Xibhwb Ahiyah Hais Yelaunpau‑asLub Txim

1 Lub sijhawm ntawd Yelaunpau‑as tus tub Anpiyah mob,

2 mas Yelaunpau‑as txawm hais rau nws tus pojniam tias, koj cia li hloov tsoos tsho txhob kheev luag paub tias koj yog Yelaunpau‑as tus pojniam, es mus rau lub moos Silaus rau qhov Ahiyah uas ua xibhwb cev (יחוח)Yahweh lus nyob qhov ntawd. Nws yog tus uas hais rau kuv tias kuv yuav ua vajntxwv kav cov tibneeg no.

3 Koj cia li coj kaum lub ncuav thiab ib co ncuav qab zib thiab ib nyuag me hub zib ntab mus cuag nws.  Nws yuav qhia rau koj paub tias tus tub yuav zoo li cas.

4 Yelaunpau‑as tus pojniam kuj ua raws li ntawd. Nws sawv tsees mus rau Silaus mus txog Ahiyah lub tsev.  Ahiyah tsis pom kev rau qhov nws laus laus, nws qhov muag pom tsis tseeb lawm.

5 (יחוח)Yahweh hais rau Ahiyah tias, saib maj, Yelaunpau‑as pojniam tab tom tuaj yuav nug koj txog nws tus tub, vim nws tus tub mob. Koj cia li hais li no rau nws. Thaum Yelaunpau‑as pojniam mus txog, nws ua txuj ua ib yam li nws yog lwm tus tus pojniam.  

6 Tiamsis thaum Ahiyah hnov nws xib taws nrov tuaj txog ntawm qhov rooj, Ahiyah txawm hais tias, niam Yelaunpau‑as, cia li los tsev.  Ua cas koj yuav ua txuj ua ib yam li yog lwm tus? Rau qhov kuv tau lo lus uas yuav hais tej xov poob siab rau koj.

7 Cia li mus hais rau Yelaunpau‑as tias, (יחוח)Yahweh uas yog cov Ixayees Tus Tswv hais li no tias, kuv twb tsa koj sawv hauv cov pejxeem los thiab pub koj ua thawj kav kuv cov tibneeg Ixayees.

8 Kuv tau dua lub tebchaws ntawm Daviv caj ces los pub rau koj. Txawm li ntawd los koj tsis zoo li kuv tus tub qhe Daviv uas tuav rawv kuv tej lus cob qhia thiab ua raws li kuv hais kawg siab kawg ntsws, thiab tsuas ua tej uas kuv pom raug cai xwb.

9 Tiamsis koj tau ua phem heev dua lwm tus uas nyob ua koj ntej. Koj tau ua tej dab mlom thiab nchuav tej dab mlom, ua rau kuv chim kawg li, muab kuv laim kiag rau tom koj qub qab.

10 Vim li no kuv yuav coj tej xwm txheej phem los rau saum Yelaunpau‑as caj ces, kuv yuav rhuav tshem txhua tus txivneej ntawm Yelaunpau‑as huvsi pov tseg tsis hais qhev thiab tej pejxeem hauv cov Ixayees, thiab yuav ntxuav kom Yelaunpau‑as caj ces tu noob nrho ib yam li luag hlawv tej quav tsiaj txhu kub nyhiab tag huvsi.

11 Yelaunpau‑as cov tibneeg uas tuag rau hauv lub moos mas dev yuav noj.  Cov uas tuag rau tom hav nroj mas tej liaj dav saum nruab ntug yuav noj, rau qhov (יחוח)Yahweh hais cia li no lawm.

12 Koj cia li sawv rov qab mus tsev.  Thaum koj mus txog ntua hauv koj

lub moos mas tus tub yuav tu siav nrho.

1 3Mas cov Ixayees sawvdaws yuav quaj ntsuag nws thiab muab nws faus.  Rau qhov Yelaunpau‑as cov tibneeg mas nws tib leeg thiaj tuag muaj ntxa xwb, rau qhov hauv Yelaunpau‑as caj ces nws tib leeg ua tau tej yam uas haum ()Yahweh uas yog cov Ixayees Tus Tswv lub siab.

14 (יחוח)Yahweh tseem yuav tsa ib tug vajntxwv kav cov Ixayees uas yuav rhuav tshem Yelaunpau‑as caj ces hnub no ntag, hnub no ntag lauj.

15 (יחוח)Yahweh yuav ntaus cov Ixayees, mas lawv yuav zoo yam nkaus li tej tauj deg ua zog kais ntawm ntug dej.  Nws yuav muab cov Ixayees dob kiag tawm hauv lub tebchaws zoo no uas nws twb muab pub rau lawv tej poj koob yawm txwv lawm, thiab muab lawv ntiab khiav ua sab ua sua dhau plaws mus rau sab dej Yufetis hnub tuaj, rau qhov lawv tau ua tej ncej dab Aselas thiaj ua rau (יחוח)Yahweh chim.

