sim kho. Thaum Xalaumoos pom tias tus hluas ntawd nquag heev, nws thiaj muab tsa ua tus saib xyuas cov tub zog sawvdaws uas nws yuam hauv Yahxej caj ces los ua haujlwm.

29 Lub sijhawm ntawd Yelaunpau‑as tawm hauv Yeluxalees mus mas Ahiyah uas yog xibhwb cev (יחוח)Yahweh lus yog tibneeg Silaus ntsib nws ntawm tog kev.  Ahiyah hnav ib lub tsho tshiab. Nkawv ob leeg nyob tom teb xwb.

30 Ces Ahiyah txawm muab nws lub tsho tshiab uas nws hnav ntawd dua ua kaum ob daim.

31 Mas nws hais rau Yelaunpau‑as tias, koj cia li coj kaum daim mus, rau qhov (יחוח)Yahweh uas yog cov Ixayees Tus Tswv hais li no tias, saib nawj, kuv tab tom yuav dua lub tebchaws ntawm Xalaumoos txhais tes thiab muab kaum lub xeem rau koj.

32 Tiamsis nws tseem yuav muaj ib lub xeem xwb, vim yog saib rau kuv tus tub qhe Daviv thiab saib rau lub nroog Yeluxalees uas kuv xaiv hauv txhua xeem Ixayees los lawd.

33 Twb yog vim nws tso kuv tseg mus pe hawm poj dab Athaules uas yog cov Xaidoos tus dab thiab pe Khemauj uas yog cov Mau‑as tus dab thiab pe Mikhoos uas yog cov Asmoos tus dab, thiab nws tsis ua raws li kuv txojkev, thiab tsis ua tej uas kuv pom tias zoo thiab tsis tuav rawv kuv tej kab ke thiab kuv tej kevcai, ib yam li nws txiv Daviv tau ua lawd.

34 Txawm li ntawd los kuv yuav tsis muab nws lub tebchaws huvsi rho kiag ntawm nws txhais tes, tiamsis kuv yuav cia nws kav mus tag nws sim neej, vim yog saib rau kuv tus tub qhe Daviv uas kuv xaiv cia lawd, yog tus uas tuav rawv kuv tej lus cob qhia thiab kuv tej kab ke.

35 Tiamsis kuv yuav rho lub tebchaws hauv nws tus tub txhais tes, thiab muab kaum lub xeem cob rau koj.

36 Kuv tseem yuav muab ib xeem rau nws tus tub, xwv kuv tus tub qhe Daviv thiaj muaj lub teeb rau ntawm kuv xub ntiag rau hauv Yeluxalees tsis tu li, yog lub nroog uas kuv xaiv cia rau kuv lub npe nyob.

37 Kuv yuav txais koj thiab koj yuav kav txhua yam raws li koj lub siab xav, thiab koj yuav ua vajntxwv kav cov Ixayees.  

38 Yog koj mloog kuv tej lus uas kuv hais rau koj txhua yam thiab ua koj lub neej raws nraim kuv txojkev thiab ua tej uas kuv pom tias zoo es tuav rawv kuv tej kab ke thiab kuv tej lus cob qhia ib yam li kuv tus tub qhe Daviv tau ua, mas kuv yuav nrog nraim koj thiab tsa koj caj ces nyob ruaj khov ib yam li kuv tsa Daviv caj ces, thiab kuv yuav muab cov Ixayees rau koj.

39 Tim li no kuv yuav ua rau Daviv caj ces raug kev nyuaj siab tiamsis tsis yog raug mus ib txhis.  40Xalaumoos thiaj nrhiav kev yuav muab Yelaunpau‑as tua, tiamsis Yelaunpau‑as khiav mus rau hauv Iziv tebchaws mus cuag Sisab uas yog Iziv tus vajntxwv, thiab nws nyob hauv Iziv tebchaws mus txog thaum Xalaumoos tuag.

​

Xalaumoos Tuag

(2 Vaj Keeb Kwm 9:29-31)

41 Lwm yam haujlwm uas Xalaumoos ua thiab txhua yam uas nws ua thiab nws lub tswvyim twb muab sau cia rau hauv phau ntawv uas sau Xalaumoos tej haujlwm lawm.  

42 Xalaumoos nyob hauv Yeluxalees ua vajntxwv kav cov Ixayees huvsi tau plaub caug xyoo.

43 Xalaumoos kuj tuag mus nrog nws tej poj koob yawm txwv nyob thiab lawv muab nws faus rau hauv nws txiv Daviv lub nroog, ces nws tus tub Lehaunpau‑as ua vajntxwv kav nyob nws chaw.