1 VAJNTXWV 13

(יחוח)Yahweh Tus Tibneeg Ntuas Yelaunpau‑as

1 Muaj (יחוח)Yahweh ib tug tibneeg los tawm hauv Yahdah raws li

(יחוח)Yahweh txib, nws mus rau Npe‑ees. Yelaunpau‑as sawv ntsug ntawm lub thaj yuav hlawv cov hmoov tshuaj tsw qab.

2 Tus xibhwb ntawd txawm qw foom lub thaj ntawd raws li (יחוח)Yahweh kom nws hais tias, lub thaj nis lub thaj, (יחוח)Yahweh hais li no tias, Daviv caj ces yuav yug ib tug tub hu ua Yauxiyah. Nws yuav muab cov pov thawj uas ua haujlwm ntawm tej chaw siab teev dab es tseem los hlawv hmoov tshuaj tsw qab rau saum koj tua xyeem rau saum koj, thiab yuav hlawv tibneeg li pob txha saum koj.

3 Nws kuj ua txujci tseem ceeb tshwm rau hnub ntawd, nws hais tias, no yog txujci tseem ceeb uas (יחוח)Yahweh twb hais cia lawm, saib maj, lub thaj no yuav raug muab ua pob tag, tej tshauv saum lub thaj no yuav raug muab nchuav tag.

4 Thaum vajntxwv hnov (יחוח)Yahweh tus tibneeg hais tej lus foom lub thaj ntawm Npe‑ees ntawd, mas Yelaunpau‑as nkaug tes nkuav ntawm lub thaj tuaj hais tias, cia li muab nws ntes kiag cia. Ces vajntxwv txhais tes uas xyab hlo tuaj ntawd txawm cia li qhuav qhawv mas nkaum tsis tau tes rov qab.

5 Thiab lub thaj kuj pob rhe, tej tshauv kuj nchuav saum lub thaj los, raws li tej txujci tseem ceeb uas (יחוח)Yahweh tau kom (יחוח)Yahweh tus tibneeg hais ntag.

6 Mas vaj ntxwv hais rau (יחוח)Yahweh tus tibneeg ntawd tias, cia li thov (יחוח)Yahweh uas yog koj Tus Tswv pab kuv, thiab thov pab kom kuv txhais tes rov qab zoo li qub.  Mas (יחוח)Yahweh tus tibneeg thiaj thov (יחוח)Yahweh mas vajntxwv txhais tes txawm rov qab muaj zog zoo kiag li qub.

7 Vajntxwv txawm hais rau (יחוח)Yahweh tus tibneeg tias, los hauv kuv lub tsev thiab nrog kuv noj mov, kuv yuav muab tshav ntuj rau koj.

8 (יחוח)Yahweh tus tibneeg hais rau vaj ntxwv tias, txawm yog koj muab kiag koj cuab txhiaj cuab tam ib nrab rau kuv los kuv yuav tsis nrog koj mus, thiab kuv yuav tsis noj ib khaw mov lossis haus ib pas dej ntawm no li.

9 Rau qhov (יחוח)Yahweh tej lus twb hais tuaj rau kuv tias, koj tsis txhob noj mov, tsis txhob haus dej, tsis txhob taug txoj qub kev uas koj tuaj rov qab.

10 Nws txawm mus dua lwm txojkev lawm tsis rov taug txoj qub kev uas nws tuaj rau ntawm Npe‑ees.

11 Muaj ib tug xibhwb cev (יחוח)Yahweh lus laus laus li nyob hauv lub moos Npe‑ees.  Mas nws cov tub txawm los hais txhua yam uas (יחוח)Yahweh tus tibneeg tau ua ntawm Npe‑ ees hnub ntawd rau nws mloog.  Tej lus uas tus xibhwb ntawd hais rau vajntxwv, lawv kuj piav huvsi rau leej txiv mloog.

12 Mas leej txiv hais rau lawv tias, tus xibhwb ntawd mus txojkev twg lawm? Ces cov tub txawm qhia txojkev uas (יחוח)Yahweh tus tibneeg uas tuaj nram Yahdah tuaj mus rau leej txiv. 

13 Ces nws txawm hais rau nws cov tub tias, cia li nog eeb nees luav rau kuv. Lawv txawm nog eeb nees luav rau nws, nws thiaj caij.

14 Nws mus caum cuag (יחוח)Yahweh tus tibneeg zaum hauv ib tsob qab ntoo qheb, nws thiaj hais rau tus xibhwb tias, koj yog (יחוח)Yahweh tus tibneeg uas tuaj nram Yahdah tuaj lov? Nws teb tias, yog kawg.

15 Ces tus xibhwb laus txawm hais rau nws tias, nrog kuv mus lawm tom kuv tsev mus noj mov.

16 Nws teb tias, kuv nrog koj mus tsis tau thiab mus so tsis tau hauv koj tsev. Kuv yuav tsis nrog koj noj mov lossis nrog koj haus dej ntawm no li.

