Ixayees Ntxeev Siab

(2 Vaj Keeb Kwm 10:1-11:4)

1 Lehaunpau‑as mus rau ntawm lub moos Sekhees, rau qhov cov Ixayees sawvdaws tau tuaj rau ntawm Sekhees es yuav tsa nws ua vajntxwv.

2 Thaum Nenpas tus tub Yelaunpau‑as tau hnov xov, rau thaum nws tseem nyob hauv Iziv tebchaws uas nws tau khiav vajntxwv Xalaumoos mus nyob, mas Yelaunpau‑as txawm rov ntawm Iziv teb chaws los.

3 Lawv txawm txib tibneeg mus hu nws, mas Yelaunpau‑as thiab ib tsoom Ixa-yees sawvdaws tuaj hais rau Lehaunpau‑as tias,

4 koj txiv tau ua tus quab nyhav heev rau peb. Yog li ntawd nimno thov koj ua rau tej haujlwm nyhav uas koj txiv kom peb ua thiab nws tus quab nyhav uas nyob saum peb ntawd sib zog, mas peb yuav ua haujlwm rau koj.

5 Lehaunpau‑as hais rau lawv tias, cia li rov mus, es peb hnub li rov tuaj cuag kuv ib zaug thiab.  Cov pejxeem txawm rov mus lawm.

6 Vajntxwv Lehaunpau‑as mus sablaj rau cov laus uas tu nws txiv Xalaumoos rau thaum nws txiv tseem muaj txojsia nyob hais tias, nej yuav qhia kuv teb li cas rau cov pejxeem no?

7 Mas lawv hais rau nws tias, yog hnub no koj yuav ua cov pejxeem no qhev thiab tu lawv thiab teb tej lus zoo rau lawv, mas lawv yuav ua koj cov qhev mus ib txhis li.   

8 Tiamsis nws tsis quav ntsej tej lus uas cov laus qhia ntawd, nws txawm mus sablaj rau cov tub hluas uas nrog nws hlob ib phaum thiab ua haujlwm rau nws.

9 Nws hais rau lawv tias, nej yuav qhia kom peb teb li cas rau cov pejxeem no uas tau hais rau kuv tias, thov koj ua rau tus quab uas koj txiv muab tso rau saum peb kom sib zog?

10 Cov tub hluas uas nrog nws hlob ib phaum txawm hais rau nws tias, koj hais li no rau cov pejxeem uas hais rau koj tias, koj txiv tau ua rau peb tus quab nyhav, thov koj ua kom sib zog. Mas koj cia li hais rau lawv li no, kuv tus nyuag ntiv tes rwg qab tseem loj dua kuv txiv lub duav.

11 Txawm yog kuv txiv tau tso tus quab nyhav rau saum nej los kuv yuav tsav ntxiv kom tus quab ntawd nyhav dua thiab. Kuv txiv xuas pas nplawm nej tiamsis kuv yuav xuas raub ris teb nplawm nej.

12 Yelaunpau‑as thiab cov pejxeem sawv daws thiaj rov tuaj cuag Lehaunpau‑as rau hnub peb raws li vajntxwv tau hais tias, rov qab tuaj cuag kuv rau hnub peb. 13 Mas vaj ntxwv teb nyaum kawg li rau cov pejxeem, nws tsis quav ntsej tej lus uas cov laus qhia rau nws.

14 Nws hais rau lawv raws li cov tub hluas tau qhia rau nws hais tias, kuv txiv ua rau nej tus quab nyhav tiamsis kuv yuav tsav ntxiv kom tus quab ntawd nyhav dua thiab. Kuv txiv xuas pas nplawm nej xwb tiamsis kuv yuav xuas raub ris teb nplawm nej.

15 Vajntxwv thiaj tsis mloog cov pejxeem tej lus, rau qhov tej xwm txheej no yog los ntawm (יחוח)Yahweh xwv (יחוח)Yahweh thiaj ua tau tiav raws li tej lus uas nws tau txib Ahiyah uas yog tibneeg hauv Silaus hais rau Nenpas tus tub Yelaunpau‑as.

16 Thaum cov Ixayees sawvdaws pom tias vajntxwv tsis mloog lawv tej lus, lawv thiaj teb vajntxwv tias, peb muaj feem abtsi rau hauv Daviv lawm? Peb tsis muaj qub txeeg qub teg hauv Yisais tus tub li lawm.  Ixayees es, cia li rov mus rau hauv nej tej tsev ntaub. Au Daviv, koj cia li saib xyuas koj caj ces xwb lauj!  Mas cov Ixayees sawvdaws txawm rov mus rau nyias vaj nyias tsev lawm.  

17 Mas Lehaunpau‑as tsuas kav cov Ixayees uas nyob rau hauv tej moos hauv Yahdah teb chaws xwb.

18 Mas vajntxwv Lehaunpau‑as txib Adaulas uas yog tus saib xyuas cov tib neeg raug quab yuam ua haujlwm mus saib cov Ixayees mas lawv sawvdaws xuas pob zeb ntaus nws tuag. Ces vajntxwv Lehaunpau‑as txawm maj nroos nce nws li tsheb nees ua rog khiav rov los rau hauv Yeluxalees.