16 Nws yuav muab cov Ixayees tso tseg, rau qhov Yelaunpau‑as ua txhaum thiab coj cov Ixayees ua txhaum.

17 Ces Yelaunpau‑as pojniam txawm sawv rov kiag mus mas los txog lub moos Thilaxas. Thaum nws los txog ntua nws lub taw rooj ces tus metub txawm tu siav nrho.

18 Cov Ixayees sawvdaws muab nws faus thiab quaj ntsuag nws, raws li (יחוח)Yahweh cov lus uas nws kom nws tus tub qhe Ahiyah uas ua xibhwb cev (יחוח)Yahweh lus hais lawd.

19 Lwm yam haujlwm uas Yelaunpau‑as ua, tej uas nws mus ua rog thiab tej uas nws kav tebchaws mas twb muab sau cia rau hauv phau ntawv uas hais txog cov Ixayees tej vajntxwv li keeb kwm lawm.

20 Yelaunpau‑as kav tebchaws tau nees nkaum ob xyoos, mas nws li tuag mus nrog nws tej poj koob yawm txwv nyob.  Nws tus tub Nadas sawv nws chaw ua vajntxwv kav.

​

Lehaunpau‑as Ua Vajntxwv Kav Yahdah

(2 Vaj Keeb Kwm 12:9-16)

21 Lehaunpau‑as uas yog Xalaumoos tus tub ua vajntxwv kav Yahdah. Thaum Lehaunpau‑as pib ua vajntxwv kav tebchaws ntawd, nws hnub nyoog muaj plaub caug ib xyoos. Nws nyob hauv Yeluxalees kav tau kaum xya xyoo yog lub nroog uas (יחוח)Yahweh xaiv hauv txhua xeem Ixayees los cia ua lub chaw rau nws lub npe nyob. Lehaunpau‑as niam npe hu ua Na‑amas uas yog tibneeg Asmoos.

22 Cov Yahdah ua tej uas (יחוח)Yahweh pom tias phem, lawv tau ua txhaum ntau dua tej kev txhaum uas lawv tej poj koob yawm txwv ua zes rau (יחוח)Yahweh khib.

23 Rau qhov lawv ua tej chaw siab teev dab thiab ua tej ncej dab thiab ua tej ncej dab Aselas rau saum txhua lub pov roob thiab ua rau hauv txhua tus qab ntoo ntsuab.

24 Thiab muaj cov txivneej muag cev ntawm tej tsev dab thoob lub tebchaws. Lawv ua kev qias vuab tsuab yam li lwm haiv neeg uas (יחוח)Yahweh twb ntiab tawm ntawm cov Ixayees hauv ntej mus lawm.

25 Thaum Lehaunpau‑as ua vajntxwv tau tsib xyoos mas Sisab uas ua vajntxwv hauv Iziv tebchaws txawm tuaj ua rog rau lub nroog Yeluxalees.

26 Nws muab tej nyiaj kub qhov txhia chaw hauv (יחוח)Yahweh lub tuam tsev thiab hauv vajntxwv lub tsev lwg huvsi coj mus. Nws kuj coj tej daim phiaj kub thaiv uas Xalaumoos ua huvsi mus.

27 Mas vajntxwv Lehaunpau‑as ho muab tooj liab ua tej daim phiaj los siv nyob chaw thiab muab cov daim phiaj ntawd cob rau cov thawj rog uas zov vajntxwv lub qhov rooj. 

28 Txhua zaus uas vajntxwv mus rau hauv (יחוח)Yahweh lub tuam tsev, cov tub rog kuj tuav cov daim phiaj ntawd tawm tuaj thiab coj rov qab mus khaws cia rau hauv lub tsev uas cov tub rog zov khuav nyob.

29 Lwm yam haujlwm uas Lehaunpau‑as ua, txhua yam uas nws ua mas twb muab sau cia rau hauv phau ntawv uas hais txog cov Yahdah tej vajntxwv li keeb kwm lawm.

30 Lehaunpau‑as thiab Yelaunpau‑as pheej sib ua rog tsis tu li.

31 Lehaunpau‑as tuag mus nrog nws tej poj koob yawm txwv nyob. Lawv muab nws faus nrog nws tej poj koob yawm txwv ua ke rau hauv Daviv lub nroog.  Nws niam npe hu ua Na‑amas uas yog tibneeg Asmoos. Mas nws tus tub Anpiyah sawv nws chaw ua vajntxwv kav.