17 Rau qhov (יחוח)Yahweh tej lus hais tuaj rau kuv tias, koj tsis txhob noj mov, tsis txhob haus dej qhov ntawd li thiab tsis txhob taug txoj qub kev uas koj tuaj rov qab.

18 Tus xibhwb laus txawm hais rau nws tias, kuv kuj yog ib tug xibhwb cev (יחוח)Yahweh lus ib yam li koj thiab. Muaj ib tug tubtxib saum ntuj hais (יחוח)Yahweh cov lus rau kuv tias, cia li coj nws rov los rau hauv koj tsev kom nws thiaj tau mov noj tau dej haus. Tiamsis yog nws dag xwb.

19 Ces (יחוח)Yahweh tus tibneeg thiaj nrog nws rov qab mus, tau mus noj mov thiab haus dej hauv nws tsev.

20 Thaum nkawv tab tom nyob ntawm rooj mov mas (יחוח)Yahweh hais lus tuaj rau tus xibhwb laus uas coj nws rov los ntawd.

21 Ces nws txawm qw rau (יחוח)Yahweh tus tibneeg uas tuaj nram Yahdah tuaj hais tias, (יחוח)Yahweh hais li no tias, vim koj tsis mloog (יחוח)Yahweh tej lus thiab tsis ua raws li uas (יחוח)Yahweh uas yog koj Tus Tswv hais kom koj ua.

22 Thiab vim koj tau rov los noj mov thiab haus dej rau lub chaw ua (יחוח)Yahweh hais rau koj tias tsis txhob noj mov, tsis txhob haus dej li, ces koj lub cev tuag yuav mus tsis txog koj tej poj koob yawm txwv lub qhov ntxa.  

23 Ces thaum (יחוח)Yahweh tus tibneeg noj mov thiab haus dej tag, tus xibhwb laus txawm nog eeb nees luav rau (יחוח)Yahweh tus tibneeg uas nws coj los ntawd.

24 Thaum tus xibhwb hluas ntawd mus, muaj ib tug tsov ntxhuav txawm tawm los ntsib nws ntawm tog kev mas muab nws tom tuag, muab nws lub cev tuag tso rau hauv txojkev mas tus nees luav sawv ntawm nws ib sab thiab tus tsov ntxhuav kuj sawv ntawm nws ib sab thiab.

25 Muaj tibneeg dua kev thiab pom lub cev tuag pov rau hauv txojkev thiab tus tsov ntxhuav sawv ib sab ntawm lub cev tuag. Ces lawv thiaj li los piav rau hauv lub moos uas tus xibhwb laus ntawd nyob.

26 Mas thaum tus xibhwb laus uas coj nws rov los ntawd hnov txog tej xwm txheej ntawd, nws txawm hais tias, tus ntawd yog (יחוח)Yahweh tus tibneeg uas tsis mloog (יחוח)Yahweh tej lus. Vim li ntawd (יחוח)Yahweh thiaj li muab nws rau tsov ntxhuav, tsov ntxhuav thiaj li muab nws dua muab nws tom tuag raws li tej lus uas (יחוח)Yahweh hais rau nws.

27 Ces nws thiaj hais rau nws cov tub tias, cia li nog eeb nees luav rau kuv. Mas lawv thiaj nog eeb nees luav.

28 Nws txawm mus mas pom lub cev tuag pov rau hauv txojkev thiab pom tus nees luav thiab tus tsov ntxhuav sawv ib sab ntawm lub cev tuag ntawd. Tus tsov ntxhuav kuj tsis noj lub cev tuag ntawd thiab tsis dua tus nees luav ntawd.

29 Ces tus xibhwb laus txawm muab (יחוח)Yahweh tus tibneeg lub cev tuag tsaws rau saum tus nees luav coj rov los rau hauv tus xibhwb laus lub moos, coj los pam thiab muab faus.

30 Nws muab lub cev tuag ntawd faus rau lub chaw uas yuav faus nws ntag, mas lawv quaj quaj hais tias, Au kuv kwv kuv tij es.  

31 Thaum muab faus tag lawd nws thiaj hais rau nws cov tub tias, thaum kuv tuag nej muab kuv faus rau hauv lub qhov ntxa uas faus (יחוח)Yahweh tus tibneeg no thiab muab kuv cov pob txha tso ti nkaus nws cov pob txha.  

32 Rau qhov tej lus uas (יחוח)Yahweh kom nws qw foom lub thaj ntawm Npe‑ees thiab foom tej tsev dab saum tej chaw siab huvsi uas nyob hauv Xamalis tej moos, yeej yuav tiav xwb xwb li.

33 Dhau tej xwm txheej no lawm Yelaunpau‑as kuj tsis tso nws tej kev txhaum tseg li, nws tseem tsa cov pejxeem qee leej ua pov thawj rau ntawm tej chaw siab teev dab dua thiab. Leejtwg txaus siab ua nws kuj cia li muab tsa ua pov thawj rau ntawm tej chaw siab teev dab.

34 Tej no yog Yelaunpau‑as caj ces tej kev txhaum uas ua rau lawv raug muab rhuav tshem ploj tag hauv ntiajteb no.