19 Ixayees thiaj li ntxeev siab rau Daviv caj ces los txog niaj hnub nimno.

20 Thaum cov Ixayees sawvdaws tau hnov tias Yelaunpau‑as rov los lawm, lawv txawm txib tibneeg mus hu nws tuaj rau ntawm ib tsoom pejxeem sawvdaws thiab muab nws tsa ua vajntxwv. Tsis muaj leejtwg koom nrog Daviv caj ces, tsuas yog xeem Yahdah xwb.

21 Thaum Lehaunpau‑as mus rau hauv Yeluxalees lawd, nws txawm sau cov Yahdah thiab xeem Npeeyamees sawvdaws tuaj ua ke, huvsi muaj 180,000 leej tub rog uas txawj tshaj plaws es yuav mus ua rog rau cov Ixayees thiab muab lub tebchaws rov los rau Lehaunpau‑as uas yog Xalaumoos tus tub kav.

22 Tiamsis (יחוח)Yahweh hais lus tuaj rau Semayah uas yog (יחוח)Yahweh tus tibneeg tias,

23 cia li hais rau Xalaumoos tus tub Lehaunpau‑as uas ua vajntxwv kav Yahdah tebchaws thiab hais rau cov Yahdah thiab cov Npeeyamees sawvdaws thiab hais rau cov pejxeem uas nrog lawv nyob tias,

24 (יחוח)Yahweh hais li no tias, nej tsis txhob nce mus ua rog rau nej cov kwvtij Ixayees.  Sawvdaws cia li rov mus nyias vaj nyias tsev, rau qhov tej xwm txheej no yog los ntawm kuv los. Yog li no lawv thiaj mloog (יחוח)Yahweh tej lus thiab rov mus nyias vaj nyias tsev raws li (יחוח)Yahweh hais.

​

Yelaunpau‑as Coj Cov Ixayees Ua Txhaum

25 Mas Yelaunpau‑as muab lub moos Sekhees pem toj siab Efa‑is tebchaws ua dua tshiab thiab nws mus nyob qhov ntawd. Nws kuj tawm qhov ntawd mus muab lub moos Penu‑ees ua dua tshiab.

26 Yelaunpau‑as xav hauv lub siab tias, ntshai tsam lub tebchaws yuav tig mus zwm rau Daviv caj ces.  

27 Yog cov pejxeem no pheej mus xyeem tsiaj rau hauv (יחוח)Yahweh lub tuam tsev nram lub nroog Yeluxalees, ces cov pejxeem no lub siab yuav tig rov mus zwm rau lawv Tus Tswv uas yog Yahdah tus vajntxwv Lehaunpau‑as, ces lawv yuav muab kuv tua pov tseg es rov qab mus zwm rau Yahdah tus vajntxwv Lehaunpau‑as.

28 Yog li ntawd nws thiaj ntaus tswvyim thiab muab kub ua ob tug dab mlom thav nyuj. Nws thiaj hais rau cov pejxeem tias, qhov uas nej pheej nce mus rau lub nroog Yeluxalees txaus lawm. Cov Ixayees es, cia li saib nej tej timtswv no nawb, yog tej timtswv uas coj nej tawm hauv Iziv tebchaws los.

29 Nws muab ib tug txawb rau hauv lub moos Npe‑ees thiab ib tug txawb rau hauv lub moos Daj.

30 Mas qhov no ua txhaum muaj txim vim yog cov pejxeem mus pe tus uas nyob ntawm Npe‑ees thiab mus pe tus uas nyob ntawm lub moos Daj.

31 Yelaunpau‑as kuj ua tsev teev dab rau ntawm tej chaw siab, thiab nws tsa cov pejxeem uas tsis yog xeem Levis ua pov thawj.

32 Thiab Yelaunpau‑as teem hnub tim kaum tsib lub yim hli ua kevcai noj haus ib yam li txoj kevcai noj haus hauv Yahdah, thiab nws tua tsiaj xyeem rau saum lub thaj. Nws ua li no rau hauv lub moos Npe‑ees, yog xyeem tsiaj rau tej dab mlom thav nyuj uas nws ua ntawd. Nws tsa pov thawj ua haujlwm rau hauv tej chaw siab uas nws ua rau ntawm lub moos Npe‑ees.

33 Nws nce mus rau ntawm lub thaj uas nws ua rau hauv lub moos Npe‑ees rau hnub tim kaum tsib lub yim hli, yog lub hli uas nws lub siab xav tseg teem cia. Thiab nws teem sijhawm ua kevcai noj haus rau cov Ixayees thiab nws nce mus hlawv hmoov tshuaj tsw qab xyeem rau ntawm lub thaj ntawd.